આ પણ વાંચો ટ્રેન્ડિંગ સમાચાર
જૂનાગઢ જિલ્લામાં અનેકને છેલ્લે દિવસે સીધા મેન્ડેટ અપાવા સંભવ : નારાજ દાવેદારોને કોઈ મોકો ન મળે તેવી રણનીતિ ઘડાઈ : કેટલાંકનું પોતાના આકાઓ મારફત લોબીંગ છતાં સત્તાવાર જવાબ ન મળ્યો
જૂનાગઢ, : જૂનાગઢ જિલ્લામાં સ્થાનિક સ્વરાજ્યની ચૂંટણીમાં ભાજપ દ્વારા સત્તાવાર ઉમેદવારોની જાહેરાત કરવામાં આવશે નહી તેવી સંભાવના છે. જો ઉમેદવારોના નામ જાહેર થાય તો કેટલાક કિસ્સાઓમાં ભડકો થાય તેવી સ્થિતિને ધ્યાને રાખી આ નિર્ણય લેવાયો હોવાની ચર્ચાઓ ચાલી રહી છે. તાલુકા- જિલ્લા પંચાયતના અમુક દાવેદારોને ફોર્મ ભરીને તૈયાર રાખવા સૂચના આપવામાં આવી છે પણ મેન્ડેટ છેલ્લે દિવસે એટલે કે શનિવારે રજૂ કરી સત્તાવાર ઉમેદવાર નક્કી કરાશે.
ભાજપના કેટલાય આગેવાનોની ટિકીટ કપાય તેવી રણનીતિ નક્કી થઈ રહી છે. જો ભાજપ ઉમેદવારોના નામ જાહેર કરે તો નારાજ આગેવાનો કંઈક અલગ નિર્ણય લે તો ભાજપની શિસ્તના ધજાગરા ઉડે તેવી ભીતિ છે એટલે કે કોઈને અન્ય પક્ષમાં કે કંઈક નવું કરવાનો મોકો મળે નહી તેવી રીતે ફોર્મ ભરાવવાની ડિઝાઈન તૈયાર કરવામાં આવી છે. ભાજપના સત્તાવાર સૂત્રોની વાત માનીએ તો તાલુકા-જિલ્લા પંચાયતની ચૂંટણી લડવા માંગતા દાવેદારો સત્તાવાર નામ જાહેર થાય તેની આતુરતાથી રાહ જોઈ રહ્યા છે પરંતુ ભાજપે જૂનાગઢ જિલ્લામાં અંદરખાને ઉમેદવારોના નામ જાહેર ન કરવાનો નિર્ણય લીધો છે. જે સક્ષમ દાવેદારો છે તેને ફોર્મ ભરીને તૈયાર રાખવા સૂચના આપવામાં આવી છે. તાલુકા પંચાયતના ઉમેદવારો આવતીકાલે ઉમેદવારીપત્ર રજુ કરે તેવી શક્યતા છે. જ્યારે જિલ્લા પંચાયતના દાવેદારો ફોર્મ ભરીને તૈયાર બેઠા છે પણ તેને શનિવારે ફોર્મ રજૂ કરવા સૂચના અપાઈ છે.
અંતિમ ઘડીએ જેને ઉમેદવાર જાહેર કરવા હશે તેના નામનું મેન્ડેટ રજૂ કરી દેવામાં આવશે. બાકીના દાવેદારો ભરેલું ફોર્મ અમાન્ય ઠરે તેવી શક્યતાઓ છે. ટિકિટ વાચ્છુકો પોતાના આકાઓ મારફત લોબીંગ કરાવી રહ્યા છે પણ હજુ સુધી કોઈને સત્તાવાર જવાબ મળતો નથી જેના લીધે દાવેદારોના જીવ ઉચ્ચક બન્યા છે.
