આ પણ વાંચો ટ્રેન્ડિંગ સમાચાર
અમદાવાદ : પેટ્રોલ અને ડીઝલના ભાવમાં પ્રતિ લિટર રૂ.૩ સુધીનો વધારો થતા ભારતીય રાઇડ-કંપનીઓ, ઇ-કોમર્સ અને ક્વિક-કોમર્સ ક્ષેત્રની કંપનીઓ વધતા લોજિસ્ટિક્સ અને ડિલિવરી ખર્ચ વધારવા માટે તૈયારી કરી રહી છે. નફાના માર્જિન પર અસર પડવાની ચિંતા ઊભી થતા ટ્રક ઓપરેટરો તથા લોજિસ્ટિક કંપનીઓએ નૂર દરમાં વધારો કરવાની હિલચાલ શરૂ કરી છે. દેશભરના ટ્રક ઓપરેટરો તથા લોજિસ્ટિક કંપનીઓ દ્વારા ભાડાંના દરમાં ૩થી ૪ ટકા વધારો થવાની સંભાવના છે. સીએનજીના ભાવમાં પણ પ્રતિ કિલોગ્રામ રૂ. ૨ સુધીનો વધારો કરવામાં આવ્યો છે.
ઉદ્યોગના સુત્રોએ જણાવ્યું હતું કે ઇંધણના ભાવમાં વધારો થવાથી ઓપરેશનલ ખર્ચમાં વધારો થઈ શકે છે અને પરિવહન, ડિલિવરી અને ઓનલાઇન માલના ભાવમાં ૧૦ થી ૨૦ ટકાનો વધારો થઈ શકે છે. આની સીધી અસર બાઇક-ટેક્સી અને ડિલિવરી ભાગીદારો પર પડશે, જેમના મોટાભાગના વાહનો પેટ્રોલ પર ચાલે છે.
જો ઇંધણના ભાવ ઊંચા રહેશે તો ભાડામાં ૧૦થી ૨૦ ટકાનો વધારો થઈ શકે છે. ઓછામાં ઓછું આ વધારાનો થોડો ભાગ ગ્રાહકો પર લાદી શકાય છે. રાઇડ-હેઇલિંગ અને ઇ-કોમર્સ કંપનીઓ માટે ઇલેક્ટ્રિક વાહનો લાંબા સમયથી એક વ્યવહારુ વિકલ્પ રહ્યા છે. જોકે, તે ઝડપથી અપનાવવું મુશ્કેલ છે કારણ કે ઉદ્યોગમાં વપરાતી મોટાભાગની બાઇકો હજુ પણ પેટ્રોલ પર ચાલે છે.
તૈયાર ભોજન, કરિયાણા અને પેકેજ્ડ ફૂડ જેવી શ્રેણીઓમાં તાત્કાલિક દબાણ અનુભવાય તેવી શક્યતા છે, જ્યાં ઇંધણના ઊંચા ખર્ચ ઓર્ડર અને ડિલિવરીના ખર્ચ પર સીધી અસર કરે છે. ટ્રક ઓપરેટરો તથા લોજિસ્ટિક કંપનીઓ આ અગાઉથી જ કાર્યકારી ખર્ચમાં વધારાથી બોજ હેઠળ આવી ગયા છે ત્યારે હવે પેટ્રોલ-ડીઝલના ઊંચા ભાવથી તેમના માર્જિન પર દબાણ આવશે.
ટાયર, ટોલ ચાર્જિસ, લ્યુબ્રિકાન્ટસ તથા સ્પેર પાર્ટસની કિંમતોમાં તાજેતરના ભૂતકાળમાં વધારો થયો છે.
ક્રુડ તેલના ઊંચા ભાવને પગલે સરકારી ઓઈલ રિફાઈનરીઓની ખોટમાં સતત વધારો થઈ રહ્યો હોવાનું ધ્યાનમાં રાખી તેમને રાહત પૂરી પાડવા સરકારે પેટ્રોલ તથા ડીઝલના ભાવમાં પ્રતિ લિટર રૂપિયા ૩નો વધારો કર્યો છે.
પેટ્રોલ તથા ડીઝલના ભાવમાં વધારાને ધ્યાનમાં રાખતા માલસામાનના પરિવહન માટેના નૂર દરમાં ૩થી ૪ ટકાનો વધારો કરવાની ફરજ પડશે. જો કે આ વધારો રુટ પર આધારિત હશે એમ ઓલ ઈન્ડિયા ટ્રાન્સપોર્ટર્સ વેલ્ફેર એસોસિએશનના સુત્રોએ જણાવ્યું હતું.
ટ્રાન્સપોર્ટરો આમપણ નજીવા માર્જિન પર કામ કરી રહ્યા છે ત્યારે પેટ્રોલ-ડીઝલનો ખર્ચ વધી જતા નૂર દરમાં વધારો કર્યા સિવાય છૂટકો નથી એમ તેમણે ઉમેર્યું હતું.
