Ahmedabad News: અમદાવાદ ગ્રામ્ય જિલ્લામાં યુવાધનને નશાના રવાડે ચડતું અટકાવવા અને માદક પદાર્થોની બદીને નેસ્તનાબૂદ કરવા માટે પોલીસ એક્શન મોડમાં છે. અમદાવાદ ગ્રામ્યના સ્પેશ્યલ ઓપરેશન ગ્રુપ (SOG) અને કેરાળા GIDC પોલીસ સ્ટેશનની ટીમે એક સંયુક્ત ઓપરેશન હાથ ધરીને બાવળા તાલુકાના ચિયાડા ગામેથી નશાકારક કોડેઇન યુક્ત કફ સિરપના મોટા જથ્થા સાથે ત્રણ શખ્સોને ઝડપી પાડ્યા છે. આ નેટવર્ક સાથે જોડાયેલી અમદાવાદના જુહાપુરાની એક મહિલાને વોન્ટેડ જાહેર કરવામાં આવી છે.
ગુપ્ત બાતમીના આધારે દરોડા
પોલીસ પ્રશાસનની ટીમો પેટ્રોલિંગમાં હતી તે દરમિયાન SOG શાખાને ખાનગી રાહે ચોક્કસ બાતમી મળી હતી કે, ચિયાડા ગામે નશાકારક કફ સિરપનો જથ્થો છુપાવવામાં આવ્યો છે. આ બાતમીના આધારે SOG અને કેરાળા GIDC પોલીસે સરકારી પંચોને સાથે રાખીને ચિયાડા ગામે દરોડો પાડ્યો હતો.
આ પણ વાંચો : 6 વર્ષ સુધી પતિ કોમામાં રહ્યો અને 25 વર્ષે મળ્યો ન્યાય; ગુજરાત હાઈકોર્ટે વીમા કંપનીને લગાવી ફટકાર, પરિવારને બમણું વળતર
શું જપ્ત કરાયું?
પોલીસે ઘટનાસ્થળેથી REXCRON-T કફ સિરપની કુલ 153 બોટલો (કિંમત 24,235 રૂપિયા) અને આરોપીઓ પાસેથી 10,000 રૂપિયાની કિંમતના 2 નંગ મોબાઇલ ફોન મળીને કુલ 34,235 રૂપિયાનો મુદ્દામાલ જપ્ત કર્યો છે.
3 આરોપીઓની ધરપકડ
પોલીસ દરોડા દરમિયાન ઘટનાસ્થળેથી ત્રણ આરોપીઓને દબોચી લેવામાં આવ્યા છે.
મગનભાઇ ઉર્ફે સુનીલ નવઘણભાઇ પટણી (રહે. ચિયાડા ગામ, વાલ્મિકી વાસ, તા. બાવળા)
રાકેશભાઇ ઉર્ફે ટારઝન નવઘણભાઇ પટણી (ઉં.વ. 22, રહે. ચિયાડા ગામ, વાલ્મિકી વાસ, તા. બાવળા)
પિયુષભાઇ ઉર્ફે જીગો પોપટભાઇ ચૌહાણ (ઉં.વ. 31, રહે. ચિયાડા ગામ, વણકર વાસ, તા. બાવળા)
જુહાપુરાની મહિલા સપ્લાયર વોન્ટેડ
પોલીસ તપાસમાં સામે આવ્યું છે કે, આ નશાકારક સિરપના નેટવર્ક સાથે અમદાવાદના જુહાપુરા વિસ્તારની રહેવાસી આશીયાના યુનુસ ઘાંચી નામની મહિલા જોડાયેલી છે. પોલીસે તેને વોન્ટેડ જાહેર કરીને પકડવા માટે ચક્રો ગતિમાન કર્યા છે. પકડાયેલા તમામ આરોપીઓ વિરૂદ્ધ કેરાળા GIDC પોલીસ સ્ટેશનમાં એન.ડી.પી.એસ. (NDPS) એક્ટની કલમ- 8(C), 21(C), 29 મુજબ ગુનો નોંધીને કાયદેસરની કાર્યવાહી હાથ ધરવામાં આવી છે અને આ નશાનો કાળો કારોબાર ક્યાં સુધી ફેલાયેલો છે તે દિશામાં આગળની તપાસ શરૂ કરાઈ છે.
