આ પણ વાંચો ટ્રેન્ડિંગ સમાચાર
New Subhash Bridge: અમદાવાદ શહેરની મધ્યમાં સાબરમતી નદી પર આવેલો જૂનો સુભાષબ્રિજ હવે નવા રંગરૂપમાં જોવા મળશે. 8 લેન બનાવવા માટે 391 કરોડનું ટેન્ડર મંજૂર કરી દેવામાં આવ્યું છે.
અત્યાધુનિક સ્ટીલ ગર્ડરનો ઉપયોગ
શહેરના વધતા જતાં ટ્રાફિક ભારણને હળવો કરવા અને વાહનચાલકોની સુવિધા માટે તંત્ર દ્વારા સુભાષબ્રિજને 4-લેનમાંથી કુલ 8-લેન સુધી વિસ્તરણ કરવાની યોજના અમલમાં મૂકવામાં આવી છે. આ પ્રોજેક્ટ હેઠળ હયાત બ્રિજના સુપરસ્ટ્રક્ચરને બદલીને તેની જગ્યાએ અત્યાધુનિક સ્ટીલ ગર્ડરનો ઉપયોગ કરવામાં આવશે, જેથી બ્રિજની મજબૂતી અને આયુષ્યમાં વધારો થશે. આ સમગ્ર કામગીરી માટે દિનેશચંદ્ર આર. અગ્રવાલ ઇન્ફાકોન પ્રા.લી.ને કોન્ટ્રાક્ટ સોંપવામાં આવ્યો છે.
ખાસ મેથડોલૉજીનો થશે ઉપયોગ
પ્રથમ તબક્કામાં, હાલના સુભાષબ્રિજના ફેઝ-1 હેઠળના તમામ સ્પાનના ઉપરના ભાગને (સુપરસ્ટ્રક્ચર) સંપૂર્ણપણે હટાવી દેવામાં આવશે. તેની જગ્યાએ ‘કોમ્પોઝીટ સ્ટીલ ગર્ડર’ પ્રકારનું નવું 4-લેનનું માળખું તૈયાર કરાશે. મહત્ત્વની વાત એ છે કે, હયાત બ્રિજના પિલર (સબસ્ટ્રક્ચર) અને પાયા(ફાઉન્ડેશન)ને તોડવાને બદલે, ડિઝાઇન કન્સલ્ટન્ટ ‘મલ્ટીમીડિયા કન્સલ્ટન્ટ પ્રા.લી.’ દ્વારા તૈયાર કરવામાં આવેલી ખાસ મેથડોલૉજી મુજબ તેમને મજબૂત (સ્ટ્રેન્ધનીંગ) કરવામાં આવશે. આ કામગીરી માટે 9 માસની સમયમર્યાદા નક્કી કરવામાં આવી છે, જેથી ઝડપથી ટ્રાફિક હળવો કરી શકાય.
પ્રોજેક્ટની અંદાજિત કિંમત 361.39 કરોડ
બીજા તબક્કામાં, હાલના બ્રિજની બંને બાજુએ 2-2 લેનના નવા સેપરેટ બ્રિજ બનાવવામાં આવશે. આ નવા બ્રિજ આધુનિક ‘આઇકોનીક સ્ટીલ સ્ટ્રક્ચર’ અને આકર્ષક ‘ફસાડ લાઇટીંગ’ સાથે સજ્જ હશે, જે સાબરમતી રિવરફ્રન્ટની સુંદરતામાં વધારો કરશે. આ પ્રોજેક્ટની અંદાજિત કિંમત 361.39 કરોડ છે, જ્યારે ટેન્ડરની રકમ 236 કરોડ (GST સિવાય) રાખવામાં આવી છે. સમગ્ર પ્રોજેક્ટ 24 માસમાં પૂર્ણ કરવાનું લક્ષ્ય છે, જેના અંતે શહેરને કુલ 8-લેનની સુવિધા ધરાવતો એક ભવ્ય અને મજબૂત બ્રિજ મળશે.
હયાત બ્રિજનું ટેકનિકલ માળખું અને મજબૂતીકરણ
-વર્તમાન બ્રિજ 454 મીટર લાંબો અને 18 મીટર પહોળો છે, જેમાં 76.25 મીટરના 5 સ્પાન અને 36.50 મીટરના 2 સ્પાન આવેલા છે.
-બ્રિજની મજબૂતી વધારવા માટે હયાત ‘વેલ ફાઉન્ડેશન’ સાથે હવે વધારાના તમામ પીયરમાં 1500 થી 1800 એમ.એમ. ડાયાના પાઈલ ફાઉન્ડેશન કરવામાં આવશે.
-નવા બનાવવામાં આવનાર સ્પાન 38 મીટરના રહેશે. સ્ટીલ સુપર-સ્ટ્રક્ચરનો ઉપયોગ થવાથી જૂના વેલ ફાઉન્ડેશન પર વજન ઘટશે અને બ્રિજની વજન વહન કરવાની ક્ષમતા (Load Capacity) માં વધારો થશે.
આઇકોનિક ડિઝાઇન અને સુવિધાઓ
-હયાત બ્રિજની બંને બાજુએ નવા 2-2 લેન (કુલ 4 લેન) ના બ્રિજ બનાવવામાં આવશે. 454 મીટર લંબાઈના આ બ્રિજની પહોળાઈ 10.55 મીટર રહેશે, જેમાં 8 મીટરનો કેરેજ વે, ફૂટપાથ અને ક્રેશ બેરિયરની સુવિધા હશે.
-નદી તરફની પેરાપેટ વોલ પર આધુનિક આઇકોનિક સ્ટીલ સ્ટ્રક્ચર અને પ્રોગ્રામેબલ ફસાડ લાઇટિંગ લગાવવામાં આવશે, જે રાત્રિના સમયે બ્રિજને ભવ્ય લુક આપશે.
આધુનિક કન્સ્ટ્રક્શન ટેકનોલોજી
-બ્રિજમાં સ્ટીલ/કંપોઝીટ ગર્ડર અને POT-PTEF અથવા ઇલાસ્ટોમેરિક બેરિંગનો ઉપયોગ કરવામાં આવશે.
-બ્રિજના સ્લેબ પર વોટર પ્રૂફિંગ મેમ્બ્રેન, બીટુમિનસ વેરિંગ કોટ અને આધુનિક સ્ટ્રિપ સીલ પ્રકારના એક્સપાન્શન જોઈન્ટ્સ લગાવવામાં આવશે, જેથી વાહનચાલકોને ઝટકા રહિત ડ્રાઇવિંગનો અનુભવ મળે.
-આ કામગીરી EPC (Engineering, Procurement, and Construction) ધોરણે કરવામાં આવશે. મલ્ટી મીડિયા કન્સલ્ટન્ટ પ્રા. લી. દ્વારા તૈયાર કરેલ GAD મુજબ કોન્ટ્રાક્ટરે ડિઝાઈન તૈયાર કરવાની રહેશે.
-ગુજરાત સરકારના નિયમ મુજબ, આ ડિઝાઈનનું R&B ડિઝાઈન સર્કલ પાસે પ્રૂફ ચેકિંગ કરાવીને જ કામગીરી આગળ ધપાવવામાં આવશે.
