આ પણ વાંચો ટ્રેન્ડિંગ સમાચાર
Sabarkantha Farmers News: સાબરકાંઠા જિલ્લાના પ્રાંતિજમાં ચોમાસાની શરૂઆત સાથે જ વાવણીના સમયે ખેડૂતો માટે મોટી મુશ્કેલી ઊભી થઈ છે. અહીં ખાતર મેળવવા માટે ફરજિયાત કરવામાં આવેલી ઓનલાઈન એપ્લિકેશન ખેડૂતો માટે માથાનો દુ:ખાવો બની ગઈ છે. એપ્લિકેશનમાં વારંવાર સર્જાતી ટેકનિકલ ખામીઓ અને સર્વર ડાઉનની સમસ્યાને કારણે ખાતર વિતરણની પ્રક્રિયા સંપૂર્ણપણે ખોરવાઈ ગઈ છે. સિઝનના સમયે જ ખાતર ન મળતા અને ડેપો પર ધક્કા ખાવાનો વારો આવતા પરેશાન ખેડૂતોનો આક્રોશ ફાટી નીકળ્યો હતો અને તેમણે તંત્ર સામે દેખાવો કર્યો હતો.
એપના ચક્કરમાં વિતરણ ઠપ, કલાકોની રાહ બાદ પણ ખાતર નહીં
મળતી માહિતી અનુસાર, પ્રશાસન દ્વારા ખાતર વિતરણ વ્યવસ્થા પારદર્શક બનાવવા માટે ડિજિટલ એપ્લિકેશન ફરજિયાત કરવામાં આવી છે. પરંતુ પૂરતી તૈયારી વિના શરૂ કરાયેલી આ સિસ્ટમ હવે ખેડૂતો માટે આફત બની છે. વાવણીનો મહત્ત્વનો સમય હોવાથી મોટી સંખ્યામાં ખેડૂતો ખાતર ખરીદવા કેન્દ્રો પર પહોંચી રહ્યા છે, પરંતુ એપ્લિકેશનનું સર્વર વારંવાર ચોંટી જતું હોવાથી એન્ટ્રીઓ થઈ શકતી નથી. કલાકો સુધી લાઈનમાં ઊભા રહ્યા બાદ પણ ખાતર ન મળતા ખેડૂતોનો સમય અને બિયારણ બંને બગડી રહ્યા છે.
આ પણ વાંચો: બગોદરા-ધંધુકા હાઈવે પર ભયાનક અકસ્માત: ચાલકે સ્ટીયરિંગ પરથી કાબૂ ગુમાવતા કારે 7 ગુલાંટ મારી, એકનું મોત
ડેપો પર વહેલી સવારથી લાઈનો લગાવીને બેઠેલા ખેડૂતોની ધીરજનો અંત આવતા તેમણે કેન્દ્ર પર જ હોબાળો મચાવ્યો હતો. આક્રોશિત ખેડૂતોએ તંત્ર વિરુદ્ધ જોરદાર સૂત્રોચ્ચાર કરીને વિરોધ નોંધાવ્યો હતો. ખેડૂતોની મુખ્ય માંગ છે કે, વાવણીની સિઝન મર્યાદિત દિવસોની હોય છે, તેમાં આવી ઓનલાઈન એપ્લિકેશનની જટિલ અને ખામીયુક્ત વ્યવસ્થા તાત્કાલિક અસરથી દૂર કરવામાં આવે. ટેકનિકલ અવરોધ વિના પહેલાની જેમ જ સરળ અને મેન્યુઅલ પદ્ધતિથી સમયસર ખાતર આપવામાં આવે જેથી ખેતી બગડે નહીં.
ઉલ્લેખનીય છેકે, ચોમાસું બેસતા જ ખાતરની માંગ વધશે તેની તંત્રને અગાઉથી ખબર હોવા છતાં, સર્વર અને ડિજિટલ ઈન્ફ્રાસ્ટ્રક્ચર કેમ મજબૂત ન કરાયું તેને લઈને સ્થાનિક તંત્ર સામે અનેક સવાલો ઊભા થઈ રહ્યા છે.
