આ પણ વાંચો ટ્રેન્ડિંગ સમાચાર
Election Heat in Jamnagar: જામનગર મહા નગરપાલિકાની ચૂંટણીના આડે હવે ગણતરીના દિવસો બાકી છે ત્યારે પ્રચાર દરમિયાન રાજકીય પક્ષો વચ્ચે ટકરાવની ઘટનાઓ સામે આવી રહી છે. શહેરના વોર્ડ નંબર 10માં પ્રચાર દરમિયાન કોંગ્રેસના ઉમેદવારો અને ભાજપના મહિલા ઉમેદવાર વચ્ચે તીખી બોલાચાલી થતા વાતાવરણ તંગ બન્યું હતું. આ સમગ્ર ઘટનાનો વીડિયો સોશિયલ મીડિયા પર વાઈરલ થતા રાજકીય ગરમાવો વધી ગયો છે.
ભાજપના મહિલા ઉમેદવારના નિવાસસ્થાને સર્જાયો વિવાદ
મળતી માહિતી અનુસાર, વોર્ડ નંબર 10ના કોંગ્રેસના ચારેય ઉમેદવારો પોતાના સમર્થકો સાથે મત વિસ્તારમાં ડોર-ટુ-ડોર પ્રચાર કરી રહ્યા હતા. આ પ્રચાર દરમિયાન તેઓ અજાણતા કે અન્ય કોઈ કારણસર ભાજપના જ એક મહિલા ઉમેદવારના નિવાસસ્થાને પહોંચ્યા હતા અને મત માંગણી કરી હતી. હરીફ પક્ષના ઉમેદવારોને પોતાના આંગણે જોઈ મહિલા ઉમેદવારે વાંધો ઉઠાવ્યો હતો અને તેમને ત્યાંથી જઈ રહેવા જણાવ્યું હતું.
શાબ્દિક ટપાટપી અને તણાવ
મહિલા ઉમેદવાર દ્વારા પ્રતિકાર કરવામાં આવતા બંને પક્ષો વચ્ચે ઉગ્ર દલીલો શરૂ થઈ હતી. થોડી ક્ષણો માટે મામલો બિચક્યો હતો અને વાતાવરણમાં ભારે ઉત્તેજના જોવા મળી હતી. જોકે, મામલો વધુ વણસે તે પહેલાં કોંગ્રેસના ઉમેદવારો અને કાર્યકરોએ ત્યાંથી વિદાય લેવામાં જ સમજદારી દાખવી હતી.
સોશિયલ મીડિયામાં વીડિયો વાઈરલ
પ્રચાર દરમિયાન થયેલી આ ચકમકનો વીડિયો કોઈએ મોબાઈલમાં કેદ કરી સોશિયલ મીડિયા પર વહેતો કરી દીધો છે. ચૂંટણીના માહોલમાં આ વીડિયો ચર્ચાનો વિષય બન્યો છે. જોકે, આ બાબતે હજુ સુધી કોઈ પક્ષ દ્વારા પોલીસ ફરિયાદ કે સત્તાવાર નિવેદન જાહેર કરવામાં આવ્યું નથી.
ચૂંટણી જેમ જેમ નજીક આવી રહી છે તેમ તેમ પક્ષો વચ્ચેની સ્પર્ધા હવે રસ્તાઓ પર ટકરાવના રૂપે જોવા મળી રહી છે. જામનગરના નાગરિકોમાં એવી માંગ ઉઠી રહી છે કે લોકશાહીના આ પર્વમાં શાંતિ અને સૌહાર્દ જળવાઈ રહે તે માટે ચૂંટણી તંત્ર અને પોલીસ પ્રશાસન દ્વારા કડક દેખરેખ રાખવામાં આવે.
