આ પણ વાંચો ટ્રેન્ડિંગ સમાચાર
ઊનાના ભેભા ગામે ગૃહકંકાસમાં ખૂનની હોળી ખેલાઈ : આસપાસના લોકોએ દોડી આવી ભાગવાનો પ્રયાસ કરનાર હત્યારા પતિને ઝાડ સાથે બાંધી પોલીસ બોલાવી : આરોપી ઝબ્બે
ઊના, : ઊના તાલુકાના ભેભા ગામે આજે ગૃહકલેશમાં ખૂનની હોળી ખેલાઈ હતી. ક્રોધાવેશમાં ભાન ભૂલેલા પતિએ રસોઈ બનાવી રહેલી પત્નીની કુહાડીના ઘા ઝીંકી કરપીણ હત્યા કરી નાખી હતી. ઝઘડાનો અવાજ સાંભળી આસપાસમાંથી દોડી આવેલા લોકોએ ભાગવાનો પ્રયાસ કરનાર હત્યારા પતિને પકડી લઈ ઝાડ સાથે બાંધી દઈ પોલીસને જાણ કરી હતી.
તાલુકાના ભેભા ગામે રહેતા દેવસીભાઈ દાનાભાઈ બાંભણીયા (ઉ.વ. 37) બોટમાં માછીમારી કરવાનું મજૂરી કામ કરે છે. હાલ હોળી-ધુળેટીનો તહેવાર હોવાથી પોતાના ઘરે આવ્યો હતો. આજે તેના પત્ની લાખુબેન (ઉ.વ. 34) ઘરે રસોડામાં રસોઈ બનાવી રહ્યા હતા ત્યારે પતિ-પત્ની વચ્ચે કોઈ કારણસર ઝઘડો થતા તે ઉગ્ર સ્વરૂપમાં ફેરવાયો હતો. ઝઘડાને લઈ દેવસીના મગજ પર કાળ સવાર થઈ જતા ક્રોધાવેશમાં ભાન ભૂલી ઘરમાં પડેલી કુહાડી લઈ ગળા સહિતના ભાગે આડેધડ ઘા મારી દેતા લાખુબેન લોહીલુહાણ હાલતમાં બેભાન થઈ ઢળી પડયા હતા. ઝઘડાનો અવાજ સાંભળી આજુબાજુના લોકો ભેગા થઈ ગયા હતા. આ સમયે દેવસીએ ભાગવાની કોશિશ કરતા લોકોએ તેને પકડી લઈ ઘરની સામે એક ઝાડ સાથે બાંધી દઈ ઊના પોલીસને જાણ કરી હતી. બનાવના પગલે પોલીસ સ્ટાફે સાથે ભેભા ગામે પહોંચી દેવસીને અટકાયતમાં લઈ લીધો હતો તેમજ હુમલામાં વપરાયેલી કુહાડી કબ્જે કરી ફરિયાદ નોંધવા તજવીજ શરૂ કરી હતી. જ્યારે લાખુબેનને ઊના સરકારી હોસ્પિટલે ખસેડાતાં ડોક્ટરે તેમને મૃત જાહેર કર્યા હતા.
ઊના પંથકમાં 4 દિવસમાં જ પતિના હાથે પત્નીની હત્યાની બીજી ઘટના
સીમર ગામે ચાર દિવસ પહેલા પતિ જગદીશ ડાભીએ ચારિત્ર્યની શંકા રાખી પત્ની લક્ષ્મીબેનની લોખંડના દસ્તાના ઘા ઝીંકી હત્યા કરી નાખી હતી, જે કરૂણ ઘટના હજુ લોકોના માનસ પરથી દૂર થઈ નથી ત્યાં ભેભા ગામે પતિના હાથે પત્નીની હત્યા થતાં પંથકમાં અરેરાટી પ્રસરી ગઈ છે. તાલુકામાં પોલીસ કે કાયદાનો કોઈ ડર ન હોય તેવો માહોલ જોવા મળી રહ્યો છે.
