આ પણ વાંચો ટ્રેન્ડિંગ સમાચાર
Jamnagar Municipal Corporation Election: જામનગર મહાનગરપાલિકાની ચૂંટણીમાં ભાજપ માટે અત્યંત આકર્ષક અને આશ્ચર્યજનક પરિણામો સામે આવ્યા છે. શહેરમાં ભાજપનો પ્રચંડ દબદબો જોવા મળ્યો છે અને મોટાભાગના વોર્ડમાં ‘ક્લીન સ્વીપ’ નોંધાઈ છે. કુલ 16 વોર્ડમાંથી 15 વોર્ડમાં ભાજપે સળંગ વિજય મેળવતા આ પરિણામ ઐતિહાસિક ગણાઈ રહ્યું છે. એક સમયે જાહેરમાં રકઝક કરી ચૂકેલા ધારાસભ્ય રિવાબા જાડેજા અને સાંસદ પૂનમ માડમ એકબીજાને હેતપૂર્વક ભેટી પડ્યા હતા.
સાંસદ અને શિક્ષણમંત્રી એકબીજાને ભેટી પડ્યા
મતગણતરી દરમિયાન હરિયા કોલેજ ખાતે પરિણામો જાહેર થતા જ ઉત્સાહનો માહોલ છવાઈ ગયો હતો. જામનગર જિલ્લા ભાજપના બે દિગ્ગજ મહિલા નેતાઓ સાંસદ પૂનમબેન માડમ તેમજ રાજ્યના શિક્ષણમંત્રી રિવાબા જાડેજા એકબીજાને ભેટી પડ્યા હતા અને ‘ફૂલ નહીં ચિનગારી હૈ, હમ ભારત કી નારી હૈ’, ‘જય શ્રી રામ’, ‘ભારત માતા કી જય’ જેવા ગર્જતા સૂત્રોચ્ચારો સાથે જીતનો જશ્ન મનાવ્યો હતો.
શું હતો રિવાબા અને પૂનમબેનનો વિવાદ?
મહત્વનું છે કે વર્ષ 2023ના ઓગસ્ટ મહિનામાં જામનગરમાં ભાજપના ધારાસભ્ય રિવાબા મારી માટી મારો દેશ કાર્યક્રમમાં હાજરી આપવા ગયા હતાં. ત્યાં મેયર બીનામેન અને સાંસદ પૂનમબેન માડમ સાથે તેમની રકઝક થઈ હતી. આ રકઝકનો વીડિયો પણ સોશિયલ મીડિયામાં ફરતો થઈ ગયો હતો. રિવાબાએ મીડિયાને કહ્યું હતું કે, સાંસદ પૂનમ માડમે ચપ્પલ પહેરીને શહિદોને શ્રદ્ધાંજલિ આપી અને મેં ચપ્પલ ઉતારીને આપી હતી. ત્યારે તેઓ જોરથી બોલ્યા કે આવા કાર્યક્રમોમાં પીએમ અને રાષ્ટ્રપતિ પણ ચપ્પલ નથી ઉતારતા પણ અમુક ભાન વગરના લોકો ઓવર સ્માર્ટ થાય છે. તેમની આ ટીપ્પણી મને માફક નહોતી આવી એટલે મારે મારે આત્મ સન્માનના કારણે બોલવું પડ્યું. આ તો શહીદોને સન્માન આપવાની વાત છે. આમાં પાર્ટી ઠપકો આપે કે શાબાશી આપે? મેં ચપ્પલ કાઢી એ ભૂલ કરી હતી? જેના જવાબમાં પૂનમ માડમને કહ્યું હતું કે, ‘સળગાવવા વાળા તમે જ છો એટલે હવે ઠારવાનો પ્રયાસ ન કરો’. આ દરમિયાન તત્કાલીન શહેર ભાજપ પ્રમુખ વિમલ કગથરાએ ધારાસભ્ય રિવાબા જાડેજાને સમજાવવાનો પ્રયાસ કર્યો હતો. જો કે થોડા દિવસો બાદ બંને વિવાદને શાંત કરવા જાહેરમાં એકબીજા સાથે દેખાયા હતા.
જામનગરમાં ‘ત્રણ નારી શક્તિ’નું પ્રભુત્વ
આ ચૂંટણીમાં ખાસ કરીને જામનગર જિલ્લામાં ‘ત્રણ નારી શક્તિ’નું પ્રભુત્વ સ્પષ્ટ રીતે જોવા મળ્યું. જામનગર જિલ્લાના સાંસદ પૂનમબેન માડમ, રાજ્યના શિક્ષણમંત્રી રિવાબા જાડેજા તેમજ શહેર ભાજપ અધ્યક્ષા બીનાબેન કોઠારી – આ ત્રણેય મહિલા નેતાઓએ ચૂંટણીમાં મહત્વપૂર્ણ ભૂમિકા ભજવી અને ભાજપને પ્રચંડ જીત તરફ દોરી ગયા. આ નારી શક્તિના ત્રિવેણી સંગમે જામનગર મહાનગરપાલિકામાં એવું પરિણામ આપ્યું છે કે જે સમગ્ર રાજ્યભરમાં ભારતીય જનતા પાર્ટી માટે નોંધનીય વિજય બન્યો છે. ‘ત્રણ નારી, સમગ્ર જિલ્લાના વિપક્ષો પર ભારી’ જેવા વિપક્ષ માટે આંચકાજનક પરિણામો આવ્યા છે.
માત્ર વોર્ડ નંબર 12માં જ ભાજપની હાર
એકમાત્ર લઘુમતી વિસ્તાર (વોર્ડ નંબર 12)માં કોંગ્રેસ અને આમ આદમી પાર્ટીએ 2-2 બેઠકો મેળવી છે, જ્યારે બાકીના તમામ વિસ્તારોમાં ભાજપે પ્રભુત્વ સ્થાપિત કર્યું છે. આ પરિણામો ભાજપની મજબૂત સંગઠન શક્તિ અને નેતૃત્વની અસર દર્શાવે છે.
આ પણ વાંચો: અનોખા ચહેરા: મહેસાણામાં પટ્ટાવાળો બનશે કોર્પોરેટર, બહુચરાજીમાં બંગડી વેચનારી બેનનો વિજય, બે શ્રમિક મહિલા હારી
સ્થાનિક ચૂંટણીમાં આ ઐતિહાસિક જીતથી જામનગર શહેરના રાજકીય સમીકરણોમાં મોટો ફેરફાર જોવા મળી રહ્યો છે અને ભાજપ માટે આ જીત એક મહત્વપૂર્ણ મોરચો સાબિત થઈ છે. અહીં સાચા અર્થમાં નારી શક્તિનો ત્રિવેણી સંગમ જોવા મળ્યો છે.
