આ પણ વાંચો ટ્રેન્ડિંગ સમાચાર
વડોદરાઃ એમ.એસ.યુનિવર્સિટીની પરફોર્મિંગ આર્ટસ ફેકલ્ટીના વિવિધ વિભાગોમાં એફવાયની બેઠકો સામે પ્રવેશ માટે ફોર્મ ઓછા ભરાયા હોવાથી એપ્ટિટયુડ ટેસ્ટ લેવાની અને પ્રવેશ માટે અરજી કરવાની તારીખો લંબાવવામાં આવી છે.
પરફોર્મિંગ આર્ટસ ફેકલ્ટીના ડીન પ્રો.અષ્ટપુત્રેએ કહ્યું હતું કે, વોકલ વિભાગની બેઠકો માટે ખાસી એવી સંખ્યામાં પ્રવેશ ફોર્મ ભરાયા છે પણ તબલાની ૨૦ બેઠકો સામે ૨૩ થી ૨૪ ફોર્મ ભરાયા છે.જ્યારે ભરત નાટયમ અને કથ્થક નૃત્યની ૧૦-૧૦ બેઠકો માટે અનુક્રમે પાંચ અને ૧૨ જેટલી જ અરજીઓ હજી સુધી મળી છે.ઈન્સ્ટ્રુમેન્ટમાં વાયોલિન અને સિતારની ૧૦-૧૦ બેઠકો છે પણ તેની સામે માંડ ૫-૫ જેટલા વિદ્યાર્થીઓએ પ્રવેશ માટે અરજી કરી છે.જ્યારે નાટય વિભાગ માટે ૨૫ જેટલી અરજીઓ આવી છે.
તેમના કહેવા અનુસાર પ્રવેશ માટે અરજી કરનાર તમામ વિદ્યાર્થીઓને આપોઆપ પ્રવેશ મળી જતો નથી.તેમનો એપ્ટિટયુટડ ટેસ્ટ લેવાનો હોય છે.જેના આધારે તેઓ પ્રવેશ માટે લાયક છે કે નહીં તે નક્કી થઈ શકે છે.જેના કારણે પ્રવેશ ફોર્મ ભરવાની તારીખ લંબાવીને ૨૪ મે કરવામાં આવી છે અને તા.૨૮ મેના રોજ એપ્ટિટયુટડ ટેસ્ટ લેવામાં આવશે.આ પહેલા તા.૧૬ થી ૧૮ મે વચ્ચે એપ્ટિટયુડ ટેસ્ટ લેવાયો હતો.બેઠકો કરતા પણ ઓછા વિદ્યાર્થીઓએ પ્રવેશ માટે અરજી કરી હોવાની સ્થિતિ ચિંતાજનક છે પણ કેટલાકનું કહેવું છે કે, જીકાસ પોર્ટલના કારણે વિદ્યાર્થીઓની અરજીઓ ઘટી ગઈ છે.
