આ પણ વાંચો ટ્રેન્ડિંગ સમાચાર
Bengaluru Drug Bust: કર્ણાટકની રાજધાની અને આઈટી હબ ગણાતા બેંગલુરુમાં પોલીસે ડ્રગ્સ નેટવર્કનો પર્દાફાશ કર્યો છે. શહેરના વિવિધ વિસ્તારોમાં હાથ ધરવામાં આવેલા સંયુક્ત ઓપરેશનમાં પોલીસે 16 ડ્રગ પેડલર્સની ધરપકડ કરી છે અને તેમની પાસેથી આંતરરાષ્ટ્રીય બજારમાં અંદાજે રૂ.36.67 કરોડની કિંમતનું માદક દ્રવ્યોનું નેટવર્ક તોડી પાડ્યું છે. પકડાયેલા શખસોમાં વિદેશી નાગરિકોનો પણ સમાવેશ થાય છે, જે આ રેકેટના આંતરરાષ્ટ્રીય છેડા તરફ ઈશારો કરે છે.
4 વિદેશી અને 8 પરપ્રાંતીય શખસોની ધરપકડ
સેન્ટ્રલ ક્રાઈમ બ્રાન્ચ(CCB) અને સ્થાનિક પોલીસ ટીમોએ આ દરોડા પાડ્યા હતા. પકડાયેલા 16 આરોપીઓ પૈકી 4 વિદેશી નાગરિકો છે, જ્યારે 8 આરોપીઓ અન્ય રાજ્યોના અને 4 સ્થાનિક રહેવાસીઓ છે. આ ટોળકી વિદેશ અને અન્ય રાજ્યોમાંથી સસ્તા ભાવે ડ્રગ્સ મંગાવી બેંગલુરુના યુવાનો અને કોલેજિયનોને મોંઘા ભાવે વેચતી હતી.
શું શું જપ્ત કરાયું? (કુલ કિંમત 36.67 કરોડ)
દરોડા દરમિયાન પોલીસે જપ્ત કરેલા ડ્રગ્સની વિગતો નીચે મુજબ છે:
MDMA: 9.64 કિલોગ્રામ
LSD સ્ટ્રીપ્સ: 19,755 નંગ
હાઈડ્રો ગાંજો: 5.195 કિલોગ્રામ
હેરોઈન: 156 ગ્રામ
કોકેઈન: 332 ગ્રામ
અન્ય: ચરસ, ગંજી, અને ડ્રગ-ઇન્ફ્યુઝ્ડ ગમીઝ (નશીલી ચોકલેટ)
વિદ્યાર્થીઓ અને યુવાનો હતા સોફ્ટ ટાર્ગેટ
પ્રાથમિક પૂછપરછમાં જાણવા મળ્યું છે કે, આ નેટવર્ક ખાસ કરીને કોલેજના વિદ્યાર્થીઓ અને સામાન્ય જનતાને નિશાન બનાવીને ઝડપથી ગેરકાયદે નફો કમાવવા માટે સક્રિય હતું. પકડાયેલા તમામ આરોપીઓ વિરુદ્ધ NDPS એક્ટ હેઠળ ગુનો દાખલ કરવામાં આવ્યો છે અને કોર્ટે તેમને જ્યુડિશિયલ કસ્ટડીમાં મોકલી આપ્યા છે.
આ પણ વાંચો: Exit Poll 2026 Live: પશ્ચિમ બંગાળમાં BJP-TMC વચ્ચે કાંટે કી ટક્કર, એક્ઝિટ પોલમાં જુઓ કોને કેટલી બેઠકો?
કર્ણાટક સરકારે સ્પષ્ટ કર્યું છે કે, ડ્રગ્સના વેપાર સામે ‘ઝીરો ટોલરન્સ’ની નીતિ અપનાવવામાં આવશે. પોલીસ હવે આ ડ્રગ્સનો પુરવઠો ક્યાંથી આવતો હતો અને તેના મુખ્ય હેન્ડલર્સ કોણ છે તે દિશામાં તપાસ કરી રહી છે. બેંગલુરુ પોલીસે જનતાને પણ અપીલ કરી છે કે જો કોઈને પણ ડ્રગ્સ વિશે માહિતી હોય તો હેલ્પલાઈન નંબર 112 અથવા 1922 પર ગુપ્ત રીતે જાણ કરે.
