મુંબઈ : અમેરિકી રાષ્ટ્રપતિ ડોનાલ્ડ ટ્રમ્પની ચાઈનાની બે દિવસની મુલાકાતમાં ચાઈનીઝ રાષ્ટ્રપતિ જિનપિંગ સાથે મીટિંગના પ્રાથમિક અહેવાલ પોઝિટીવ રહ્યા છતાં તાઈવાન મામલે ચાઈનાએ અમેરિકાની વચ્ચે નહીં પડવાની ચીમકી આપતાં અને બીજી તરફ ઈરાન અને કુવૈત વચ્ચે જહાજ પર હુમલાની ઘટના અને હોર્મુઝ સ્ટ્રીટમાં અટવાયેલા સંખ્યાબંધ જહાજોને મુક્ત કરવા મામલે વિરોધાભાસી અહેવાલોએ આજે વૈશ્વિક બજારોમાં સાવચેતી જોવાઈ હતી. પરંતુ ભારતમાં વડાપ્રધાન નરેન્દ્ર મોદીની ઈંધણનો વપરાશ ઘટાડવા, સોનાની ખરીદી એક વર્ષ નહીં કરવા અને વર્ક ફ્રોમ હોમ કરવાની અપીલને પોઝિટીવ પ્રતિસાદ મળી રહ્યો હોઈ આજે ફોરેન ફંડો ફરી શેરોમાં લેવાલ બન્યા હતા. ફોરેન ફંડો સાથે લોકલ ફંડો, મહારથીઓએ શેરોમાં આક્રમક તેજી કરી હતી. બેંકિંગ-ફાઈનાન્સ, હેલ્થકેર, મેટલ-માઈનીંગ, કેપિટલ ગુડઝ-પાવર, કન્ઝયુમર ડયુરેબલ્સ શેરોમાં ફંડોની મોટી ખરીદી થઈ હતી. સેન્સેક્સે ઈન્ટ્રા-ડે ૧૦૦૦ પોઈન્ટથી વધુ તેજી બતાવ્યા બાદ અંતે ૭૮૯.૭૪ પોઈન્ટ ઉછળીને ૭૫૩૯૮.૭૨ અને નિફટી ૫૦ સ્પોટ ઈન્ડેક્સ ૨૭૭ પોઈન્ટ વધીને ૨૩૬૮૯.૬૦ બંધ રહ્યા હતા.
હેલ્થકેર ઈન્ડેક્સ ૯૬૦ પોઈન્ટ ઉછળ્યો
ફાર્માસ્યુટિકલ્સ-હેલ્થકેર શેરોમાં આજે ફંડોએ આક્રમક ખરીદી કરી હતી. ભારતીય ફાર્મા કંપનીઓ દ્વારા અમેરિકામાં જંગી રોકાણ થવાના અહેવાલ અને ફાર્મા ઉદ્યોગ માટે ફરી અમેરિકામાં બિઝનેસ તકો વધવાના અહેવાલોએ ફંડોની શેરોમાં મોટી ખરીદી થઈ હતી. કોરોના રૂ.૭૭.૧૦ વધીને રૂ.૧૭૮૩.૧૫, અજન્તા ફાર્મા રૂ.૧૪૦.૧૦ વધીને રૂ.૩૨૬૨.૩૫, ઓર્ચિડ ફાર્મા રૂ.૨૪.૬૦ વધીને રૂ.૭૧૯.૭૫ રહ્યા હતા. બીએસઈ હેલ્થકેર ઈન્ડેક્સ ૯૫૯.૮૭ પોઈન્ટ ઉછળીને ૪૭૧૦૮.૨૬ બંધ રહ્યો હતો.
મેટલ ઈન્ડેક્સ ૮૮૦ ઉછળ્યો
મેટલ-માઈનીંગ શેરોમાં પણ ફંડોએ આજે અવિરત ધૂમ ખરીદી કરતાં મોટી તેજી જોવાઈ હતી. જેએસડબલ્યુ સ્ટીલ રૂ.૨૨.૨૦ વધીને રૂ.૧૨૯૭.૦૫, જિન્દાલ સ્ટીલ રૂ.૧૧.૨૦ વધીને રૂ.૧૨૫૩.૫૦, ટાટા સ્ટીલ રૂ.૧.૪૫ વધીને રૂ.૨૨૧.૫ રહ્યા હતા. બીએસઈ મેટલ ઈન્ડેક્સ ૮૮૦.૮૯ પોઈન્ટની છલાંગે ૪૪૨૬૨.૫૯ બંધ રહ્યો હતો.
બેંકિંગ-ફાઈ. શેરોમાં ફંડો લેવાલ
બેંકિંગ-ફાઈનાન્સ શેરોમાં પણ ફંડો આજે પ્રમુખ શેરોમાં લેવાલ રહ્યા હતા. એચડીએફસી બેંક રૂ.૨૦ વધીને રૂ.૭૬૯.૬૦, બેંક ઓફ બરોડા રૂ.૫.૯૫ વધીને રૂ.૨૬૭.૭૦, પીએનબી રૂ.૧.૮૦ વધીને રૂ.૧૦૪.૫૫, ઈન્ડસઈન્ડ બેંક રૂ.૧૪.૨૦ વધીને રૂ.૯૦૬.૪૫, યુનિયન બેંક રૂ.૨.૪૦ વધીને રૂ.૧૬૪.૮૦, કોટક મહિન્દ્રા બેંક રૂ.૫.૧૫ વધીને રૂ.૩૮૩.૧૫ રહ્યા હતા. બીએસઈ બેંકેક્સ ઈન્ડેક્સ ૭૪૦.૭૭ પોઈન્ટ ઉછળીને ૬૦૯૬૧.૩૨ બંધ રહ્યો હતો.
