આ પણ વાંચો ટ્રેન્ડિંગ સમાચાર
વિદેશ મોકલવાના નામે છેતરપિંડીનો વધુ એક કિસ્સો
રૂપિયા પડાવી હાથ ખંખેરી લીધા, ઉપરથી જાનથી મારી નાંખવાની ધમકી આપીઃ ચાર શખ્સો સામે ગુનો દાખલ
પોરબંદર: પોરબંદર જિલ્લામાં વિદેશ જવાની બાબતમાં છેતરપિંડી થવાના કિસ્સાઓનો સિલસિલો યથાવત્ છે, લોકો લાખો રૂપિયા ગુમાવી રહ્યા છે. આવો વધુ એક કિસ્સો પોલીસ ચોપડે નોંધાયો છે, જેમાં છાયાના યુવાનને લંડનના વિઝા કરાવી આપવાની લાલચ આપીને ૩૦ લાખ ૭૫ હજાર પડાવી લીધા બાદ વિઝા નહીં આપીને ૪ શખ્સ દ્વારા છેતરપિંડી કરવામાં આવી છે.
છાયા-રતનપર રોડ પર રહેતા અને અમદાવાદમાં સીસીટીવી કેમેરા ઈન્સ્ટોલેશનની કામગીરી કરતાં દીપક લખમણ ઓડેદરા નામના યુવાનને કેનેડા નોકરી અર્થે જવું હોવાથી એજન્ટો મારફતે પ્રોસેસ કરતો હતો તે દરમિયાન તેનો સંપર્ક સૌમિલ સોની સાથે થયો અને તેણે લંડનમાં નોકરી અપાવવા જણાવ્યું હતું. સૌમિલે વર્કવિઝાની તમામ ફી પેટે ૨૪,૫૦૦ પાઉન્ડ થશે, ૫૦ ટકા રકમ મોકલો તો વિઝાની પ્રોસેસ ચાલુ કરીએ તેમ જણાવ્યું હતું. આથી તેના ભાઈ રોનિત સોનીના મોબાઈલ પર પી.સી.સી.ની તારીખ મેળવવા રૂા.૧૫૦૦ ગૂગલ-પે કર્યા હતાં. ત્યારબાદ કન્સલ્ટીંગ ચાર્જ પેટે ૨૦૦ પાઉન્ડ, એ પછી ૫૦ ટકા ફી એટલે કે સાડા તેર લાખની વ્યવસ્થા કરી હતી.
તમામ પ્રોસેસ થઈ ગયા બાદ જ્યારે પાસપોર્ટ મળ્યા ત્યારે તેમાં વિઝાની કોઈ એન્ટ્રી કે સિક્કો મારેલો નહતો તેથી ફરીથી પ્રોસેસ કરાવાઈ પરંતુ તેમાં પણ ઠગાઈ જ થતાં અંતે હાથ ઉંચા કરી દેવાના તથા મારી નાંખવાની ધમકી આપતા યુવાને અશ્વિન સોની, રોનિત અશ્વિન સોની, સૌમિલ અશ્વિન સોની અને પાર્થ સોની સામે રૂા.૩૦,૭૫,૫૦૦ની છેતરપિંડીની ફરિયાદ નોંધાવી છે.
પત્ની, બહેન, માતા-પિતાના 15 તોલા દાગીના વેચવા પડયા
દીપકની પત્ની રેખાને પણ લંડન જવાનું નક્કી થતાં નવા વર્ષ મુજબ ફેમેલી સાથે લંડનના વિઝા મેળવવા વધારાના ૩૦૦૦ પાઉન્ડ ચૂકવવાનું કહેતા યુવાને પત્ની, બહેન વર્ષા તથા માતા-પિતાના ૧૫થી ૧૬ તોલા જેટલા દાગીના વેંચ્યા તથા હાથ ઉછીના લીધા હતાં. ઉપરાંત પોતના વિઝા માટે પહેલેથી જ જમીન પર પાકધિરાણ લોન, ખેતીની ઉપજ, પિતા અને ભાઈની જાઈન્ટ પોલિસી ઉપર લોન ઉપાડી સાડા તેર લાખની વ્યવસ્થા કરી હતી.
