આ પણ વાંચો ટ્રેન્ડિંગ સમાચાર
Fake Policeman In Amreli: અમરેલી જિલ્લાની ખાંભા પોલીસને શંકાસ્પદ વાહન ચેકિંગ દરમિયાન મોટી સફળતા હાથ લાગી છે. પોલીસને જોઈને ગભરાઈ ગયેલા એક કારચાલકની તપાસ કરતા તે નકલી પોલીસ હોવાનું અને અમદાવાદમાં નોંધાયેલા હનીટ્રેપના ગુનાનો મુખ્ય આરોપી હોવાનું સામે આવ્યું છે. ધારી એએસપી જયવીર ગઢવીએ આ સમગ્ર મામલે પત્રકાર પરિષદ યોજી વિગતો જાહેર કરી છે.
શંકાસ્પદ કારની તપાસમાં ફૂટ્યો ભાંડો
ખાંભા પોલીસની ટીમ જ્યારે પેટ્રોલીંગમાં હતી ત્યારે ભાવનગર પાસિંગની એક કાર શંકાસ્પદ જણાતા તેને અટકાવવામાં આવી હતી. કારની તલાશી લેતા પોલીસને અંદરથી વિદેશી દારૂની 6 બોટલો મળી આવી હતી. જોકે, પોલીસને શંકા જતા કારની ઉંડાણપૂર્વક તપાસ કરવામાં આવી ત્યારે કારના સ્ટેરિંગ પાસે બનાવવામાં આવેલા એક ‘ગુપ્ત ખાના’ માંથી પોલીસની વર્દીવાળું આઈકાર્ડ મળી આવ્યું હતું.
અમદાવાદનો હનીટ્રેપનો આરોપી નીકળ્યો
પકડાયેલ શખસની ઓળખ ભાવનગર જિલ્લાના જેસરના રહેવાસી ચિરાગ જાદવ તરીકે થઈ છે. પોલીસ પૂછપરછમાં ચોંકાવનારો ઘટસ્ફોટ થયો કે, ચિરાગ અમદાવાદના નરોડા વિસ્તારમાં નોંધાયેલા એક હનીટ્રેપના ગુનામાં વોન્ટેડ છે. તેણે નકલી પોલીસ બનીને ફરિયાદી પાસેથી રૂપિયા 3 લાખ જેટલી રકમ પણ પડાવી હતી.
ચિરાગ જાદવ પોતાના કબજામાં પોલીસનું ડુપ્લીકેટ આઈકાર્ડ રાખતો હતો. આ આઈકાર્ડ બતાવીને તે હાઈવે પર કે અન્ય સ્થળોએ લોકો પર પોલીસ હોવાનો રોફ જમાવતો અને ગુનાહિત પ્રવૃત્તિઓ આચરતો હતો. જોકે, આ વખતે અસલી પોલીસની બાજ નજર સામે તેની કોઈ ચાલબાજી ન ચાલી અને તે ઝડપાઈ ગયો.
પોલીસની કડક કાર્યવાહી
ધારી ASP જયવીર ગઢવીના માર્ગદર્શન હેઠળ પોલીસે આરોપી સામે પ્રોહિબિશન અને નકલી દસ્તાવેજ રાખવા અંગેનો ગુનો નોંધી વધુ તપાસ હાથ ધરી છે. આ ઉપરાંત અમદાવાદ પોલીસને પણ આ શખસની ધરપકડ અંગે જાણ કરવામાં આવી છે. તપાસમાં અન્ય કેટલા લોકો સાથે આ શખ્સે છેતરપિંડી કરી છે તે અંગે પણ ખુલાસા થવાની શક્યતા છે.
