આ પણ વાંચો ટ્રેન્ડિંગ સમાચાર
Anand District Panchayat: આણંદ જિલ્લા પંચાયતમાં પ્રમુખ પદની ચૂંટણી પહેલા બહુમતી ભાજપની છતાં કોંગ્રેસ ઉમેદવાર બિનહરીફ વિજેતા થયા હોવાનું સામે આવ્યું છે. વાત એમ છે કે, ટેકનિકલ કારણોસર અને જાતિ પ્રમાણપત્ર મામલે ભાજપના ઉમેદવારનું ફોર્મ રદ થયુ છે. તેવામાં કોંગ્રેસના ઉમેદવારનો માર્ગ મોકળો થતાં તેઓ બિનહરીફ પ્રમુખ બને તે નિશ્ચિત જણાઈ રહ્યું છે, ત્યારે ભાજપના મોમાંથી કોળિયો છીનવાયોની સ્થિતિ ઉભી થઈ છે.
બહુમતી ભાજપની છતાં કોંગ્રેસ બિનહરીફ વિજેતા!
આણંદ જિલ્લા પંચાયતના પ્રમુખની ખુરશી અનુસૂચિત જનજાતિ માટે અનામત રાખવામાં આવી છે. આ માટે ભાજપે મયુરીબહેન પટેલ નામના મહિલાનું ફોર્મ ભર્યું હતું. મયુરીબહેન મૂળ મહારાષ્ટ્રના વતની છે અને તેમણે ગુજરાતમાં પટેલ જ્ઞાતિમાં લગ્ન કર્યા છે. આણંદ જિલ્લા પંચાયતમાં પ્રમુખ પદની ચૂંટણીમાં ઉમેદવારી કરતી વખતે મયુરીબહેને મહારાષ્ટ્ર સરકારનું જાતિનું પ્રમાણપત્ર રજૂ કરતાં કોંગ્રેસે વાંધો ઉઠાવ્યો હતો. સમગ્ર મામલે બંને પક્ષના વકીલો દ્વારા જિલ્લા વિકાસ અધિકારી સમક્ષ દલીલો કરી હતી.
આ પણ વાંચો: વડોદરા જિલ્લા પંચાયતની પહેલી મીટિંગ મળી, આજે 8 તાલુકા પંચાયતના પ્રમુખના નામો જાહેર થશે
આણંદ જિલ્લા પંચાયતમાં ભાજપના મોમાંથી કોળિયો છીનવાયો
ડીડીઓએ સ્પષ્ટ જણાવ્યું હતું કે, ગુજરાત સરકારના પ્રવર્તમાન નિયમોના આધિન અન્ય રાજ્યનું અનામત પ્રમાણપત્ર ગુજરાતમાં માન્ય રાખી શકાય નહીં. અંતે ભાજપના મહિલા ઉમેદવારનું ફોર્મ રદ કરવામાં આવ્યું હતું.
ઉલ્લેખનીય છે કે, 40 સભ્યોની આણંદ જિલ્લા પંચાયતમાં ભાજપ પાસે 33 બેઠકોની બહુમતી હોવા છતાં પ્રમુખમાં કોંગ્રેસના ઉમેદવાર ગૌરીબહેન તડવી બિનહરીફ વિજેતા જાહેર થશે. જ્યારે કોંગ્રેસ પાસે 7 બેઠકો છે.
