આ પણ વાંચો ટ્રેન્ડિંગ સમાચાર
Bhavnagar News: ભાવનગર જિલ્લાના મહુવા શહેરમાં આજે એક ભયાનક દુર્ઘટના સર્જાઈ છે. મહુવા શહેરના લાતીબજાર વિસ્તારમાં ગેસ સિલિન્ડર ફાટવાને કારણે જોરદાર વિસ્ફોટ થયો હતો. આ દુર્ઘટનામાં 3 વ્યક્તિઓ ગંભીર રીતે દાઝી જતાં તેમને તાત્કાલિક સારવાર અર્થે હોસ્પિટલ ખસેડવામાં આવ્યા છે. વિસ્ફોટ એટલો શક્તિશાળી હતો કે આસપાસના ત્રણ મકાનોને મોટું નુકસાન પહોંચ્યું છે.
પ્રાપ્ત માહિતી અનુસાર, મહુવાના લાતીબજારમાં આવેલા એક રહેણાંક મકાનમાં વહેલી સવારે ગેસ લીકેજને કારણે અચાનક સિલિન્ડર બ્લાસ્ટ થયો હતો. વિસ્ફોટનો અવાજ એટલો ભીષણ હતો કે આખો વિસ્તાર ધ્રૂજી ઉઠ્યો હતો અને સ્થાનિક લોકોમાં દોડધામ મચી હતી.
ઘરમાં હાજર 3 લોકો ગંભીર રીતે ઈજાગ્રસ્ત થયા હતા. સ્થાનિકોએ તાત્કાલિક એમ્બ્યુલન્સ બોલાવી તેમને હોસ્પિટલ પહોંચાડ્યા હતા. વિસ્ફોટની તીવ્રતાને કારણે આજુબાજુના મકાનની દીવાલો અને છતને નુકસાન થયું છે. પાડોશમાં આવેલા અન્ય બે મકાનોમાં પણ તિરાડો અને નુકસાનના અહેવાલ છે.
ઘટનાની જાણ થતાં જ મહુવા ફાયર ફાઈટરની ટીમ ઘટનાસ્થળે દોડી ગઈ હતી અને આગ પર કાબૂ મેળવ્યો હતો. પ્રાથમિક તપાસમાં ગેસ લીકેજ જ બ્લાસ્ટનું મુખ્ય કારણ હોવાનું સામે આવ્યું છે. હાલ પોલીસ અને વહીવટી તંત્ર દ્વારા ઘટનાસ્થળે પહોંચીને વધુ તપાસ હાથ ધરવામાં આવી છે.
