આ પણ વાંચો ટ્રેન્ડિંગ સમાચાર
વડોદરાઃ ઓછી સગવડો અને મર્યાદિત સંસાધનો વચ્ચે પણ ઝળહળતી સફળતા મેળવનારા વિદ્યાર્થીઓ સમાજ માટે પ્રેરણા સ્ત્રોત બનતા હોય છે.બીજી તરફ ઓછી આવક હોવા છતા ગમે તેમ કરીને પણ બાળકો સારો અભ્યાસ કરે તેવુ વિચારનારા વાલીઓની સંખ્યા પણ વધી રહી છે.
ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા આજે જાહેર થયેલા ધો.૧૦ના પરિણામમાં આજવા રોડ પર રહેતી ફોરમ ઠક્કરે આર્થિક અગવડો વચ્ચે પણ ૯૯.૯૨ પર્સેન્ટાઈલ પ્રાપ્ત કર્યા છે.
ફોરમના પિતા સ્ટેશનરીની ડિલિવરીનું કામ કરે છે.તેમણે સંસ્થાની, સાથે કામ કરતા કર્મચારીઓની અને ઓળખીતાઓની મદદ લઈને પોતાની દીકરીને ભણાવી છે.ફોરમ કહે છે કે, ઘર નાનુ હોવાથી હું લાઈબ્રેરીમાં મોટાભાગે વાંચતી હતી.મારે ભવિષ્યમાં સી એ કરવું છે.
આ જ રીતે ખોડિયાર નગર વિસ્તારમાં રહેતી દામિની ડાભીએ ૯૬ પર્સેન્ટાઈલ પ્રાપ્ત કર્યા છે.તેના પિતા શાકભાજીની લારી ચલાવે છે.દામિનીની ઈચ્છા આગળ અભ્યાસ કરીને ખ્યાતનામ વકીલ બનવાની છે.
દામિનાના પિતાનું કહેવું છે કે, મેં ૧૦ ટકા વ્યાજે લઈને પણ દીકરીને અને મારા બીજા બે સંતાનોને ભણાવી રહ્યો છું.કોરોનાના સમયમાં તો મારો ધંધો પણ પડી ભાંગ્યો હતો અને તે સમયે પણ સ્કૂલની ફી તો ભરવી જ પડતી હતી.
ટયુશન વગર ૯૯.૫૬ પર્સેન્ટાઈલ, પિતા ઈડલીની લારી ચલાવે છે
ફેનિલ પંચાલે ટયુશન વગર ૯૯.૫૬ પર્સેન્ટાઈલ પ્રાપ્ત કર્યા છે.ફેનિલના પિતા અને માતા રાવપુરા વિસ્તારમાં ઈડલી- વડાની લારી ચલાવે છે.ફેનિલે કહ્યું હતું કે, મેં શરુઆતથી જ સેલ્ફ સ્ટડી પર ભાર મૂકયો હતો અને ટયુશન વગર જ અભ્યાસ કરવાનું પસંદ કર્યું હતું.હું આગળ સીએનો અભ્યાસ કરવા માગું છે.ફેનિલના માતા પિતાએ કહ્યું હતું કે, ધાર્યા કરતા પણ સારુ પરિણામ આવવાની અમને ખુશી છે.
બે પૈસા વધારે મળે તો ટયુશન કરાવી શકાય
દીકરીને ભણાવવા માટે પિતા ટેમ્પો ડ્રાઈવ કરવાની સાથે મજૂરી પણ કરે છે
શહેરના ગાજરાવાડી વિસ્તારમાં રહેતી હેતલ વણઝારાએ આજના ધો.૧૦ના પરિણામમાં ૯૬.૯૪ પર્સેન્ટાઈલ પ્રાપ્ત કર્યા છે.હેતલના પિતા હરીસિંહ વણઝારા ટેમ્પો ડ્રાઈવર છે.તેમનું કહેવું છે કે, હું ટેમ્પો ચલાવું છું અને સાથે ટેમ્પાનો સામાન ચઢાવવાની અને ઉતારવાની મજૂરી પણ કરું છું.જેથી બે પૈસા વધારે મળે અને દીકરાના ટયુશનનો ખર્ચ કાઢી શકાય.મારુ ઘર પણ એક રુમ-રસોડાનું છે.મારી બીજી બે દીકરીઓ પણ છે.જેમાંથી એક છઠ્ઠામાં અને અન્ય એક નવમા ધોરણમાં અભ્યાસ કરે છે.મેં મજૂરી કરી છે પણ હું મારી દીકરીઓ મજૂરી કરે તે ઈચ્છતો નથી.મારી મોટી દીકરી હેતલ ડોકટર બનવા માગે છે અને તેને ભણાવવા માટે હું કશું પણ કરીશ.
