આ પણ વાંચો ટ્રેન્ડિંગ સમાચાર
રાજકોટના યુવકે સાયબર ક્રાઈમ પોલીસમાં ફરિયાદ નોંધાવી : આ જ પ્રકારે અત્યાર સુધીમાં અનેક લોકો સાથે છેતરપિંડી થઈ ચૂકી છે, છતાં નવા-નવા લોકો ભોગ બની રહ્યા છે
રાજકોટ, : રાજકોટમાં એક યુવાનને શેરની ટીપ્સ આપી અને આઈપીઓમાં રોકાણ કરાવવાના બહાને ગઠીયાઓએ રૂ. 24.50 લાખની ઠગાઈ કર્યાની ફરિયાદ સાયબર ક્રાઈમ પોલીસ મથકમાં નોંધાઈ છે. જેમાં જુદા-જુદા જે બેન્ક ખાતાઓમાં સાયબર ફ્રોડની રકમ જમા થઈ હતી તેના ધારકોને આરોપી બનાવાયા છે.
ભોગ બનનાર યુવાને નોંધાવેલી ફરિયાદમાં જણાવ્યું છે કે અજાણ્યા મોબાઈલ નંબર ધારકે તેને એક ગ્રુપમાં એડ કર્યો હતો. જેમાં શેરબજારને લગતી ટીપ્સ આપવામાં આવતી હતી. ગુ્રપના સભ્યો તેમાં પ્રોફીટના સ્ક્રીન શોટ મુકતા હતા. જેથી તેણે પણ રોકાણ કરવાનું નકકી કરી એડમીનનો સંપર્ક કરતાં તેને ડીમેટ એકાઉન્ટ ખોલી આપ્યું હતું. જેમાં તેણે શરૂઆતમાં રૂ. 6 લાખ જમા કરાવ્યા હતા. જેની સામે તેને રૂ. 8 લાખનો નફો બતાવાતો હતો.
એક દિવસ ગ્રુપમાં આઈપીઓમાં રોકાણ કરવાનો મેસેજ આવતાં તેણે રૂ. 15 લાખની અરજી કરી હતી. જે શેર તેને લાગ્યાનું જણાવાયું હતું. સાથો-સાથ એમાઉન્ટ બ્લોક થઈ ગયાનું પણ કહેવાયું હતું. એટલું જ નહીં વધુ શેર લાગ્યા છે, જે માટે રૂ. 18.50 લાખ ભરવાનું કહેવાતા તેણે ભર્યા હતા. હજૂ તેને રૂ. 8 લાખ ભરવાનું કહેવાતું હતું. તેની પાસે વધુ રકમ ન હોવાથી આ રકમ ભરી ન હતી. જેને કારણે તેને કોઈપણ પ્રકારનું વળતર કે મુડી પરત આપવામાં આવી ન હતી. આખરે તેને છેતરપીંડી થયાનો અહેસાસ થતાં સાયબર ક્રાઈમ પોલીસના હેલ્પલાઈન નંબર ઉપર સંપર્ક કર્યો હતો. જેના આધારે સાયબર ક્રાઈમ પોલીસે આજે ગુનો દાખલ કર્યો હતો.
