મુંબઈ : મુંબઈ ઝવેરી બજારમાં આજે સોના-ચાંદીના ભાવ વધતા અટકી ફરી તૂટયા હતા. નવી માગ ધીમી હતી. વિશ્વ બજારના સમંચાર સોનામાં ઉછાળે ફંડોનું સેલીંગ બતાવતા હતા.
અમદાવાદ ઝવેરી બજારમાં આજે ચાંદીના ભાવ કિલોના રૂ.૫૦૦૦ તૂટી રૂ.૨૫૦૦૦૦ બોલાયા હતા. અમદાવાદ સોનાના ભાવ ૧૦ ગ્રામના ૯૯૫ના રૂ.૧૫૬૭૦૦ તથા ૯૯૯ના રૂ.૧૫૭૦૦૦ રહ્યા હતા. વિશ્વ બજારમાં સોનાના ભાવ ઔંસના ૪૮૩૧ વાળા ઘટી નીચામાં ભાવ ૪૭૩૭ થઈ ૪૮૦૪થી ૪૮૦૫ ડોલર રહ્યા હતા. વિશ્વ બજારમાં ડોલર ઈન્ડેક્સ વધતાં વૈશ્વિક સોનામાં ઉછાળે ફંડો હળવા થઈ રહ્યા હતા.
સોના પાછળ વૈશ્વિક ચાંદીના ભાવ ઔંસના ૮૦.૯૦ ડોલર વાળા ઘટી નીચામાં ભાવ ૭૮.૬૪ થઈ ૭૯.૫૦થી ૭૯.૫૧ ડોલર રહ્યા હતા. અમેરિકાએ ઈરાનના બ્લોકેડમાં ઈરાનનું જહાજ જપ્ત કરતા ઈરાન તથા અમેરિકા વચ્ચે ફરી તણાવ વધ્યાના વાવડ હતા તથા તેના પગલે શાંતિ મંત્રણા રુંધાવાની શક્યતા ઊભી થતાં વિશ્વના વિવિધ બજારોમાં આજે આ પ્રશ્ને અજંપો ફરી વધ્યાના વાવડ મળ્યા હતા.
યુદ્ધમાં સમાધાનના બદલે તણાવ વધ્યાના વાવડ હતા. વિશ્વ બજારમાં બ્રેન્ટ ક્રૂડના ભાવ વધી બેરલના ઉંચામાં ૯૭.૫૦ થઈ ૯૫.૧૩ ડોલર રહ્યા હતા. યુએસ ક્રૂડના ભાવ વધી ૯૧.૨૦ થઈ ૮૮.૨૩ ડોલર રહ્યા હતા. ચીનમાં ચાંદીની ઈમ્પોર્ટ વધી ૮ વર્ષની ટોચે પહોંચી છે. જાન્યુઆરી તથા ફેબુ્રઆરીમાં આવી આયાત વધી આશરે ૭૯૦ ટન થઈ છે. આ પૈકી એકલા ફેબુ્રઆરીમાં આવી આયાત ૪૭૦ ટન થઈ છે. ચીનમાં ચાંદીમાં રિટેલ માગ તથા સોલાર ક્ષેત્રની માગ વધી છે.
દરમિયાન, મુંબઈ બુલિયન બજારમાં આજે સોનાના ભાવ જીએસટી વગર રૂ.૫૦૦ ઘટી ૯૯૫ના રૂ.૧૫૧૪૮૭ તથા ૯૯૯ના રૂ.૧૫૨૦૯૬ રહ્યા હતા. કરન્સી બજારમાં રૂપિયો તૂટતાં તથા ડોલર ફરી વધતાં મુંબઈ ઝવેરી બજારમાં આજે સોનામાં ભાવ ઘટાડો તેટલા પ્રમાણમાં સિમિત રહ્યો હોવાનું બજારના સૂત્રોએ જણાવ્યું હતું.
દરમિયાન, મુંબઈ ચાંદીના ભાવ જીએસટી વગર રૂ.૩૩૦૦ ઘટી રૂ.૨૫૦૬૭૫ રહ્યા હતા. મુંબઈ સોના-ચાંદીમાં જીએસટી સાથેના ભાવ આ ભાવથી ૩ ટકા ઉંચા રહ્યા હતા દરમિયાન અખાત્રીજમાં ઉંચા ભાવના પગલે આ વર્ષે સોનામાં ઓછા વજનના તથા ઓછા કેેરેટના માલોમાં માગ વધુ જોવા મળી હોવાનું બજારના જાણકારોએ જણાવ્યું હતું.
ઓલ ઈન્ડિયા જ્વેલર્સ એન્ડ ગોલ્ડ સ્મિથ ફેડરેશનના જણાવ્યા મુજબ અખાત્રીજમાં દેશવ્યાપી ધોરણે સોનાનો વેપાર આશરે રૂ.૧૬ હજાર કરોડનો તથા ચાંદીનો વેપાર આશરે રૂ.૪૦૦૦ કરોડનો થયાની ગણતરી જણાઈ છે.
દરમિયાન, વિશ્વ બજારમાં પ્લેટીનમના ભાવ ઔંસના ૨૧૧૪થી ઘટી નીચામાં ભાવ ૨૦૬૮ થઈ ૨૨૦૭૫થી ૨૦૭૬ ડોલર રહ્યા હતા.પેલેડીયમના ભાવ ૧૫૬૪ વાળા નીચામાં ભાવ ૧૫૩૧ થઈ ૧૫૪૧થી ૧૫૪૨ ડોલર્રહ્યા હતા. વૈશ્વિક કોપરના ભાવ આજે ૧.૩૪ ટકા તૂટયા હતા. જો કે ક્રૂડતેલના ભાવ નીચા મથાળેથી ૫થી ૬ ટકા ઉછળ્યા હતા.
