આ પણ વાંચો ટ્રેન્ડિંગ સમાચાર
Jewelry Theft In Ahmedabad: અમદાવાદમાં ચોરીના એક પછી એક બનાવો સતત વધી રહ્યા છે, જેમાં લૂંટારાઓ અવનવી તરકીબો અજમાવીને વેપારીઓને નિશાન બનાવી રહ્યા છે. ત્યારે જાણીતા ઘરેણાં બજાર માણેકચોકમાં ગ્રાહક બનીને આવેલી એક મહિલાએ વેપારીની નજર ચૂકવીને સોનાની 4 બંગડીઓની ચોરી કરી હતી. આ ઘટના બાદ વેપારીએ CCTV ફૂટેજના આધારે પોલીસ મથકમાં મહિલા વિરુદ્ધ ફરિયાદ નોંધાવતા પોલીસે ગણતરીના કલાકોમાં આરોપી મહિલાને ઝડપી પાડી આગળની કાર્યવાહી હાથ ધરી છે.
આ ઘટના અંગે સેટેલાઈટ વિસ્તારમાં રહેતા અને ભાગીદારીમાં માણેકચોકમાં જ્વેલર્સની દુકાન ચલાવતા 31 વર્ષીય જીગર શૈલેષભાઈ શાહે ફરિયાદ નોંધાવી છે. ફરિયાદીની માયશા જ્વેલ્સ નામની સોના-ચાંદીના દાગીનાની દુકાનમાં રોજની જેમ તેઓ દુકાને હાજર હતા, ત્યારે એક અજાણી મહિલાએ દુકાનમાં સેલ્સમેનને વાતોમાં ભોળવીને સોનાની બંગડીઓની ચોરી લીધી હતી.
પોલીસ પૂછપરછમાં મહિલાએ શું કહ્યું?
પોલીસ પૂછપરછમાં મહિલાએ ચોંકાવનારા ખુલાસા કર્યા હતા. પોલીસ તપાસમાં જાણવા મળ્યું હતું કે, ‘મહિલાએ ખાડિયા વિસ્તાર સહિત કાગડાપીઠ પોલીસ સ્ટેશન હદ વિસ્તારમાં પણ એક જ્વેલર્સ માંથી સોનાની બંગડીની ચોરી કરી હતી. મહિલા મૂળ પોરબંદરની છે અને તે કપડાની દુકાન ચલાવે છે. મહિલાના પતિ સાથે છૂટાછેડાની પ્રક્રિયા ચાલી રહી છે, ત્યારે તે અમદાવાદમાં પોતાના પીયર પક્ષમાં રહેતી હતી. બાળકની સ્કૂલ ફી ભરવાની બાકી હોવાથી તે રસ્ટિગેટ થાય તેવી સ્થિતિ હોવાથી મહિલાએ ચોરી કરી હોવાનું જણાવ્યું હતું.’
શું હતી સમગ્ર ઘટના?
મળતી માહિતી મુજબ, ગત 14 મેના રોજ બપોરે 12.30થી 1 વાગ્યા દરમિયાન દુકાનમાં સ્ટાફ દ્વારા સ્ટોકની ગણતરી ચાલી રહી હતી. આ સમયે નેવી બ્લુ રંગની ટી-શર્ટ, ગ્રે જીન્સ અને જાંબલી દુપટ્ટો પહેરેલી એક અજાણી મહિલા ગ્રાહક તરીકે આવી હતી. તેણે દુકાનમાં કાઉન્ટર પર બેઠેલા સેલ્સમેનને સોનાની કડલી બતાવવા કહ્યું હતું. સેલ્સમેને સ્ટોક ગણવાનું અટકાવીને તેને કડલીઓ બતાવી હતી. થોડીવાર ભાવતાલ કર્યા બાદ મહિલા કંઈ પણ ખરીદ્યા વિના ત્યાંથી જતી રહી હતી.
આ પણ વાંચો: સરદારના સ્વપ્ન સમાન VS હોસ્પિટલને નામશેષ કરી SVP ચલાવવાનો કારસો, 95 વર્ષનો ઈતિહાસ-વારસો મરણશૈયાએ
તેના ગયા પછી જ્યારે અધૂરી મુકેલી સ્ટોકની ગણતરી ફરી શરૂ કરવામાં આવી ત્યારે 4 નંગ (2 જોડી) સોનાની બંગડીઓ ઓછી જણાઈ હતી. શંકા જતા તરત જ દુકાનના CCTV ફૂટેજ ચેક કરવામાં આવ્યા હતા. જેમાં સ્પષ્ટ દેખાયું હતું કે, અજાણી મહિલાએ સેલ્સમેનની નજર ચૂકવીને રૂપિયા 5,85,000ની કિંમતની 74.860 ગ્રામ વજનની 22 કેરેટ સોનાની 4 બંગડીઓ પોતાની બગલમાં સંતાડી દીધી હતી અને ચોરી કરીને ફરાર થઈ ગઈ હતી. સમગ્ર મામલે પોલીસે આરોપી મહિલાની ધરપકડ કરીને આગળની કાર્યવાહી હાથ ધરી છે.
