આ પણ વાંચો ટ્રેન્ડિંગ સમાચાર
Vadodara Accident: વડોદરાના સૌથી વ્યસ્ત ગણાતા એમ.જી. રોડ પર ગઈકાલે રાત્રે એક બેફામ બનેલા કારચાલકે અકસ્માત સર્જ્યો હતો. પૂરઝડપે આવતી કારે એક મોપેડ સવાર મહિલા સહિત અન્ય 3થી 4 વાહનોને અડફેટે લેતા ભારે અફરાતફરી મચી ગઈ હતી. આ ઘટના બાદ કાર ચાલક ફરાર થઈ ગયો હતો, જેને વડોદરા પોલીસે ગણતરીના કલાકોમાં ઝડપી પાડ્યો છે.
શું હતી સમગ્ર ઘટના?
મળતી માહિતી અનુસાર, ગઈકાલે રાત્રે જ્યારે એમ.જી. રોડ વાહન વ્યવહારથી ધમધમી રહ્યો હતો, ત્યારે એક કાર ચાલકે સ્ટીયરિંગ પરનો કાબૂ ગુમાવીને પૂરઝડપે કાર હંકારી મોપેડ સવાર મહિલાને જોરદાર ટક્કર મારી હતી. આટલેથી ન અટકતા કારે રસ્તા પર ઉભેલા અન્ય વાહનોને પણ પોતાની ઝપેટમાં લીધા હતા. સ્થાનિક લોકો કારને રોકવા માટે પાછળ દોડ્યા હતા, પરંતુ ચાલક અંધારાનો લાભ ઉઠાવી સ્થળ પરથી ભાગી છૂટવામાં સફળ રહ્યો હતો.
આ પણ વાંચો: સોનાની પાદુકા, કરોડોની નકલી નોટો ભરેલી કાર… અમદાવાદમાં ક્રાઈમ બ્રાન્ચે મહિલા સહિત 6 સુરતીને પકડ્યાં
પોલીસની ત્ત્વરિત કાર્યવાહી અને ધરપકડ
ઇજાગ્રસ્ત મહિલા દ્વારા નોંધાવવામાં આવેલી ફરિયાદના આધારે સિટી પોલીસે તાત્કાલિક તપાસના ચક્રો ગતિમાન કર્યા હતા. સીસીટીવી ફૂટેજ અને ટેકનિકલ સર્વેલન્સની મદદ લેવામાં આવી હતી. પોલીસે ગણતરીના કલાકોમાં કાર ચાલક ધ્રુવ પટેલને દબોચી લીધો હતો. પોલીસે બ્રેથ એનેલાઇઝરથી તપાસ કરતા પ્રાથમિક તબક્કે તે નશામાં હોવાનું જણાયું નહોતું, તેમ છતાં ચોક્કસ પુષ્ટિ માટે તેના બ્લડ સેમ્પલ લઈ લેબોરેટરીમાં મોકલવામાં આવ્યા છે.
કેનેડા રિટર્ન છે આરોપી
પોલીસ પૂછપરછમાં સામે આવ્યું છે કે આરોપી ધ્રુવ પટેલ અગાઉ કેનેડામાં રહેતો હતો. તે જાન્યુઆરી 2025માં જ વડોદરા પરત ફર્યો હતો. હાલમાં તે આજવા રોડ પર પોતાનું જીમ ચલાવે છે. તેના માતા-પિતા અને પરિવારના અન્ય સભ્યો હજુ પણ કેનેડામાં જ સ્થાયી થયેલા છે.
