આ પણ વાંચો ટ્રેન્ડિંગ સમાચાર
– અજાણ્યા શખ્સે પૈસા ટ્રાન્સફરનો ટેક્સ મેસેજ મોકલી
– બેંક બેલેન્સ ચેક કર્યા વગર પૈસા ટ્રાન્સફર કરવા ભારે પડયાં : નડિયાદ ગ્રામ્ય પોલીસે ગુનો નોંધ્યો
નડિયાદ : નડિયાદ તાલુકાના મરીડામાં રહેતા શખ્સને અજાણ્યા મોબાઈલ ધારકે તમારા ખાતામાં પૈસા ટ્રાન્સફર કર્યા છે, તેમ કહી મોબાઈલમાં ખોટો ટેક્સ મેસેજ મોકલી રૂ.૪૫,૫૦૦ ગુગલ પે કરાવી છેતરપિંડી કરી હતી. આ બનાવ અંગે નડિયાદ ગ્રામ્ય પોલીસે ગુનો નોંધી વધુ કાર્યવાહી હાથ ધરી હતી.
નડિયાદ તાલુકાના મરીડા ગામમાં મોટી ખડકી પરબડી પાસે રહેતા પરેશભાઈ મણીભાઈ પટેલ તા.૧૨-૨-૨૬ના રોજ પોતાના ઘરે હતા. ત્યારે સાંજના સમયે તેમના મોબાઈલ પર હિન્દી ભાષામાં વાત કરતો ફોન આવ્યો હતો. જેમાં પરેશભાઈ પટેલને તેઓ એલિકોન કંપનીમાં નોકરી કરતા હતા ત્યારે હિન્દી ભાસી મિત્રો હોવાથી કોઈ મિત્રએ ફોન કર્યો છે તેમ સમજ્યા હતા અને સામા વાળાએ મારે ડૉક્ટરને તાત્કાલિક રૂ.૪૫,૫૦૦ ગુગલ પે કરવાના છે, પરંતુ મારાથી થતા નથી હું તમારા ખાતામાં પૈસા ટ્રાન્સફર કરું છું અને તેનો મેસેજ મોકલું છું તમે આ નંબર પર ગુગલ પે કરી આપો તેમ કહી ફોન કરી દીધો હતો. જેથી પરેશભાઈ પટેલે તેમના મોબાઈલ પર આવેલ પૈસા ટ્રાન્સફર થયાનો ટેક્સ મેસેજ જોઈ ખાતરી કર્યા વગર રૂ.૪૫,૫૦૦ ગુગલ પેથી ઓનલાઇન ટ્રાન્સફર કરી દીધા હતા. ત્યારબાદ બીજા દિવસે બેંક બેલેન્સ જોતા તેમના ખાતામાં કોઈ રકમ જમા થઈ ન હતી. આમ અજાણ્યા મોબાઈલ ધારકે ખોટો ટેક્સ મેસેજ કરી રૂ.૪૫,૫૦૦ ગુગલ પે કરાવી ઓનલાઈન ફ્રોડ કર્યું હતું. આ બનાવ અંગે પરેશભાઈ મણીભાઈ પટેલની ફરિયાદ આધારે નડિયાદ ગ્રામ્ય પોલીસે સાયબર ક્રાઇમનો ગુનો નોંધી વધુ કાર્યવાહી હાથ ધરી હતી
