આ પણ વાંચો ટ્રેન્ડિંગ સમાચાર
ટેક્ષટાઈલ પેઢીના ડિરેકટર દંપતી સામે ગુનો દાખલ
2 થી 3 ટકા વળતરની લાલચ આપી આણંદપરમાં પ્લાસ્ટિકના દાણાની પેઢીના સંચાલક દંપતી, તેના સગા અને પતિના મિત્ર પાસેથી નાણા લઈ લીધા
રાજકોટ : પેડક રોડ રણછોડનગર શેરી નં.ર૯માં શ્રી સદ્દગુરૂ જયોત કોમ્પ્લેક્ષમાં રહેતા અને નવાગામ આણંદપરમાં રૈયારાજ એન્ડ કંપનીના નામે પ્લાસ્ટિકના દાણાનો પતિ સાથે વેપાર કરતા જલ્પાબેન જીતેન્દ્રભાઈ રૈયાણી (ઉ.વ.૪૮) તથા સંબંધી રાજેશભાઈ અને પતિના મિત્ર કલ્પેશભાઈને કામ્યા ટેક્ષટાઈલ્સ પ્રા. લીમીટેડ પેઢી ધરાવતા આરોપી દિવ્યેશ ધીરજલાલ સાવલીયા અને તેના પત્ની નિલમ સાવલીયાએ પેઢીમાં ઊંચા વળતર અને શેર આપવાની લાલચ આપી રૂા.૬.૧૮ કરોડની છેતરપીંડી આચરતાં બી-ડિવીઝન પોલીસ મથકમાં ફરિયાદ નોંધાઈ છે.
ફરિયાદમાં જલ્પાબેને જણાવ્યું છે કે, તેના પતિના મિત્ર તથા ઓળખીતા આરોપી દિવ્યેશ સાવલીયા (રહે. નાના મૌવા રોડ, દ્વારકેશ એપાર્ટમેન્ટ ફલેટ નં.૧૦૩)ને ર૦ર૩માં તેની ગોંડલના ગરનાળા ગામે કામ્યા ટેક્ષટાઈલ્સ પેઢીમાં રૂપિયાની જરૂરીયાત હોવાથી તેના પતિને નાણા રોકાણ કરવાની અને ર થી ૩ ટકા વળતર આપવાની વાત કરતા તેણે આરોપીને અલગ-અલગ સમયે રૂા.૩પ લાખ આપ્યા હતા. તે વખતે તેણે પોતાની કંપનીના શેર આપવાની પણ વાત કરી હતી.
આ કામ્યા ટેક્ષટાઈલ્સ પેઢીમાં આરોપી દિવ્યેશની પત્ની નિલમ પણ ડાયરેકટર છે. તેણે તેની પાસેથી ર૦ર૩ થી ર૦રપ સુધીમાં રૂા.૪પ લાખ આપયા હતા. ત્યાર બાદ આરોપી દિવ્યેશ આ રકમ પરત આપતો ન હતો. એટલું જ નહી કામ્યા ટેક્ષટાઈલ પેઢીના શેર પણ નિહ આપતા પતિએ મિત્ર રાજેશભાઈ દિનેશભાઈ લીંબાસીયાને વાત કરતા તેના કહેવાથી પણ આરોપી રૂપિયા, વળતર કે શેર આપતો ન હતો.
આ સિવાય આરોપીએ પતિના મિત્ર અલ્તાફ પાસેથી પણ રોકાણના નામે રૂા.પ કરોડ લઈ પેઢીના ૧૦ ટકાના શેર આપ્યા બાદ રૂા.૪ કરોડ પરત કર્યા ન હતા.
ઉપરાંત તેના સગા રાજેશભાઈ લીંબાસીયા પાસેથી પણ રૂા.ર,૦પ,પ૦,૦૦૦ મેળવી બાકીના રૂા. ૧,૪૩,પ૦,૦૦૦ પરત આપ્યા ન હતા. આથી આરોપી દંપતીએ ખાતામાં તથા તેના પર્સનલ ખાતામાં તેમજ રોકડથી મેળવી રકમ, વળતર અને શેર નહીં આપી છેતરપીંડી કરી હતી. આ મામલે બી-ડિવીઝન પોલીસે તપાસ હાથ ધરી છે.
