આ પણ વાંચો ટ્રેન્ડિંગ સમાચાર
વડોદરા શહેરના શાસ્ત્રી બ્રિજ પાસે આવેલા રામબાગ સ્થળે આજે બરોડા ક્રિકેટ એસોસિએશન (BCA)ના વર્ષ 2026 થી 2029 સત્ર માટે મહત્વપૂર્ણ ચૂંટણી યોજાઈ છે. સમય મર્યાદા મુજબ સવારે 9 વાગ્યાથી મતદાનની શરૂઆત થઈ છે, જે સાંજે 6 વાગ્યા સુધી કાર્યરત રહેશે.
મતદારોમાં ખાસ્સો ઉત્સાહ જોવા મળી રહ્યો છે. ઘણા સભ્યો ઉંમરલાયક હોવાને કારણે જરૂરિયાત ધરાવતા મતદારો માટે વ્હીલચેરની વિશેષ સુવિધા ઉપલબ્ધ કરાઈ છે. પૂર્વ ક્રિકેટર નયન મંગીયા સહિતના દિગ્ગજો મતદાન માટે પહોંચી રહ્યા છે, જેને કારણે સમગ્ર વાતાવરણ ક્રિકેટમય બની ગયું છે.
આ ચૂંટણીમાં ‘રોયલ સત્યમેવ જયતે’ અને ‘રિવાઇવલ’ જૂથ વચ્ચે સીધી ટક્કર જોવા મળી રહી છે. રોયલ સત્યમેવ જયતે જૂથ તરફથી ડૉ. દર્શન બેન્કર પ્રમુખ પદના ઉમેદવાર છે, જ્યારે રિવાઇવલ જૂથ તરફથી પૂર્વ ભારતીય ક્રિકેટર કિરણ મોરે મેદાનમાં છે. બંને જૂથોના સમર્થકોમાં ભારે જુસ્સો જોવા મળી રહ્યો છે.
ચૂંટણી દરમિયાન કાયદાકીય દાવપેચ અને આક્ષેપ-પ્રતિઆક્ષેપ વચ્ચે સભ્યોને રિઝવવા વિકાસલક્ષી વિઝન અને ક્રિકેટના સર્વાંગી વિકાસના વચનો આપવામાં આવ્યા છે. પ્રમુખ, ઉપપ્રમુખ, માનદ સચિવ, ખજાનચી સહિત વિવિધ કમિટીઓના કુલ 31 પદો માટે 62 ઉમેદવારો મેદાનમાં છે. એસોસિએશનના કુલ સભ્યોનો આંકડો 2068 છે.
ચૂંટણી પૂર્વે ઉમેદવાર કિરણ મોરે, અમુલ જીકાર, અનંત ઇન્દુલકર અને અમર પેટીવાળાને અયોગ્ય જાહેર કરવા માટે ગુજરાત હાઇકોર્ટમાં અરજી દાખલ કરવામાં આવી હતી. હાઇકોર્ટે ચૂંટણી માટે લીલી ઝંડી આપી છે, પરંતુ પૂર્વ મંજૂરી વગર પરિણામ જાહેર ન કરવા આદેશ કર્યો છે. વધુ સુનાવણી 17 ફેબ્રુઆરીએ યોજાશે અને હાઇકોર્ટના આદેશ મુજબ જ મતગણતરી તથા પરિણામ જાહેર કરવાની કાર્યવાહી હાથ ધરાશે.
આ ચૂંટણી માત્ર પદ મેળવવાની હોડ નહીં, પરંતુ સંસ્થાના ભવિષ્યની દિશા નક્કી કરતી ક્ષણ સાબિત થઈ રહી છે. હવે જોવાનું રહ્યું કે 2068 સભ્યોનો મત કઈ પેનલને આશીર્વાદ આપે છે અને વડોદરા ક્રિકેટનો ભવિષ્યનો માર્ગ કઈ દિશામાં વળે છે.
