આ પણ વાંચો ટ્રેન્ડિંગ સમાચાર
અમદાવાદ : ભારતીય રિઝર્વ બેંકના તાજેતરના ડેટા અનુસાર, ૨૭ માર્ચના રોજ પૂરા થયેલા સપ્તાહમાં દેશનું વિદેશી હૂંડિયામણ અનામત ૧૦.૨૮ બિલિયન ડોલર ઘટીને ૬૮૮.૦૫ બિલિયન ડોલર થયું છે. પાછલા સપ્તાહમાં પણ ૧૧.૪૧૩ બિલિયન ડોલર નો નોંધપાત્ર ઘટાડો જોવા મળ્યો હતો. વિદેશી હૂંડિયામણ અનામતમાં સતત બીજા સપ્તાહમાં ઘટાડો થયો છે,
વિદેશી હૂંડિયામણ અનામત ૨૭ ફેબ્રુઆરીના રોજ પૂરા થયેલા સપ્તાહમાં ૭૨૮.૪૯૪ બિલિયન ડોલરના સર્વકાલીન ઉચ્ચ સ્તરે પહોંચ્યા બાદ તે ઘટી રહ્યું છે.
ડેટા અનુસાર, આ ઘટાડા માટે સૌથી મોટો ફાળો વિદેશી ચલણ સંપત્તિમાં ઘટાડો હતો, જે ૬.૬૨૨ બિલિયન ડોલર ઘટીને ૫૫૧.૦૭૨ બિલિયન ડોલર થયુ હતું. આ આંકડાઓમાં ડોલર સામે યુરો, પાઉન્ડ અને યેન જેવા અન્ય વિદેશી ચલણોમાં વધઘટનો પણ સમાવેશ થાય છે.
આ સમયગાળા દરમિયાન, દેશના સોનાના ભંડારનું મૂલ્ય પણ ૩.૬૬૬ બિલિયન ડોલર ઘટીને ૧૧૩.૫૨૧ બિલિયન ડોલર થયું હતું .જોકે, સકારાત્મક સંકેતમાં, સ્પેશિયલ ડ્રોઇંગ રાઇટ્સ ૧૭ મિલિયન ડોલર વધીને ૧૮.૬૪૯ બિલિયન ડોલર અને આંતરરાષ્ટ્રીય નાણાકીય ભંડોળ સાથે ભારતની અનામત સ્થિતિ પણ ૧૭ મિલિયન ડોલર વધીને ૪.૮૧૬ બિલિયન ડોલર થઈ હતી. એકંદરે, છેલ્લા કેટલાક અઠવાડિયામાં ભારતના વિદેશી વિનિમય અનામતમાં વધઘટ થઈ છે, જેમાં સતત નીચે તરફ દબાણ જોવા મળી રહ્યું છે.
