ઈક્વિટી ફંડોમાં રોકાણ 56% વધીને રૂ.40,450 કરોડ | Investment in equity funds increases by 56% to Rs 4…

માર્ચમાં ગોલ્ડ ઈટીએફમાં રોકાણમાં ૫૭ ટકાનું ગાબડું

મુંબઈ : વૈશ્વિક બજારોનું સેન્ટીમેન્ટ ઈરાન યુદ્વના કારણે ડહોળાયેલું રહ્યા સાથે ભારતીય શેર બજારોમાં માર્ચ મહિનામાં મોટા કડાકા બોલાયા છતાં ઈક્વિટી મ્યુચ્યુઅલ ફંડોમાં રોકાણકારોએ નીચા વેલ્યુએશને તક ઝડપીને મોટું રોકાણ કર્યું છે. માર્ચમાં ઈક્વિટી ફંડોમાં રોકાણ ૫૬ ટકા વધીને રૂ.૪૦,૪૫૦ કરોડનું નોંધાયું છે. જે ફેબુ્રઆરીમાં રૂ.૨૫,૯૭૮ કરોડ રહ્યું હતું. જો કે ડેટ ફંડોમાં રોકાણમાં ઓટ આવી છે. આ સાથે ગોલ્ડ ઈટીએફમાં પણ રોકાણ પ્રવાહમાં નોંધનીય ઘટાડો નોંધાયો છે.

એસોસીયેશન ઓફ મ્યુચ્યુઅલ ફંડ્સ ઈન ઈન્ડિયા (એમ્ફી) દ્વારા માર્ચ ૨૦૨૬ મહિનાના જાહેર કરાયેલા આંકડા મુજબ મ્યુચ્યુઅલ ફંડ ઉદ્યોગમાં નેટ ધોરણે માર્ચ મહિનામાં રૂ.૨.૩૯ લાખ કરોડનો જંગી રોકાણ ઉપાડ એટલે કે જાવક નોંધાઈ છે. જે ફેબુ્રઆરીમાં રૂ.૯૪,૫૪૩ કરોડની ચોખ્ખું રોકાણ રહ્યું હતું. ડેટ મ્યુચ્યુઅલ ફંડોમાં માર્ચ મહિનામાં રૂ.૨.૯૪ લાખ કરોડનો જંગી ચોખ્ખો ઉપાડ રહ્યો છે. જે ફેબુ્રઆરીમાં રૂ.૪૨,૧૦૬ કરોડનું ચોખ્ખું રોકાણ રહ્યું હતું.

આ દરમિયાન હાઈબ્રિડ સ્કિમોમાં માર્ચમાં રૂ.૧૬,૫૩૮ કરોડનો જંગી ઉપાડ રહ્યો છે. જે ફેબુ્રઆરીમાં રૂ.૧૧,૯૮૩ કરોડનું ચોખ્ખું રોકાણ થયું હતું. આ દરમિયાન અન્ય સ્કિમો જેમાં ઈટીએફનો પણ સમાવેશ છે, એમાં રેકોર્ડ રૂ.૩૦,૭૬૮ કરોડનો ચોખ્ખો રોકાણ પ્રવાહ રહ્યો છે. જે ફેબુ્રઆરીમાં રૂ.૧૩,૮૭૯ કરોડ રહ્યો હતો. જો કે માર્ચમાં ગોલ્ડ એક્સચેન્જ ટ્રેડેડ ફંડો (ઈટીએફ)માં રોકાણ ફેબુ્રઆરીના રૂ.૫૨૫૫ કરોડની તુલનાએ ઘટીને રૂ.૨૨૬૬ કરોડ રહ્યું છે.જે જાન્યુઆરીમાં રેકોર્ડ રૂ.૨૪૦૪૦ કરોડ નોંધાયું હતું.  સોલ્યુશન ઓરિએન્ટેડ સ્કિમોમાં રિટાયર્મેન્ટ અને ચિલ્ડ્રન ફંડો સહિતમાં રૂ.૨૫૬ કરોડનો સ્થિર રોકાણ પ્રવાહ રહ્યો છે. જે ફેબુ્રઆરીમાં રૂ.૨૪૭ કરોડ ઔરહ્યો હતો.

ફ્લેક્સી કેપ ફંડોમાં રોકાણ આકર્ષણ રૂ.૧૦,૦૫૪ કરોડનું રહ્યું છે. જે ફેબુ્રઆરીમાં રૂ.૬૯૨૫ કરોડ રહ્યું હતું. મિડ-કેપ અને સ્મોલ-કેપ ફંડોમાં રોકાણ પ્રવાહ મજબૂત રહ્યો છે. મિડ કેપ ફંડોમાં  રૂ.૪૦૦૩ કરોડની તુલનાએ વધીને રૂ.૬૦૬૪ કરોડ નોંધાયો છે. જ્યારે સ્મોલ કેપ ફંડોમાં રૂ.૩૮૮૧ કરોડની તુલનાએ રૂ.૬૨૬૪ કરોડ નોંધાયો છે. લાર્જ-કેપ ફંડોમાં રોકાણ ફેબુ્રઆરીના રૂ.૨૧૧૨ કરોડની તુલનાએ માર્ચમાં વધીને રૂ.૨૯૯૮ કરોડ થયો છે.

લાર્જ અને મિડ કેપ પંડોમાં રોકાણ પ્રવાહ રૂ.૩૧૩૮ કરોડથી વધીને રૂ.૫૩૦૭ કરોડ, મલ્ટિ કેપ પંડોમાં રૂ.૧૯૩૪ કરોડથી વધીને રૂ.૨૯૮૨ કરોડ તેમ જ ફોક્સ્ડ ફંડોમાં રોકાણ રૂ.૯૦૧ કરોડની તુલનાએ વધીને રૂ.૨૪૨૫ કરોડ થયું છે. સેક્ટરલ અને થીમેટિક ફંડોમાં રોકાણ રૂ.૨૯૮૭ કરોડની તુલનાએ નજીવું ઘટીને રૂ.૨૪૨૫ રહ્યું છે. ઈએલએસએસ ફંડોમાં રોકાણ જાવક રૂ.૪૩૭ કરોડ રહી છે.

આ સાથે સિસ્ટેમેટિક ઈન્વેસ્ટમેન્ટ પ્લાન (એસઆઈપી) રોકાણ ફેબુ્રઆરીના રૂ.૨૯,૮૪૫ કરોડની તુલનાએ માર્ચમાં રૂ.૩૨૦૮૬.૭૮ કરોડ રહ્યું છે. એસપીઆઈ એસેટ્સનો આંક માર્ચમાં રૂ.૧૫,૧૦,૯૪૨.૯૯ કરોડ રહ્યો છે. જે મ્યુચ્યુઅલ ફંડની એયુએમના ૨૦.૫ ટકા છે. એકાઉન્ટોની સંખ્યા ૯.૭૧ કરોડ ઔરહી છે.

મ્યુચ્યુઅલ ફંડોમાં માસિક રોકાણ પ્રવાહ