આ પણ વાંચો ટ્રેન્ડિંગ સમાચાર
Chhota Udepur Fertilizer Shortage: છોટાઉદેપુર જિલ્લાના બોડેલી તાલુકામાં ચોમાસાની શરૂઆતની સાથે જ જગતનો તાત મોટી આફતમાં મુકાયો છે. કપાસના વાવેતર બાદ હવે છોડને સમયસર ખાતર આપવાનું હોવાથી ખેડૂતોને ખાતરની સખત જરૂરિયાત છે, પરંતુ વહીવટી તંત્રની બેદરકારી અને ટેકનિકલ ખામીના કારણે ખેડૂતોને સમયસર ખાતર મળી રહ્યું નથી. બોડેલી તાલુકાના ચલામલી ગામે ખાતર મેળવવા માટે ખેડૂતો વહેલી સવારથી અને રાતથી જ ઉજાગરા વેઠીને લાંબી લાઈનોમાં ઊભા રહેવા મજબૂર બન્યા છે, છતાં તેમને ખાલી હાથે પરત ફરવું પડી રહ્યું છે.
સર્વર ડાઉન અને OTP ની સમસ્યા નડી
ખેડૂતોના જણાવ્યા અનુસાર, ખાતર વિતરણ કેન્દ્રો પર સિસ્ટમનું સર્વર વારંવાર ડાઉન થઈ રહ્યું છે. ઓનલાઈન પ્રક્રિયા હેઠળ ખાતર મેળવવા માટે મોબાઈલ પર આવતો વન ટાઈમ પાસવર્ડ (OTP) સમયસર ન મળવાના કારણે આખી વિતરણ વ્યવસ્થા ખોરવાઈ ગઈ છે. આ ટેકનિકલ ખામીના લીધે કલાકો સુધી લાઈનમાં ઊભા રહ્યા પછી પણ ખેડૂતોને ખાતરનો એક કટ્ટો પણ નસીબ થતો નથી..
આ પણ વાંચો : તાપી-નર્મદામાં રેડ એલર્ટ, 6 જિલ્લામાં ભારે વરસાદની આગાહી, બે કલાકમાં 5 તાલુકામાં ધડબડાટી
ચાર-ચાર દિવસથી ધર્મના ધક્કા
બોડેલી તાલુકામાં મોટાભાગના ખેડૂતો કપાસની ખેતી પર નિર્ભર છે. ચોમાસુ માથે છે અને જો કપાસના છોડને યોગ્ય સમયે ખાતર ન આપવામાં આવે તો આખા વર્ષનો પાક નિષ્ફળ જવાની ભીતિ છે. આ ગંભીર પરિસ્થિતિ વચ્ચે વિસ્તારના સ્થાનિક ખેડૂતો છેલ્લા ચાર દિવસથી ખાતર મેળવવા માટે કેન્દ્રો પર ધર્મના ધક્કા ખાઈ રહ્યા છે. ખેડૂતોએ તંત્ર સામે આક્રોશ સાથે આક્ષેપ કર્યો છે કે, સરકાર ડિજિટલ સિસ્ટમની વાતો કરે છે પરંતુ જમીની સ્તર પર સર્વરની સમસ્યાના લીધે કપાસની ખેતી કરતા હજારો પરિવારો મુંઝવણમાં મુકાઈ ગયા છે. ખેડૂતોએ વહેલી તકે ખાતરનો પુરવઠો સરળતાથી ઉપલબ્ધ કરાવવા માંગ કરી છે.
