ગુજરાત આર્ટસ એન્ડ કોમર્સ કોલેજ, અમદાવાદખાતે NSS ઓરિએન્ટેશન પ્રોગ્રામ “પ્રારંભ” સંપન્ન

ગુજરાત આર્ટસ એન્ડ કોમર્સ કોલેજ (સાંજ), અમદાવાદના રાષ્ટ્રીય સેવા યોજના (NSS) યુનિટ દ્વારા શનિવાર, ૧૨ સપ્ટેમ્બર ૨૦૨૬ ના રોજ કોલેજના સેમિનાર હોલ ખાતે નવપ્રવેશિત સ્વયંસેવકો માટે ઓરિએન્ટેશન પ્રોગ્રામ “પ્રારંભ” નું ભવ્ય આયોજન કરવામાં આવ્યું હતું.

આ કાર્યક્રમમાં મુખ્ય વક્તા તરીકે એચ. કે. આર્ટસ કોલેજના NSS પ્રોગ્રામ ઓફિસર ડો. મોહનભાઈ પરમાર ઉપસ્થિત રહ્યા હતા. તેમણે વિદ્યાર્થીઓને NSS ના મૂળભૂત સિદ્ધાંતો, સામાજિક જવાબદારીઓ અને વ્યક્તિત્વ વિકાસમાં સમાજસેવાના મહત્વ વિશે પ્રેરણાદાયી માર્ગદર્શન પૂરું પાડ્યું હતું.

કાર્યક્રમના અધ્યક્ષ અને કોલેજના આચાર્ય ડો. મનોજ પટેલ એ પોતાના વિશેષ ઉદ્બોધનમાં વિદ્યાર્થીઓને રાષ્ટ્રનિર્માણમાં યુવાનોના યોગદાન વિશે સમજાવ્યું હતું. તેમણે NSS ના ઘ્યેયવાક્ય “Not Me But You” (હું નહીં પણ તમે) ના મહત્વ પર ભાર મૂકીને વિદ્યાર્થીઓને નિઃસ્વાર્થ ભાવે સમાજસેવા કરવા અને દેશના સજાગ નાગરિક બનવા માટે પ્રેરિત કર્યા હતા.

કાર્યક્રમની શરૂઆત દીપ પ્રાગટ્ય અને NSS ગીતથી થઈ હતી. ત્યારબાદ સ્વાગત પ્રવચન ડો. ઓમપ્રકાશ શુક્લ દ્વારા કરવામાં આવ્યું હતું, જ્યારે પ્રોગ્રામ ઓફિસર ડો. સંદીપ સાંચલાએ વર્ષ દરમિયાન યોજાનાર પ્રવૃત્તિઓની માહિતી આપી હતી.

કાર્યક્રમ દરમિયાન સ્વયંસેવકો દ્વારા NSS ની વિવિધ પ્રવૃત્તિઓ, વાર્ષિક શિબિર (કેમ્પ) અને વિદાય સમારંભ (ફેરવેલ) નાં સ્મરણો દર્શાવતું એક શાનદાર વિડીયો પ્રેઝન્ટેશન રજૂ કરવામાં આવ્યું હતું, જેને ઉપસ્થિત સહુએ ખૂબ બિરદાવ્યું હતું.

કાર્યક્રમના અંતે રૂચિતા પાટીલ દ્વારા આભાર વિધિ કરવામાં આવી હતી અને સમગ્ર કાર્યક્રમનું સફળ સંચાલન પિલ્લાઈ અંજલી દ્વારા કરવામાં આવ્યું હતું. સભાના સમાપન બાદ ઉપસ્થિત તમામ અતિથિઓ, અધ્યાપકો અને વિદ્યાર્થીઓ માટે અલ્પાહાર (નાસ્તો) ની વ્યવસ્થા કરવામાં આવી હતી.

રિપોર્ટર ડૉ. કિંજલ પંચાલ અમદાવાદ