દેશના તમામ રાજ્યોમાં સપ્તાહ દરમિયાન માવઠાંની આગાહી : અગનવર્ષાને બ્રેક લાગીઃ રાજ્યમાં મહત્તમ તાપમાન ઘટીને ૩૯ સે.ની નીચે,માર્ચ એન્ડીંગ સુધી હીટવેવની શક્યતા નહીવત્,રાત્રિ ગરમ રહેશે
રાજકોટ, : દેશમાં ટ્રફ સાથે સક્રિય પશ્ચિમી વિક્ષોભ સાથે તા. 17 માર્ચે ફરી એક વેસ્ટર્ન ડિસ્ટર્બન્સ ઉત્તર-પશ્ચિમ ભારતને પ્રભાવિત કરશે તેમજ અન્યત્ર ટ્રફ, સાયક્લોનિક સર્ક્યુલેશન સહિતની વરસાદી સીસ્ટમ સક્રિય થતા ગુજરાત સહિત દેશભરમાં મોસમ પલટાઈ રહી છે અને તેની અસર રૃપે અસહ્ય-અસામાન્ય અગનવર્ષાને બ્રેક લાગી છે. 36 રાજ્યો અને કેન્દ્રશાસિત પ્રદેશો સહિત દેશભરમાં તા. 20 માર્ચ સુધીના સપ્તાહમાં હળવાથી ભારે માવઠાંની આગાહી કરાઈ છે જેમાં ગુજરાતમાં તા. 18, 19, 20 માર્ચ દરમિયાન ગાજવીજ અને તીવ્ર પવન સાથે માવઠાંની ચેતવણી આજે જારી કરાઈ છે.
મોસમ વિભાગ અનુસાર ગુજરાતમાં 30થી 40 કિ.મી.ની ઝડપે તીવ્ર પવુન સાથે તા. 18ના ખાસ કરીને મોરબી, દ્વારકા, જામનગર, કચ્છ, સાબરકાંઠા, બનાસકાંઠા, પાટણ વિસ્તારમાં તથા તા. 19ના રાજકોટ, અમરેલી, ભાવનગર, મોરબી, ગીર સોમનાથ, બોટાદ, કચ્છ, પાટણ,બનાસકાંઠા,સાબરકાંઠા, વડોદરા, સુરત, ભરૂચ, છોટા ઉદેપુર, નર્મદા, ડાંગ, તાપી જિલ્લા તથા દિવ પ્રદેશમાં ગાજવીજ સાથે માવઠાંની ચેતવણી જારી કરાઈ છે. જો સીસ્ટમ શક્તિશાળી બને તો વરસાદનું જોર અને સમય વધી કે ઘટી શકે તેમ છે. આગાહી-ચેતવણીની સચોટતા એક-બે દિવસ માટે અધિક રહેતી હોય છે.
દરમિયાન, આજે ગુજરાતમાં પારો વધુ 2 સે. સુધી નીચે ઉતર્યો હતો. સૌથી વધુ કંડલામાં 38.8, રાજકોટ 38.4 સે તથા અમદાવાદ, ડીસા, ગાંધીનગર, વલ્લભવિદ્યાનગર, સુરેન્દ્રનગર, સુરત, ભૂજમાં 38 સે., વડોદરા, કેશોદ જુનાગઢમાં 37 સે રહ્યું હતું. સવારનું તાપમાન પણ અમરેલી, પોરબંદર, મહુવા, કેશોદમાં 20 સે. નીચે ઉતર્યું હતું. ગુજરાત ઉપરાંત તમામ રાજ્યોમાં માવઠાંની શક્યતા છે, જેમાં પશ્ચિમ બંગાળ તેમજ પૂર્વ ભારતમાં તથા જમ્મુ કાશ્મીર, હિમાચલ પ્રદેશ, ઉત્તરાખંડમાં 50 કિ.મી. સુધીનિા તીવ્ર પવન સાથે વરસાદ,બરફવર્ષાની પણ ચેતવણી છે.
