આ પણ વાંચો ટ્રેન્ડિંગ સમાચાર
– ભાજપને ખોબલે ખોબલે મત આપનારી પ્રજાને ‘શિરપાવ’ !
– 19 કિલોના કોમર્શિયલ એલપીજી સિલિન્ડરનો ભાવ ત્રણ હજાર : પાંચ કિલોવાળા સિલિન્ડરમાં પણ રૂ. 261નો વધારો, નવો ભાવ 800ને પાર
– આંતરરાષ્ટ્રીય એટીએફના ભાવમાં 76.55 ડોલરનો વધારો થતા લાંબા અંતરની ફ્લાઇટોના ભાડા વધી શકે
– જથ્થાબંધ ડીઝલના ભાવમાં લીટરે રૂ. 12નો વધારો નવો ભાવ રૂ. 149એ પહોંચતા ઉદ્યોગોને ફટકો પડશે
નવી દિલ્હી : પશ્ચિમ બંગાળ, આસામ સહિત પાંચ રાજ્યોમાં વિધાનસભાની અને ગુજરાતમાં સ્થાનિક સ્વરાજ્યની ચૂંટણીઓ પૂર્ણ થતા જ કેન્દ્ર સરકારે મોંઘવારીનો વધુ એક ઝટકો આપ્યો છે. ૧૯ કિલોવાળા કોમર્શિયલ એલપીજી સિલિન્ડરોની કિંમતમાં ૯૯૩ રૂપિયાનો વધારો ઝિક્યો છે, જે એલપીજીમાં અત્યાર સુધીનો એક સાથે થયેલો સૌથી મોટો ભાવ વધારો માનવામાં આવે છે. આ ભાવ વધારા સાથે જ દિલ્હીમાં કોમર્શિયલ એલપીજી સિલિન્ડરનો ભાવ ત્રણ હજાર રૂપિયાને પાર જતો રહ્યો છે.
અચાનક જ કરવામાં આવેલા આ ભાવ વધારાને પગલે ફૂડ ઇન્ડસ્ટ્રી જેમ કે હોટેલ, રેસ્ટોરાં, નાના મોટા ખાણી પીણીના સ્ટોલ સહિતના ક્ષેત્રોને મોટો ફટકો પડયો છે. આ ઉપરાંત કેટલાક ઉદ્યોગોમાં પણ એલપીજી સિલિન્ડરોનો ઉપયોગ થતો હોય છે તેઓ પણ ચિંતામાં મુકાયા છે. જે ભાવ વધારો કરવામાં આવ્યો તેનાથી હોટેલ-રેસ્ટોરાંમાં ભોજન મોંઘુ થઇ જશે, એક સાથે તોતિંગ ૯૯૩ રૂપિયાના વધારાને પગલે દિલ્હીમાં કોમર્શિયલ એલપીજી સિલિન્ડર હવે ૩૦૭૧ રૂપિયામાં મળી રહ્યો છે. જેનો ભાવ અગાઉ ૨૦૭૮ રૂપિયા હતો.
આ સાથે જ નાનો પાંચ કિલોનો કોમર્શિયલ એલપીજી સિલિન્ડર પણ ૨૬૧ રૂપિયા મોંઘો કરી દેવાયો છે, આ નાના સિલિન્ડરનો ઉપયોગ સામાન્ય રીતે મજૂરો, ગરીબ પરિવારો, એકલા રહેતા વિદ્યાર્થીઓ, લારી પર ખાદ્ય સામગ્રી વેચનારા નાના વેપારીઓ કરતા હોય છે. ભાવ વધારાને પગલે હવે પાંચ કિલોના કોમર્શિયલ સિલિન્ડરનો ભાવ પણ ૮૧૦ રૂપિયાને પાર જતો રહ્યો છે. જ્યારે હવે પાંચ કિલો કોમર્શિયલ એલપીજી સિલિન્ડર અને ઘરેલુ વપરાશ માટેના ૧૪ કિલોના સિલિન્ડરના ભાવમાં માત્ર ૧૦૦ રૂપિયાનું જ અંતર રહી ગયું છે. નવા ભાવ વધારા સાથે જ ૧૯ કિલોના કોમર્શિયલ એલપીજી સિલિન્ડરનો ભાવ દિલ્હીમાં રૂ. ૩૦૭૧, મુંબઇમાં ૩૦૨૪, હૈદરાબાદમાં ૩૩૧૫, પટણામાં ૩૩૪૬ થઇ ગયો છે.