ઓટો શેરોમાં ફંડોની પસંદગીની ખરીદી
હોર્મુઝ સ્ટ્રેટ પરથી જહાજોનું વહન ઈરાને મુક્ત કર્યાના અહેવાલ અને ક્રુડ ઓઈલના આંતરરાષ્ટ્રીય ભાવ વધતાં અટકી ઘટતાં અને ઘર આંગણે પણ પેટ્રોલ, ડિઝલનો વપરાશ ઘટાડવાના પગલાંની પોઝિટીવ અસરે અને ટાટા મોટર્સના સારા પરિણામે આજે ફંડોએ ઓટોમોબાઈલ શેરોમાં સિલેક્ટિવ ખરીદી કરી હતી. મહિન્દ્રા એન્ડ મહિન્દ્રા રૂ.૬૧.૪૦ વધીને રૂ.૩૧૭૨, બજાજ ઓટો રૂ.૧૯૨.૯૦ વધીને રૂ.૧૦,૪૫૧, આઈશર મોટર્સ રૂ.૬૭.૫૦ વધીને રૂ.૭૦૩૫.૮૦ રહ્યા હતા. બીએસઈ ઓટો ઈન્ડેક્સ ૩૬૨.૮૨ પોઈન્ટ વધીને ૫૭૩૮૭.૯૧ બંધ રહ્યો હતો.
કન્ઝયુમર ડયુરેબલ્સ શેરોમાં આકર્ષણ
કન્ઝયુમર ડયુરેબલ્સ કંપનીઓના ત્રિમાસિક પરિણામોના આકર્ષણે ફંડોની આજે પસંદગીની ખરીદી જળવાઈ હતી. કલ્યાણ જવેલર્સ રૂ.૫.૭૫ વધીને રૂ.૩૬૧, ટાઈટન કંપની રૂ.૪૨.૮૦ વધીને રૂ.૪૧૩૫.૨૦ રહ્યા હતા. બીએસઈ કન્ઝયુમર ડયુરેબલ્સ ઈન્ડેક્સ ૫૩૯.૦૯ પોઈન્ટ વધીને ૫૮૨૩૮.૩૬ બંધ રહ્યો હતો.
આઈટી શેરોમાં સતત ધોવાણ
આઈટી-સોફ્ટવેર સર્વિસિઝ ઉદ્યોગના બિઝનેસને આર્ટિફિશિયલ ઈન્ટેલિજન્સના કારણે મોટો ફટકો પડી રહ્યાના અહેવાલોએ આજે આઈટી શેરોમાં સતત વેચવાલી રહી હતી. પર્સિસ્ટન્ટ રૂ.૨૦૮.૧૦ તૂટીને રૂ.૪૬૩૨.૪૫, એલટીએમ રૂ.૧૭૨.૪૫ ઘટીને રૂ.૩૯૨૨.૪૫, ઈન્ટેલેક્ટ ડિઝાઈન રૂ.૨૬.૨૦ ઘટીને રૂ.૬૯૩.૫૫ રહ્યા હતા.
સ્મોલ કેપ, મિડ કેપ શેરોમાં પ્રોફિટ બુકિંગ
સેન્સેક્સ, નિફટીમાં આજે આક્રમક તેજી સામે સ્મોલ, મિડ કેપ શેરોમાં સિલેક્ટિવ આકર્ષણ જળવાયા છતાં ઉછાળે ઘણા શેરોમાં પ્રોફિટ બુકિંગ થતાં માર્કેટબ્રેડથ ફરી નેગેટીવ બની હતી. બીએસઈમાં આજે કુલ ટ્રેડિંગ થયેલી ૪૩૮૪ સ્ક્રિપોમાંથી વધનારની સંખ્યા ૨૦૦૯અને ઘટનારની ૨૧૯૬ રહી હતી.
DIIની શેરોની રૂ.૬૮૪ કરોડની ખરીદી
ફોરેન પોર્ટફોલિયો ઈન્વેસ્ટરો-એફપીઆઈઝ, એફઆઈઆઈઝની આજે-ગુરૂવારે કેશ સેગ્મેન્ટમાં રૂ.૧૮૭.૪૬ કરોડના શેરોની ચોખ્ખી ખરીદી કરી હતી. જ્યારે સ્થાનિક સંસ્થાકીય રોકાણકારો-ડીઆઈઆઈની આજે રૂ.૬૮૪.૩૩ કરોડના શેરોની ચોખ્ખી ખરીદી રહી હતી.
રોકાણકારોની સંપતિ રૂ.૪.૫૨ લાખ કરોડ વધી
સેન્સેક્સ, નિફટીમાં આજે તોફાની તેજી સાથે એ ગુ્રપના ઘણા શેરોમાં આકર્ષણે રોકાણકારોની સંપતિ એટલે કે બીએસઈમાં લિસ્ટેડ કંપનીઓનું એક્ત્રિત માર્કેટ કેપિટલાઈઝેશન આજે એક દિવસમાં રૂ.૪.૫૨ લાખ કરોડ વધીને રૂ.૪૬૨.૮૫ લાખ કરોડ રહ્યું હતું.
