આ પણ વાંચો ટ્રેન્ડિંગ સમાચાર
સરકારી પોલિટેકનિક ખાતે ચૂંટણી તંત્રની કામગીરી
બેલેટ અને કંટ્રોલ યુનિટનું ટેસ્ટિંગ કરીને ઉમેદવારોના નામ અને ચિન્હો મુજબ મશીનો સેટ કરાયા, ગોંડલમાં ૫૫ બુથના મશીનોનું કમિશનિંગ પૂર્ણ
રાજકોટ: ગુજરાતમાં સ્થાનિક સ્વરાજ્યની ચૂંટણીનો માહોલ અત્યારે ચરમસીમાએ છે. એક તરફ રાજકીય પક્ષો અને ઉમેદવારો મતદારોને રિઝવવા માટે એડીચોટીનું જોર લગાવી રહ્યા છે, ત્યારે બીજી તરફ ચૂંટણી તંત્ર પણ લોકશાહીના આ પર્વને નિર્વિઘ્ન પાર પાડવા માટે રાત-દિવસ એક કરી રહ્યું છે. રાજકોટ જિલ્લામાં આગામી સમયમાં યોજાનારી જિલ્લા પંચાયત, તાલુકા પંચાયત અને ગોંડલ નગરપાલિકાની સામાન્ય ચૂંટણીને લઈને વહીવટી પ્રક્રિયા તેજ બની છે. આ અંતર્ગત ગઈકાલે ઈવીએમ (ઈલેક્ટ્રોનિક વોટિંગ મશીન) કમિશનિંગની મહત્વપૂર્ણ પ્રક્રિયા સફળતાપૂર્વક પૂર્ણ કરવામાં આવી હતી.
રાજકોટમાં સરકારી પોલિટેકનિક કોલેજને ઈવીએમ કમિશનિંગનું કેન્દ્ર બનાવવામાં આવ્યું હતું. અહીં જિલ્લા પંચાયતની ૬ બેઠકો અને તાલુકા પંચાયતની ૨૧ બેઠકો માટે મશીનો તૈયાર કરવાની કામગીરી હાથ ધરવામાં આવી હતી. બે દિવસ ચાલેલી આ પ્રક્રિયામાં ચૂંટણી અધિકારી અને મદદનીશ ચૂંટણી અધિકારીના સીધા માર્ગદર્શન હેઠળ ૧૦૦ જેટલા અધિકારીઓ અને કર્મચારીઓએ સતત ફરજ બજાવી હતી. આ પ્રક્રિયા દરમિયાન બેલેટ યુનિટ અને કંટ્રોલ યુનિટનું ટેસ્ટિંગ કરી, ઉમેદવારોના નામ અને ચિન્હો મુજબ મશીનો સેટ કરવામાં આવ્યા હતા. જેમાં ૩૯૭ ઈવીએમના સીલિંગ સાથે મતદાનની આગળની પ્રક્રિયા શરૂ થશે.
ગોંડલ નગરપાલિકાની ચૂંટણીમાં પણ વહીવટી ગતિવિધિઓ તેજ જોવા મળી હતી. ગોંડલની મહારાજા ભગતસિંહજી આર્ટસ એન્ડ કોમર્સ કોલેજ ખાતે ઈવીએમ તૈયાર કરવાની કામગીરી હાથ ધરવામાં આવી હતી. ગોંડલ નગરપાલિકાના કુલ ૧૧ વોર્ડ પૈકી વોર્ડ નંબર ૧, ૬, ૯ અને ૧૧ બિનહરીફ જાહેર થયા છે, જે લોકશાહીમાં એક વિશેષ ઘટના છે. હવે બાકી રહેલા ૭ વોર્ડ (વોર્ડ નંબર ૨, ૩, ૪, ૫, ૭, ૮ અને ૧૦) માટે ચૂંટણી યોજાનાર છે. આ સાત વોર્ડના કુલ ૫૫ મતદાન મથકો માટે રિઝર્વ મશીનો સહિતના ઈવીએમ તૈયાર કરી દેવામાં આવ્યા છે.
– સંભવિત વિવાદ-આક્ષેપો ટાળવા રાજકીય પ્રતિનિધિઓની હાજરી
ચૂંટણી પ્રક્રિયા સંપૂર્ણપણે પારદર્શક રહે અને હવે ઈવીએમ સંબંધિત સંભવિત વિવાદ કે આક્ષેપો ટાળવા માટે ઈવીએમ કમિશનિંગ અને સ્ટ્રોંગ રૂમ ખોલતી વખતે વિવિધ રાજકીય પક્ષોના પ્રતિનિધિઓ તેમજ અપક્ષ ઉમેદવારોને ખાસ હાજર રાખવામાં આવ્યા હતા. તેમની સમક્ષ જ મશીનોનું ચેકિંગ અને સીલિંગ કરવામાં આવ્યું હતું. ગોંડલમાં ચૂંટણી અધિકારીની દેખરેખ હેઠળ બેલના એન્જિનિયરોએ ટેકનિકલ પાસાઓની ચકાસણી કરી હતી.
