આ પણ વાંચો ટ્રેન્ડિંગ સમાચાર
Vadodara Accident : વડોદરા જિલ્લામાં વર્ષ-2025માં વિવિધ માર્ગ અકસ્માતમાં કુલ 352 વ્યક્તિઓએ જીવ ગુમાવ્યા હતાં. અકસ્માત માટે ટુ વ્હીલરો સૌથી વધારે જવાબદાર હોવાનું આંકડા પરથી બહાર આવ્યું છે જ્યારે બીજા નંબરે ફોર વ્હીલર અને ત્રીજા નંબર રાહદારીઓનો સમાવેશ થાય છે.
ઉલ્લેખનીય છે કે વડોદરા જિલ્લામાં નેશનલ હાઇવે, એક્સપ્રેસ હાઇવે, સ્ટેટ હાઇવે તેમજ પંચાયતના હાઇવે આવેલા છે. આ માર્ગો પરથી રોજે રોજ ગામ અથવા તાલુકા મથકો પરથી મોટી સંખ્યામાં વાહનચાલકોની અવરજવર સતત રહેતી હોય છે. કેટલીક વખત વાહનચાલકોની બેદરકારીના કારણે અકસ્માતો સર્જાતા હોય છે અને નિર્દોષ વ્યક્તિઓ જીવન છે.
તંત્ર દ્વારા અકસ્માતોના બનાવો તેમજ તેમાં મૃત્યુ પામનાર અને ઇજાગ્રસ્તો અંગેનું મોનિટરિંગ થતું હોય છે. સૂત્રોએ જણાવ્યું હતું કે વર્ષ-2025માં બનેલા અકસ્માતના બનાવોમાં 352 વ્યક્તિઓનું મોત થયું હતું. મૃતકોની સંખ્યામાં 315 પુરુષ અને 37 સ્ત્રીઓનો સમાવેશ થાય છે. મૃતકોની આ સંખ્યામાં બે મહિલા સહિત કુલ 133 વાહન ચાલકો હતાં જેમની બેદરકારીના કારણે અકસ્માતો સર્જાયા હતાં. ટુ વ્હીલરના કારણે થતાં અકસ્માતમાં કુલ 162 વ્યક્તિઓના મોત થયા છે. જ્યારે ફોર વ્હીલર એટલે કે કાર, ટેક્સી, વાન જેવા વાહનોના કારણે થતા અકસ્માતમાં 67 વ્યક્તિઓ અને ટ્રકના કારણે 39, એસટી બસના કારણે 5 વ્યક્તિઓના મોત થયા છે.
અકસ્માતોમાં કુલ 665 વ્યક્તિઓને નાની મોટી ઇજાઓ થઇ હતી. અકસ્માતમાં ચાલતી જતી હોય તેવી કુલ 63 વ્યક્તિઓના પણ મોત થયા છે. વર્ષ-2023માં કુલ 315 વ્યક્તિઓના મૃત્યું અકસ્માતોના કારણે થયા હતાં તેની સરખામણીમાં વર્ષ-2024માં મૃત્યુઆંકમાં સાધારણ ઘટાડો થયો હતો. પરંતુ વર્ષ-2025માં આ મૃતકોની સંખ્યા વધી ગઇ છે.
હાઇવે પર અકસ્માતોની સંખ્યા ઘટાડવા માટે તંત્ર દ્વારા અનેક પ્રયત્નો હાથ ધરવામાં આવતા હોવા છતાં અકસ્માતો સર્જાતા હોય છે. અકસ્માત માટે સૌથી મોટું કારણ નિર્ધારિત સ્પીડના બદલે વધારે સ્પીડ બહાર આવ્યું છે. ટુ વ્હીલર કે ફોર વ્હીલર હોય પરંતુ પૂરપાટ ઝડપે દોડતા આ વાહનોના કારણે અકસ્માતો સર્જાતા હોય છે.
તહેવારો અને વેકેશનના સમયગાળામાં નોંધાયેલા સૌથી વધુ અકસ્માતો
વડોદરા જિલ્લામાં વર્ષ-2025માં કુલ 549 અકસ્માતો નોંધાયા છે જેમાં 352 વ્યક્તિના મોત થયા છે તેમજ ગંભીર રીતે ઘાયલ હોય તેવી વ્યક્તિઓની સંખ્યા 387 હતી. આ ઉપરાંત સામાન્ય ઇજા થઇ હોય તેવા લોકોની સંખ્યા 188 હતી. સૂત્રોએ જણાવ્યું હતું કે તહેવારોના દિવસો તેમજ વેકેશનમાં અકસ્માતોની સંખ્યા સૌથી વધુ હોય છે. કેલેન્ડર મહિના મુજબ જો અકસ્માતોની સંખ્યા પર નજર દોડાવીએ તો માર્ચ વેકેશનનો સમય, ઓક્ટોબર દિવાળીના તહેવારોનો સમય તેમજ ડિસેમ્બર વેકેશનના સમયગાળામાં અકસ્માતોની સંખ્યા વધારે નોધાઇ છે.
જરોદ પાસે અકસ્માતમાં આઠના મોત : ભારતમાલા હાઇવે પર પણ અકસ્માતો વધ્યા
વડોદરા જિલ્લામાંથી પસાર થતા સ્ટેટ અને નેશનલ હાઇવે જેમાં એક્સપ્રેસ હાઇવેનો પણ સમાવેશ થાય છે તે હાઇવે જીવલેણ બની રહ્યા છે. તાજેતરમાં જ હાલોલ-વડોદરા સ્ટેટ હાઇવે પર એક લક્ઝરી બસ ઊભેલી ટ્રકની પાછળ ઘૂસી જતા આઠ નિર્દોષ લોકોના જીવ ગયા હતાં. આ ઉપરાંત હવે વડોદરા જિલ્લાનો ભારતમાલા હાઇવે પણ કાળમુખો બની રહ્યો છે. આ મહિનામાં જ બે મોટા અકસ્માતમાં બનાવમાં છ વ્યક્તિના જીવ ગયા હતાં. જેમાં વડોદરા નજીક સમીયાલા તેમજ કરજણ તાલુકામાં થયેલા અક્સ્માતમાં ત્રણ-ત્રણ વ્યક્તિઓ હોમાઇ હતી.
સ્ટેટ હાઇવે પર અકસ્માતમાં સૌથી વધારે મૃત્યુ
|
રોડ |
મૃત્યુની સંખ્યા |
|
એક્સપ્રેસ વે |
18 |
|
નેશનલ હાઇવે |
52 |
|
સ્ટેટ હાઇવે |
153 |
|
અન્ય રોડ |
129 |
|
કુલ |
352 |
