આ પણ વાંચો ટ્રેન્ડિંગ સમાચાર
સ્થાનિક સ્વરાજ્યની ચૂંટણીમાં છેલ્લી ઘડી સુધી દાવપેચ : ખંભાળિયા નગરપાલિકામાં ભાજપના 4 સભ્યોની પેનલ બિનહરિફ : તો વાંકાનેરમાં કોંગ્રેસનો વળતો પ્રહાર : રાજકોટ-મોરબીમાં ત્રિપાંખિયો જંગ
રાજકોટ, : સૌરાષ્ટ્રમાં 4 મહાપાલિકા, 8 જિલ્લા પંચાયત, 18 નગરપાલિકા અને 55 તાલુકા પંચાયતોને સાંકળતી સ્થાનિક સ્વરાજ્યની ચૂંટણીમાં ભારે ખેંચતાણના અંતે ઉમેદવારીપત્ર ભરવાનો મહત્ત્વનો તબક્કો આજે પૂર્ણ થયો હતો. આજે ખાસ કરીને ભાજપ-કોંગ્રેસ તરફથી ફોર્મ પરત ખેંચાવી લેવાના છેલ્લી ઘડી સુધી દાવપેચ ચાલ્યા હતા. જેમાં આખરે એક સપ્તાહની કશ્મકશને અંતે ભાજપના 70 ઉમેદવારો અને કોંગ્રેસના 4 ઉમેદવારો ચૂંટણી પહેલા જ બિનહરિફ વિજેતા બન્યા છે. એ જ રીતે તાલુકા પંચાયતોમાં પણ ભાજપ તરફે 11 બેઠક બિનહરિફ થઈ છે. હવે ચૂંટણી જંગમાં બાકી રહેલા ઉમેદવારો જોરશોરથી પ્રચારમાં લાગી જશે.
રાજકોટ મહાપાલિકામાં ભારે ખેંચતાણ થઈ, પરંતુ એકપણ બેઠક બિનહરિફ થઈ શકી નહીં. હવે ભાજપ-કોંગ્રેસના 72-72 સહિત 236 ઉમેદવારો મેદાને રહ્યા છે. એ જ રીતે જિલ્લા પંચાયતમાં આજે 8 ફોર્મ પરત ખેંચાયા હતા, પણ બિનહરિફ થયા વગર હવે 109 ઉમેદવારો વચ્ચે જંગ ખેલાશે. જ્યારે ગોંડલ નગરપાલિકામાં અગાઉ ભાજપને 20 બેઠકો બિનહરિફ મળ્યા બાદ આજે 11 ફોર્મ પરત ખેંચાવા સાથે હવે 46 ઉમેદવારો મેદાને છે. વળી, 11 તાલુકા પંચાયતોમાં આજે 4 બેઠકો બિનહરિફ બની હતી અને 595 ઉમેદવારો ચૂંટણી-જંગમાં રહ્યા છે.
જામનગર મહાપાલિકામાં વોર્ડ નં. 14ની મહિલાના અનામત બેઠક પર એકમાત્ર ભાજપના મહિલા ઉમેદવારનું ફોર્મ માન્ય રહ્યું હોવાથી બિનહરીફ જાહેર થઈ છે. જ્યારે જામનગર જિલ્લા પંચાયતની પીઠડ બેઠક પર ભાજપના મહિલા ઉમેદવાર બિનહરીફ વિજેતા થયા છે. તે જ રીતે જામનગર તાલુકા પંચાયતની ચૂંટણીમાં ભાજપના 5 ઉમેદવારો બિનહરીફ જાહેર થયા છે. બીજી તરફ વેરાવળ નગરપાલિકામાં કોંગ્રેસના ઉમેદવારે આજે ફોર્મ પરત ખેંચી લેતા ભાજપને એક બેઠક બિનહરીફ મળી હતી. મોરબી જિલ્લામાં મહાપાલિકામાં 177 ઉમેદવારો મેદાને છે અને ભાજપ, કોંગ્રેસ, આપ વચ્ચે ત્રિપાંખિયો જંગ ખેલાશે. જિલ્લા પંચાયતમાં પણ એકેય બેઠક બિનહરિફ નહીં થતાં હવે 78 ઉમેદવારો મેદાને છે. જો કે, વાંકાનેર નગરપાલિકાના વોર્ડ નં. 4માં કોંગ્રેસના 4 ઉમેદવારોની પેનલ બિનહરિફ વિજેતા થઈ છે. જ્યારે તાલુકા પંચાયતમાં ભાજપને જાંબુડિયા બેઠક બિનહરિફ મળી છે.
દેવભૂમિ દ્વારકા જિલ્લામાં આજરોજ ફોર્મ પરત ખેંચાયા બાદ ચૂંટણી ચિત્ર સ્પષ્ટ થયું છે. જેમાં આજે જિલ્લા પંચાયતની 22 બેઠકો માટે 8 ફોર્મ, ખંભાળિયા અને રાવલ નગરપાલિકામાં કુલ 12 ફોર્મ, જિલ્લાની તમામ 4 તાલુકા પંચાયતમાં કુલ 21 ફોર્મ મળી આજે તમામ ત્રણ ચૂંટણીમાં 41 ફોર્મ પરત ખેંચાયા છે. આ પરિસ્થિતિમાં હવે ચૂંટણી જંગમાં કુલ 420 ઉમેદવારો મેદાનમાં રહ્યા છે. વળી, આજે ખંભાળિયા નગરપાલિકામાં વોર્ડ નં.6ની આખી પેનલ સહિત કુલ 5 બેઠક અને જિલ્લા પંચાયત તથા તાલુકા પંચાયતની 1-1 બેઠક ભાજપ તરફે બિનહરીફ થવા પામી છે.
