આ પણ વાંચો ટ્રેન્ડિંગ સમાચાર
વિદેશી મહાનુભાવોના આગમનને લઈને તંત્ર એલર્ટ મોડ પર : દીકરી ટિફની ટ્રમ્પ અને જમાઈ માઈકલ બોલોસ વન્યજીવ અને પ્રાણી સંરક્ષણ કેન્દ્ર વનતારાની મુલાકાતે
જામનગર, : અમેરિકાના રાષ્ટ્રપતિ ડોનાલ્ડ ટ્રમ્પની પુત્રી ટિફની ટ્રમ્પ તથા તેમના પતિ માઈકલ બોલોસનું વિશેષ વિમાન મારફતે જામનગર એરપોર્ટ પર આગમન થયા બાદ તેમને ચુસ્ત પોલીસ બંદોબસ્ત વચ્ચે રિલાયન્સ સંકુલ તરફ લઈ જવામાં આવ્યા હતા. તેઓ વનતારાની મુલાકાતે આવ્યા છે.
સૂત્રોના જણાવ્યા અનુસાર, મહાનુભાવોના આગમનને પગલે જામનગર શહેર પોલીસ તેમજ અન્ય સુરક્ષા એજન્સીઓ દ્વારા એરપોર્ટથી લઈને મોટીખાવડી સુધીના માર્ગ પર વ્યાપક સુરક્ષા વ્યવસ્થા ગોઠવવામાં આવી હતી. કાફલો પસાર થવાનો હોવાથી અનેક સ્થળોએ બેરિકેડિંગ કરવામાં આવ્યું હતું અને પોલીસ દ્વારા માર્ગ વ્યવહારનું નિયંત્રણ હાથ ધરવામાં આવ્યું હતું. તેમના કાફલામાં અદ્યતન સુરક્ષા વાહનો, પાઇલટ વાહનો અને પોલીસ એસ્કોર્ટનો સમાવેશ કરવામાં આવ્યો હતો. એરપોર્ટ પરથી કાફલો રવાના થતાં માર્ગ ઉપર થોડા સમય માટે સામાન્ય વાહન વ્યવહાર રોકી દેવાયો હતો.
જામનગર નજીક આવેલા રિલાયન્સના વન્યજીવ અને પ્રાણી સંરક્ષણ કેન્દ્ર વનતારાની મુલાકાત દરમિયાન તેઓ વિવિધ પ્રજાતિના પ્રાણીઓ, પક્ષીઓ તથા સંરક્ષણ પ્રવૃત્તિઓ અંગે માહિતી મેળવશે. વિદેશી મહેમાનોના આગમનને લઈને સમગ્ર સુરક્ષા તંત્ર એલર્ટ મોડ પર જોવા મળ્યું હતું અને માર્ગ ઉપર પોલીસનો ચુસ્ત બંદોબસ્ત ગોઠવવામાં આવ્યો હતો.
