આ પણ વાંચો ટ્રેન્ડિંગ સમાચાર
GSRTC Buses ETM QR Code System: ગુજરાત રાજ્ય માર્ગ વાહન વ્યવહાર નિગમ(GSRTC) દ્વારા મુસાફરોની સફરને વધુ સરળ બનાવવા માટે બસોમાં ETM QR કોડ સિસ્ટમ અમલમાં મૂકવામાં આવી છે. આ સિસ્ટમ દ્વારા એપ્રિલ 2025થી મે 2026 સુધીમાં બસોમાં કુલ 1.03 કરોડથી વધુ QR ટ્રાન્ઝેક્શન નોંધાયા છે, જેનાથી નિગમને 112.45 કરોડથી વધુની આવક થઈ છે.
એપ્રિલ 2025માં જ્યાં 4.60 લાખ QR ટ્રાન્ઝેક્શન હતા
મુસાફરોને કેશલેસ મુસાફરીનો અનુભવ પૂરો પાડતી આ સિસ્ટમમાં સતત વધારો જોવા મળી રહ્યો છે. એપ્રિલ 2025માં જ્યાં 4.60 લાખ QR ટ્રાન્ઝેક્શન થતા હતા, તેમાં ચાર ગણો વધારો થતાં મે 2026માં 17.34 લાખથી વધુ ટ્રાન્ઝેક્શન નોંધાયા છે. આ ડિજિટલ પેમેન્ટના માધ્યમથી નિગમને દર મહિને સરેરાશ 19.37 કરોડની આવક થઈ રહી છે.
તમામ ડેપોમાં નવીન મશીનોની વ્યવસ્થા
નિગમ દ્વારા સંચાલિત 16 વિભાગના 125 ડેપો ખાતે 10,500 નવા ઈ-બીટીએમ-મશીનો ફાળવવામાં આવ્યા છે. અગાઉ માત્ર પ્રીમિયમ બસો પૂરતી મર્યાદિત આ ક્યુઆર કોડ (QR Code) ટ્રાન્ઝેક્શન સુવિધા હવે નિગમ હસ્તકની તમામ એક્સપ્રેસ અને લોકલ સર્વિસો તેમજ તમામ ડેપો ખાતે લાગુ કરી દેવામાં આવી છે. આ વ્યવસ્થાથી મુસાફરી દરમિયાન છૂટા પૈસા બાબતે થતી મુશ્કેલીઓનું કાયમી નિવારણ આવ્યું છે અને કંડક્ટરોનો સમય તેમજ મહેનત પણ બચે છે.
ઓનલાઈન એડવાન્સ બુકિંગ અને મુસાફરોનો પ્રતિસાદ
બસ સ્ટેન્ડ પર લાંબી લાઈનોમાં ઊભા રહેવામાંથી મુક્તિ આપવા માટે ઓનલાઈન એડવાન્સ બુકિંગ સુવિધાને પણ સારો પ્રતિસાદ મળી રહ્યો છે. વર્ષ 2026ના પ્રથમ છ મહિના દરમિયાન નિગમની પ્રીમિયમ અને નોન-પ્રીમિયમ મળીને કુલ 39,372 ટ્રિપ્સનું સંચાલન કરવામાં આવ્યું હતું. ગ્રામીણ અને અંતરિયાળ વિસ્તારના મુસાફરો માટે હવે 100 કિલોમીટરથી વધુ અંતર કાપતી અંદાજે 2500 જેટલી લોકલ ટ્રિપ્સને પણ ઓનલાઈન રિઝર્વેશન પ્લેટફોર્મ સાથે જોડી દેવામાં આવી છે.
વિવિધ બસ સેવાઓમાં બુકિંગ દર નીચે મુજબ છે.
પ્રીમિયમ એસી સેવા: મે 2026 દરમિયાન વેકેશનના માહોલમાં બુકિંગનો દર 78.85 ટકા નોંધાયો.
વોલ્વો બસ સેવા: એપ્રિલ અને મે મહિનામાં અનુક્રમે 50 ટકા અને 57.81 ટકા બુકિંગ રહ્યું.
નોન-પ્રીમિયમ સ્લીપર બસ: છ મહિના દરમિયાન સરેરાશ 77.53 ટકાના બુકિંગ રેટ સાથે મુસાફરોની મુખ્ય પસંદગી બની છે.
