આ પણ વાંચો ટ્રેન્ડિંગ સમાચાર
Delhi Crime News: દેશની રાજધાની દિલ્હીમાં મહિલાઓની સુરક્ષા પર ફરી એકવાર ગંભીર સવાલો ઊભા થયા છે. કામ પરથી પરત ફરી રહેલી 30 વર્ષીય મહિલા સાથે એક ખાનગી સ્લીપર બસમાં સામૂહિક દુષ્કર્મ આચરવામાં આવ્યું હોવાની હચમચાવતી ઘટના સામે આવી છે. પોલીસે આ મામલે ત્વરિત કાર્યવાહી કરી બસના ડ્રાઈવર અને કંડક્ટરની ધરપકડ કરી લીધી છે.
સમય પૂછવા ઉભી રહી અને નરાધમોએ બસમાં ખેંચી લીધી
અહેવાલો અનુસાર, પીડિત મહિલા પીતમપુરાની ઝૂંપડપટ્ટીમાં રહે છે અને મંગોલપુરીની એક ફેક્ટરીમાં કામ કરીને પોતાનું ગુજરાન ચલાવે છે. સોમવારે રાત્રે (11મી મે) કામ પતાવીને તે પગપાળા ઘરે પરત ફરી રહી હતી. સરસ્વતી વિહારના બી-બ્લોક બસ સ્ટેન્ડ પાસે એક ખાનગી સ્લીપર બસ આવીને ઊભી રહી હતી. પીડિતાએ બસના દરવાજે ઉભેલા શખસને માત્ર સમય પૂછ્યો હતો, જેની તક ઝડપીને આરોપીઓએ તેને બળજબરીથી બસની અંદર ખેંચી લીધી હતી.
આ પણ વાંચો: NEET ખતમ કરો અને 12મા ધોરણના માર્ક્સના આધારે એડમિશન આપો, પેપર લીક મુદ્દે CM વિજયે ઊઠાવ્યા સવાલ
બે કલાક સુધી ચાલતી બસમાં અત્યાચાર
આરોપીઓએ બસનો દરવાજો અંદરથી બંધ કરી દીધો હતો અને ડ્રાઈવરને બસ હંકારી મૂકવા આદેશ આપ્યો હતો. પોલીસ તપાસમાં સામે આવ્યું છે કે, આરોપીઓ મહિલાને રાની બાગ વિસ્તારમાંથી બસમાં બેસાડીને નાંગલોઈ વિસ્તાર તરફ લઈ ગયા હતા. ચાલતી બસમાં બે નરાધમોએ મહિલા સાથે સામૂહિક દુષ્કર્મ આચર્યું હતું. આશરે બે કલાક સુધી મહિલા પર અત્યાચાર ગુજાર્યા બાદ, આરોપીઓ તેને લોહીલુહાણ હાલતમાં રસ્તા પર ફેંકીને ફરાર થઈ ગયા હતા.
પોલીસ કાર્યવાહી અને ધરપકડ
રસ્તા પર ફેંકી દેવાયેલી મહિલાએ હિંમત ભેગી કરી પોલીસનો સંપર્ક કર્યો હતો. હોસ્પિટલમાં કરાયેલી તબીબી તપાસમાં મહિલા સાથે દુષ્કર્મ થયું હોવાની પુષ્ટિ થઈ છે. દિલ્હી પોલીસે રાની બાગ પોલીસ સ્ટેશનમાં ગુનો દાખલ કરીને તપાસ હાથ ધરી હતી. ટેકનિકલ સર્વેલન્સ અને સીસીટીવીની મદદથી પોલીસે ગુનામાં વપરાયેલી બસ જપ્ત કરી છે અને બંને આરોપીઓને દબોચી લીધા છે.
પોલીસના જણાવ્યાનુસાર, પીડિત મહિલા પરિણીત છે અને તેને ત્રણ સંતાનો છે. હાલમાં તેની હાલત સ્થિર છે પરંતુ તે ભારે માનસિક આઘાતમાં છે. દિલ્હી પોલીસ આ કેસમાં કડક સજા અપાવવા માટે વધુ પુરાવા એકત્ર કરી રહી છે.
