– ડીજેમાં ગીત વગાડવા બાબતે બંને યુવકો વચ્ચે ઝઘડો થયો હતો
– ઝઘડાનો ખાર રાખી આરોપીએ બીજા દિવસે રબારી કોલોનીમાં રહેતા યુવકના ગળે છરીનો ઘા મારી હત્યા કરી નાખી હતી
લીંબડી : સુરેન્દ્રનગરના લીંબડીમાં લગ્ન પ્રસંગ દરમિયાન ડીજેના ગીતો વગાડવા જેવી સામાન્ય બાબતે થયેલી બોલાચાલીએ લોહિયાળ સ્વરૂપ ધારણ કર્યું હતું. અમદાવાદથી આવેલા દીપક સોલંકી નામના યુવકની છરીના ઘા ઝીંકી હત્યા કરવામાં આવતા સમગ્ર પંથકમાં ચકચાર મચી ગઈ છે.
અમદાવાદના રબારી કોલોની વિસ્તારમાં રહેતો ૨૭ વર્ષીય દીપકભાઈ સોલંકી ૨૮મી માર્ચ, શનિવારના રોજ લીંબડી ઉટડીના પુલ પાસે આવેલા ખોડિયાર નગરમાં રહેતા કૌટુંબિક મામા જયંતિભાઈ છગનભાઈ ચાવડાની મામાની દીકરીના લગ્ન પ્રસંગમાં હાજરી આપવા આવ્યો હતો. જમણવાર પતાવીને દીપક ગામમાં આંટો મારવા નીકળ્યો હતો, ત્યારે અમન ચાવડા નામના શખ્સે તેને આંતરીને ગળાના ભાગે છરીના જીવલેણ ઘા ઝીંકી દીધા હતા.
ઇજાગ્રસ્ત દીપકને તાત્કાલિક લીંબડી સિવિલ હોસ્પિટલ અને ત્યાંથી વધુ સારવાર અર્થે સુરેન્દ્રનગર મેડિકલ કોલેજ ખસેડવામાં આવ્યો હતો, પરંતુ ફરજ પરના તબીબોએ તેને મૃત જાહેર કર્યો હતો. પોલીસે આ મામલે તપાસ હાથ ધરી ગણતરીની કલાકોમાં આરોપી અમન ચાવડાની અટકાયત કરી લીધી છે. પોલીસની તપાસમાં મૃતક યુવક અને આરોપી બંને નજીકના સંબંધી હોવાનું ખુલ્યું છે. તેમજ લગ્ન દરમિયાન ડીજેમાં ગીતો વગાડવા તેમજ લેપટોપ અને મોબાઈલ ફોનના ઉપયોગ બાબતે બંને યુવકો વચ્ચે ઉગ્ર બોલાચાલી થઈ હતી. આ સામાન્ય ઝઘડાની અદાવત રાખી બીજા દિવસે જમણવારના સમયે અમન ચાવડાએ દીપક પર છરી વડે જીવલેણ હુમલો કર્યો હતો. પોલીસે આરોપીને કોર્ટમાં રજૂ કરી રિમાન્ડ મેળવવાની અને હત્યામાં વપરાયેલું હથિયાર જપ્ત કરવાની કાર્યવાહી શરૂ કરી છે.