કોમર્શિયલ એલપીજી સિલિન્ડરના ભાવમાં માર્ચ મહિનામાં ૧૪૪, ૧ એપ્રીલના ૨૦૦ રૂપિયાનો વધારો કરવામાં આવ્યો હતો. હવે સીધા ૯૯૩ રૂપિયાના વધારા સાથે માત્ર બે જ મહિનામાં અધધ ૧૩૩૭ રૂપિયાનો વધારો કરવામાં આવ્યો છે. માત્ર કોમર્શિયલ એલપીજી જ નહીં બલ્કમાં વેચાતા ડીઝલનો ભાવ પણ વધારવામાં આવ્યો છે, બલ્ક ડીઝલનો જુનો ભાવ પ્રતિ લિટર ૧૩૭ રૂપિયા હતો જે હવે વધીને ૧૪૯ રૂપિયાએ પહોંચી ગયો છે. જ્યારે વિમાનમાં વપરાતા ઇંધણ એટીએફ પર નજર કરીએ તો ઘરેલુ સ્તરે કોઇ ફેરફાર નથી પરંતુ આંતરરાષ્ટ્રીય સ્તરે પ્રતિ કિલોલીટરનો ભાવ ૧૪૩૫.૩૧ ડોલરથી વધારીને ૧૫૧૧.૮૬ ડોલર કરવામાં આવ્યો છે, એટલે કે આશરે ૭૬.૫૫ ડોલરનો વધારો કરવામાં આવ્યો છે.
કંપનીઓ-સરકાર બોજ સરભર કરવાની તૈયારીમાં
ટૂંક સમયમાં પેટ્રોલ-ડીઝલ અને ઘરેલું એલપીજીનો ભાવ વધવાની શક્યતા
– પેટ્રોલ-ડીઝલમાં રૂ. પાંચ જ્યારે ઘરેલું એલપીજી સિલિન્ડરમાં રૂ. 50 વધવાની અટકળો
નવી દિલ્હી : કેન્દ્ર સરકારે કોમર્શિયલ એલપીજી સિલિન્ડરોના ભાવમાં તોતિંગ વધારો કર્યો છે તેથી હવે ઘરેલુ વપરાશ માટેના એલપીજીના ભાવમાં પણ ટૂંક સમયમાં રૂ. ૪૦થી ૫૦નો વધારો થઇ શકે છે. એટલુ જ નહીં પેટ્રોલ અને ડીઝલ પણ ચારથી પાંચ રૂપિયા મોંઘા થવાની પુરી શક્યતાઓ છે. અમેરિકા અને ઇરાન વચ્ચે તંગદીલીને પગલે હોર્મુઝ ખાડીમાં ભારે તકરાર જોવા મળી રહી છે. તેની અસર હવે ભારત સહિતના દેશો પર થઇ રહી છે. એવામાં ક્રૂડ ઓઇલના ટેન્કરો અટવાતા આંતરરાષ્ટ્રીય સ્તરે ભાવ વધારો થઇ રહ્યો છે તેની અસર સ્થાનિક સ્તરે પડશે. સરકાર હાલ પશ્ચિમ એશિયા પર નજર રાખી રહી છે.
સરકારી સુત્રોએ જણાવ્યું હતું કે આગામી પાંચથી સાત દિવસમાં જ પેટ્રોલ અને ડીઝલના ભાવમાં વધારો કરવામાં આવી શકે છે. જ્યારે ઘરેલુ વપરાશ માટેના એલપીજી સિલિન્ડરનો ભાવ પણ વધવાની પુરી શક્યતાઓ છે. દિલ્હીમાં હાલ પેટ્રોલનો ભાવ પ્રતિ લિટરે રૂ. ૯૪.૭૭ જ્યારે ડીઝલનો ભાવ ૮૭.૬૭ રૂપિયા છે. મુંબઇમાં પેટ્રોલનો ભાવ ૧૦૩ રૂપિયાથી પણ વધુ છે. રસોઇ ગેસનો ભાવ દિલ્હીમાં ૯૧૩ રૂપિયા જ્યારે મુંબઇમાં ૯૧૨ રૂપિયા છે. તેથી જો ૫૦ રૂપિયાનો વધારો થાય તો દિલ્હીમાં ભાવ ૯૬૦ને પાર જઇ શકે છે.
