આ પણ વાંચો ટ્રેન્ડિંગ સમાચાર
મુંબઈ : બે મહિના પછી પણ અમેરિકા-ઈરાન યુદ્ધ સમાપ્ત થવાના સંકેત નહીં મળતા અને તાણભરી સ્થિતિ ફરી ઊભી થવાના ચિહ્નોને પગલે વિશ્વ બજારમાં સોનાચાંદીમાં નીચા મથાળેથી ભાવમાં સુધારો આવ્યો હતો. વિશ્વ બજાર પાછળ ઘરઆંગણે પણ કિંમતી ધાતુમાં ભાવ ઊંચકાયા હતા. ડોલર સામે રૂપિયો ઘટી ઓલટાઈમ નીચી સપાટીએ જોવા મળ્યો હતો. બીજી બાજુ સોનાચાંદીની આયાત પર કસ્ટમ ડયૂટીની ગણતરી માટે ટેરિફ વેલ્યુમાં સત્તાવાળા દ્વારા ઘટાડો જાહેર કરાયો છે. જો કે રૂપિયામાં નબળાઈથી આ ઘટાડાની અસર નહીંવત રહેવાની બજારના વર્તુળો જણાવી રહ્યા છે.
વિશ્વ બજારમાં સોનું પ્રતિ ઔંસ નીચામાં ૪૫૩૯ ડોલરઅને ઉપરમાં ૪૬૪૬ ડોલર થઈ મોડી સાંજે ૮૦ ડોલર ઊંચકાઈને ૪૬૨૭ ડોલર કવોટ થતું હતું. ચાંંદી ઔંસ દીઠ નીચામાં ૭૧.૧૬ ડોલર અને ઉપરમાં ૭૩.૯૦ ડોલર થઈ મોડી સાંજે ૭૩.૫૦ ડોલર મુકાતી હતી. ઈરાન સામે વધુ સખતાઈ વાપરવાના ટ્રમ્પના સંકેતે કિંમતી ધાતુમાં નીચા મથાળેથી સુધારો આવ્યો હતો. અન્ય કિંમતી ધાતુ પ્લેટિનમ પ્રતિ ઔંસ ૧૯૫૫ ડોલર જ્યારે પેલેડિયમ ૧૪૮૪ ડોલર બોલાતું હતું.
વિશ્વ બજાર પાછળ ઘરઆંગણે સોનાચાંદીમાં ભાવ ઊંચકાયા હતા. મુંબઈ ઝવેરી બજારમાં ૯૯.૯૦ દસ ગ્રામ સોનાના જીએસટી વગરના ભાવ જે બુધવારે રૂપિયા ૧,૪૭,૯૭૩ રહ્યા હતા તે ગુરુવારે રૂપિયા ૨૨૯૦ વધી રૂપિયા ૧,૫૦,૨૬૩ બંધ રહ્યા હતા. ૯૯.૫૦ના પ્રતિ દસ ગ્રામ ભાવ રૂપિયા ૧,૪૯,૬૬૧ રહ્યા હતા. જીએસટી સાથે ભાવ ત્રણ ટકા ઊંચા મુકાતા હતા.ચાંદી .૯૯૯ એક કિલોના જીએસટી વગર રૂપિયા ૨,૪૦,૩૩૧ બંધ રહ્યા હતા. જે બુધવારની સરખામણીએ રૂપિયા ૪૦૦૦ ઊંચા હતા.
અમદાવાદ ઝવેરી બજારમાં સોનુ ૯૯.૯૦ પ્રતિ દસ ગ્રામ દીઠ રૂપિયા ૨૩૦૦ વધી રૂપિયા ૧,૫૫,૦૦૦ જ્યારે ૯૯.૫૦ના દસ ગ્રામના રૂપિયા ૧,૫૪,૭૦૦ મુકાતા હતા. ચાંદી .૯૯૯ એક કિલોના ભાવ રૂપિયા ૫૦૦૦ વધી રૂપિયા ૨,૪૫,૦૦૦ મુકાતા હતા.
દરમિયાન સોનાચાંદી પર આયાત ડયૂટીની ગણતરી માટેના ટેરિફ દરમાં સત્તાવાળા દ્વારા ઘટાડો જાહેર કરવામાં આવ્યો હતો. સોનાનો ટેરિફ દર પ્રતિ દસ ગ્રામ ૧૫૪૪ ડોલર પરથી ઘટાડી ૧૪૫૬ ડોલર કરાયો છે જ્યારે ચાંદીનો ટેરિફ દર પ્રતિ કિલો ૨૫૦૯ ડોલર પરથી ઘટાડી ૨૩૬૦ ડોલર કરાયો છે.