ધો.૧ થી ૧૦ સુધી ટયુશન વગર અભ્યાસ, ૯૮.૫૦ પર્સેન્ટાઈલ મેળવ્યા
સાધન સંપન્ન પરિવારોમાં બાળકો માટે સ્કૂલના અભ્યાસની સાથે ટયુશન અનિવાર્ય થઈ ગયું છે ત્યારે વાઘોડિયા રોડ પર રહેતી પ્રિન્સી શાહે ટયુશન વગર ૯૮.૫૦ પર્સેન્ટાઈલ પ્રાપ્ત કર્યા છે.તેના પિતા શિક્ષક છે એટલે તેમનું પણ માર્ગદર્શન મળતું હતું.પ્રિન્સી કહે છે કે, મેં ધો.૧૦ સુધી ક્યારેય ટયુશન કર્યું નથી.
સિક્યુરિટી ગાર્ડની પુત્રીના ૯૪ પર્સેન્ટાઈલ શિક્ષણ સમિતિની સ્કૂલમાં અભ્યાસ કર્યો
શિક્ષણ સમિતિની સ્કૂલમાં અભ્યાસ કરીને ૯૪ પર્સેન્ટાઈલ મેળવનાર મેઘના ઠક્કર ખોડિયાર નગરમાં રહે છે અને તેના પિતા સિક્યુરિટી ગાર્ડ તરીકે નોકરી કરે છે.૧૨૦૦૦ રુપિયાના પગારમાં પણ ઘર ચલાવીને તેના પિતા મનોજભાઈએ દીકરીને ભણાવી છે.
તેઓ કહે છે કે, હું પહેલા પગરીક્ષા ચલાવતો હતો અને સિક્યુરિટી ગાર્ડ તરીકે પણ નોકરી કરતો હતો.ગત વર્ષે હાર્ટ એટેક આવ્યા બાદ પગ રીક્ષા ચલાવવાનું બંધ થઈ ગયું છે.આર્થિક સંકડામણ તો છે પણ અમારા સમાજ તરફથી ઘર ચલાવવા મદદ મળી રહી છે.મેઘનાને આગળ અભ્યાસ કરીને ડોકટર બનવાની ઈચ્છા છે. આ માટે ગમે તે જગ્યાએથી મદદ લેવાનો પ્રયાસ કરીશ.
શર્ટ સીવવાનુ કામ કરનારાના પુત્રના ૯૯.૭૨ પર્સેન્ટાઈલ
ગાજરાવાડી વિસ્તારમાં રહેતા મિહિર કાયસ્થે ૯૯.૭૨ પર્સેન્ટાઈલ પ્રાપ્ત કર્યા છે.મિહિરના પિતા પરેશભાઈ કાયસ્થ રેડીમેડ ગાર્મેન્ટની ફેક્ટરીમાં શર્ટ સીવવાનું કામ કરે છે.મિહિરનું કહેવું છે કે, મારા પિતા ધો.૧૨ પાસ છે પણ તેમણે મને ઉચ્ચાભ્યાસ માટે પ્રેરણા આપી હતી.તેમણે મને આર્થિક સંકડામણ અનુભવવા દીધી નથી.હું ધો.૧૧-૧૨ સાયન્સનો અભ્યાસ કરીને આગળ એન્જિનિયર બનવા માગું છું.
