આ પણ વાંચો ટ્રેન્ડિંગ સમાચાર
Jamnagar Gambling Raid : જામનગર જિલ્લામાં જુગારની પ્રવૃત્તિઓ સામે પોલીસ દ્વારા હાથ ધરાયેલા અભિયાન હેઠળ અલગ-અલગ વિસ્તારોમાં ચાર સ્થળે દરોડા પાડવામાં આવ્યા હતા. આ કાર્યવાહી દરમિયાન કુલ 7 શખ્સોને ઝડપી લેવામાં આવ્યા છે, જ્યારે રોકડ રકમ, ગંજીપત્તાના પાના, વર્લી મટકાના આંકડા લખેલી ચિઠ્ઠીઓ સહિતનો મુદ્દામાલ કબજે કરી જુગારધારા હેઠળ ગુના નોંધવામાં આવ્યા છે.
સૌથી પ્રથમ કાર્યવાહી કાલાવડ તાલુકાના મોટા વડાળા ગામે કરવામાં આવી હતી. સરકારી હાઈસ્કૂલ પાછળ જાહેરમાં કેટલાક શખ્સો તીનપત્તીનો જુગાર રમી રહ્યા હોવાની બાતમીના આધારે પોલીસે દરોડો પાડ્યો હતો. દરોડા દરમિયાન ઇમરાન મોહમ્મદભાઈ સિદ્દીક, બાસીત વલીમામદ,અલ્તાફ રજાકભાઈ મોગલ, અને અનવર ઇસ્માઈલભાઈ મુલતાની વગેરે ચાર શખ્સોને ઝડપી લેવામાં આવ્યા હતા. પોલીસે તેમની પાસેથી રોકડા રૂપિયા 11,370 તેમજ ગંજીપત્તાના પાના કબજે કર્યા હતા. ચારેય આરોપીઓ સામે જુગારધારાની કલમ 12 મુજબ ગુનો નોંધી કાર્યવાહી હાથ ધરવામાં આવી છે.
બીજી તરફ જામનગર શહેરના અંધાશ્રમ ફાટક પાસે સર્વેલન્સ સ્કોડે દરોડો પાડી જાહેરમાં વર્લી મટકાના આંકડા લખી પૈસાની હારજીત કરાવતા રમેશ જેઠાભાઈ સાદીયા નામના શખ્સને ઝડપી પાડ્યો હતો. પોલીસે તેની પાસેથી રોકડ રૂપિયા 500, આંકડા લખેલી ચિઠ્ઠી અને બોલપેન કબજે કરી હતી. આ કેસમાં દિનેશ મૂળજીભાઈ પરમાર નામના શખ્સને ફરાર જાહેર કરી તેની શોધખોળ શરૂ કરવામાં આવી છે.
આ ઉપરાંત રાજીવનગર કોલોની વિસ્તારમાં પણ જાહેરમાં વર્લી મટકાનો જુગાર ચલાવવામાં આવતો હોવાની માહિતીના આધારે પોલીસે કાર્યવાહી કરી હતી. દરોડા દરમિયાન દિનેશ મૂળજી પરમાર નામના શખ્સને ઝડપી તેની પાસેથી રોકડ રૂપિયા 500 અને મટકાના આંકડા લખેલી ચિઠ્ઠી કબજે કરવામાં આવી હતી.
લાલપુરના ચાર થાંભલા વિસ્તારમાં પણ પોલીસે દરોડો પાડી જાહેરમાં વર્લી મટકાનો જુગાર રમાડતા હસમુખ મગનભાઈ સાદરીયા નામના શખ્સને ઝડપી પાડ્યો હતો. પોલીસે તેની પાસેથી રોકડ રૂપિયા 350, આંકડા લખેલી કાપલી અને બોલપેન સહિતનો મુદ્દામાલ કબજે કર્યો હતો. જિલ્લામાં સતત ચાલી રહેલી જુગાર વિરોધી કાર્યવાહીના ભાગરૂપે હાથ ધરાયેલા આ ચારેય દરોડામાં કુલ 7 શખ્સો કાયદાની ઝપેટમાં આવ્યા છે. પોલીસે તમામ આરોપીઓ સામે જુગારધારા હેઠળ ગુના નોંધી વધુ તપાસ હાથ ધરી છે.
