આ પણ વાંચો ટ્રેન્ડિંગ સમાચાર
સચિવાલયમાં ઓળખાણ હોવાનું કહી બોખીરાના યુવકે છેતર્યા : વર્ષ 2022માં છેતરપિંડી કરી હતી, LCBએ નોટિસ પાઠવી છતાં હાજર ન રહેતાં અંતે ગુનો દાખલ
પોરબંદર, : પોરબંદર નજીકના માંડવા ગામે 23 વર્ષ સુધી સરપંચ તરીકે સેવા આપનાર આધેડની પુત્રી સહિત ચાર લોકોને તલાટી કમ મંત્રીની નોકરી અપાવવાની લાલચ આપીને રૂા.૩૭ લાખની છેતરપિંડી વર્ષ ૨૦૨૨માં થઇ હતી, જેની હવે બોખીરાના યુવાન સામે પોલીસ ફરિયાદ કરવામાં આવી છે.
માંડવા ગામના સરપંચ જગમાલભાઇ કાનાભાઇ વરૂ આ પ્રકરણમાં ફરિયાદી બન્યા છે. ફરિયાદમાં તેઓએ જણાવ્યું છે કે, તેમના જ ગામના અને હાલ પોરબંદર રહેતા નરભેશંકર મોઢા સાથે ફેક્ટરીમાં કામ કરતો હરીશ મોઢાનો દીકરો મૌલિક મોઢા ગાંધીનગર સચિવાલયમાં કામ કરતો હોઇ અને સરકારી ભરતીઓમાં નોકરી અપાવવાનું કામ કરતો હોવાનું જાણવા મળતાં તેનો સંપર્ક કર્યો હતો.
મૌલિકના પિતા બોખીરામાં રહેતા હોઇ તે ત્યાં આવ્યો ત્યારે જણાવ્યું હતું કે, તલાટીમંત્રીનો ઓર્ડર કરાવી આપવા માટે દશ-દશ લાખ આપવા પડશે. આથી સરપંચની દીકરી દેવયાની, ત્રણ ભત્રીજાઓ યશવંત, વિશાલ અને ઉદય ચારેય જણાને તલાટીમંત્રીના ભરતીના વેઇટીંગ લિસ્ટમાં નામ ઉમેરવાનું નક્કી થતાં 40 લાખ ચુકવ્યા. ચારેય યુવજનો વર્ષ 2023માં ગુજરાત ભરતી બોર્ડ દ્વારા લેવાયેલી તલાટીમંત્રીની પરીક્ષામાં ફેઇલ થયા છતાં તેને નોકરીનો ઓર્ડર મળી જ જશે તેવી હૈયાધારણા આપી હતી. તેમ છતાં નોકરી ન મળતાં અને માત્ર 3 લાખ જ પરત આપતા પ્રથમ લોકલ ક્રાઇમ બ્રાન્ચમાં અરજી કરી અને નોટીસ પાઠવી છતાં મૌલિક મોઢા હાજર ન થયો હોવાથી અંતે તેની વિરૂદ્ધ ફરિયાદ દાખલ થઇ છે.
