આ પણ વાંચો ટ્રેન્ડિંગ સમાચાર
વડોદરા,ખાનગી હોસ્પિટલમાં નર્સ તરીકે નોકરી કરતી મહિલાની છેડતી કરનાર ફૂડ ડિલિવરી બોયને ગોરવા પોલીસે સીસીટીવી ફૂટેજના આધારે ઝડપી પાડી વધુ તપાસ હાથ ધરી છે.
ગોરવા વિસ્તારમાં રહેતી ૩૦ વર્ષની મહિલા ખાનગી હોસ્પિટલમાં નોકરી કરે છે.ગઇકાલે રાત્રે આઠ વાગ્યે નોકરી પરથી ઘરે આવ્યા પછી તે મિત્રો સાથે બહાર ફરવા ગયા હતા અને પરત ઘરે આવી ગઇ હતી. રાત્રે સાડા અગિયાર વાગ્યે મોબાઇલ પર વાત કરતી તે બહેનપણીને ચાવી આપવા જતી હતી.તે દરમિયાન એક બાઇક ચાલક આવ્યો હતો. પાછળથી આવેલો બાઇક ચાલક તેની સાથે શારીરિક અડપલા કરી ભાગી ગયો હતો. ગોરવા પોલીસ સ્ટેશનમાં તેણે ફરિયાદ નોંધાવતા પી.આઇ. કે.એન.લાઠિયાએ ઘટના સ્થળની નજીકના સીસીટીવી ફૂટેજ ચેક કરતા આરોપી ફૂડ ડિલિવરી બોયનું કામ કરતો હોવાનું જણાઇ આવ્યું હતું. બાઇકના નંબરના આધારે પોલીસે આરોપી અમિત નટુભાઇ પઢિયાર, ઉં.વ.૩૮ (રહે. શંકર પાર્ક સોસાયટી, દિવાળીપુરા) ને ઝડપી પાડયો હતો. પોલીસે તેની બાઇક કબજે લીધી છે.
