આ પણ વાંચો ટ્રેન્ડિંગ સમાચાર
વડોદરાઃ ધ ઈન્સ્ટિટયુટ ઓફ કંપની સેક્રેટરીઝ ઓફ ઈન્ડિયા દ્વારા ડિસેમ્બર મહિનામાં લેવાયેલી સીએસ ઈન્ટર અને ફાઈનલ પરીક્ષાનું પરિણામ જાહેર થયું છે.વડોદરાની વિદ્યાર્થિની વિની સપ્રેએ ફાઈનલ પરીક્ષામાં સમગ્ર દેશમાં ચોથો ક્રમ અને ધુ્રવી શાહે ઈન્ટર પરીક્ષામાં દેશમાં ૨૩મો ક્રમ પ્રાપ્ત કર્યો છે.
આજે જાહેર થયેલા પરિણામમાં વડોદરા ચેપ્ટરમાંથી પરીક્ષા આપનારા ૩૦ જેટલા વિદ્યાર્થીઓએ સીએસની ડિગ્રી મેળવી છે અને ૪૦ જેટલા વિદ્યાર્થીઓ ઈન્ટર પરીક્ષા પ્રાપ્ત કરવામાં સફળ રહ્યા છે.
પિતા ખેડૂત છે, નવ મહિના સખત મહેનત કરી હતી
એક તરફ બીબીએનો અભ્યાસ અને બીજી તરફ સીએસ પરીક્ષાની તૈયારી ચાલતી હોવાથી મારી પાસે બીજુ કશું વિચારવાનો સમય નહોતા.ઈન્ટર પાસ કર્યા બાદ બસ નવ મહિના મહેનત કરવાની છે તેવું વિચારીને તૈયારી કરી હતી.હું રોજેરોજ અભ્યાસની નોટસ બનાવતી હતી અને લખવાની પ્રેક્ટિસ રાખી હતી.બીબીએ પહેલા જ સીએસની ડિગ્રી મળી છે.
વિની સપ્રે, ફાઈનલમાં દેશમાં ચોથો અને વડોદરામાં પહેલો ક્રમ
એકાગ્રતા માટે મેડિટેશન કરતો હતો
માતા પિતા અને શિક્ષકોની ઘણી મદદ મળી હતી.સાતત્યપૂર્ણ અભ્યાસ કર્યો હતો.નહીં વાંચવા માટે ક્યારેય બહાના કાઢ્યા નહોતા.પાછલા વર્ષોની પરીક્ષાના પેપરો પણ સોલ્વ કર્યા હતા.એકાગ્રતા માટે રોજ ૧૫ થી ૨૦ મિનિટ મેડિટેશન પણ કરતો હતો.સોશ્યલ મીડિયા પર સક્રિય છું પણ જ્યારે વાંચતો હતો ત્યારે મોબાઈલ બીજા રુમમાં મૂકતો હતો.
આર્યન અગ્રવાલ, ફાઈનલમાં વડોદરામાં બીજો ક્રમ
માત્ર ૧૯ વર્ષની વયે સીએસની ડિગ્રી મેળવી
હું લોનો અભ્યાસ કરું છું અને બીજી તરફ કંપની સેક્રેટરીની ફાઈનલ પરીક્ષા માટે તૈયારી કરી હતી.લો અને સીએસના વિષયોમાં ઘણી સમાનતા હોવાથી તૈયારીમાં મદદ મળી હતી.રોજ લગભગ દસ કલાકનો અભ્યાસ કરતો હતો.જ્યારે ભણાવાતું હોય ત્યારે ધ્યાન આપવું બહું જરુરી છે.માત્ર ૧૯ વર્ષની વયે સીએસની ડિગ્રી મળી છે તેની ખુશી છે.
હુસેની નાસિર મુસલીવાલા, ફાઈનલમાં વડોદરામાં ત્રીજો ક્રમ
હાલોલથી અપ ડાઉન કરતી હતી
અભ્યાસ માટે ઈન્સ્ટિટયુટે આપેલા મોડયુલ પર ધ્યાન આપ્યું હતું અને એ પ્રમાણે તૈયારી કરી હતી.આમ તો હું હાલોલ રહું છું. અભ્યાસ ઓનલાઈન કર્યો હતો અને પરીક્ષા આપવા માટે હાલોલથી રોજ વડોદરા આવતી હતી.સીએસ ફાઈનલની તૈયારી પણ ઓનલાઈન કરીશ.પિતા હાલોલ જીઆઈડીસીમાં નોકરી કરે છે.
ધુ્રવી શાહ, ઈન્ટરમાં વડોદરામાં પ્રથમ અને દેશમાં ૨૩મો ક્રમ
દ્રઢ ઈચ્છા શક્તિ અને સતત વાંચન જરુરી
સીએસનો ઈન્ટર પરીક્ષાનો કોર્સ પણ ઘણો વધારે હોય છે એટલે કેટલાક દિવસો એવા પણ હતા જ્યારે વાંચવાનો કંટાળો પણ આવતો હતો. વાંચેલુ ભૂલી પણ જવાતું હતું.જોકે સફળ થવા માટે દ્રઢ ઈચ્છા શક્તિ રાખીને રોજ અને સતત વાંચન બહું જરુરી હોય છે.એકાઉન્ટમાં મને રસ છે પણ લોનો વિષય વધારે ગમે છે.
વૈદેહી સોની, ઈન્ટરમાં વડોદરામાં બીજો ક્રમ
ઉંચું પરિણામ પણ સીએસની ડિમાન્ડ પણ વધારે
સીએસ વડોદરા ચેપ્ટરના ચેરમેન સાગર ટેલરનું કહેવું છે કે, સીએસ ફાઈનલનું સમગ્ર ભારતનું ૨૬ ટકા પરિણામ આવ્યું છે.જે ખાસું વધારે કહી શકાય.તે જ રીતે વડોદરાનું પરિણામ પણ લગભગ ૨૫ ટકાની આસપાસ છે.જોકે વધારે પરિણામ છતા પણ સીએસની ડિમાન્ડ એટલી છે કે, ડિગ્રી મેળવનારા મોટાભાગના વિદ્યાર્થીઓને નોકરી મેળવવામાં વાંધો નહીં આવે.
