આ પણ વાંચો ટ્રેન્ડિંગ સમાચાર
અમદાવાદ, શુક્રવાર
ઇસનપુરમાં સ્પેલિંગ બોલવામાં ભૂલ પડતા ખાનગી એકેડેમીના શિક્ષકે વિદ્યાર્થીને પ્લાસ્ટીકની સ્ટીકથી માર માર્યો હતો. ડરીને વિદ્યાર્થી હોસ્ટેલમાંથી ભાગીને કાંકરિયા ફૂટબોલ ગ્રાઉન્ડ આવ્યો હતો. બેરહેમીથી મારતા વિદ્યાર્થીને હાથ અને બરડામાં ઇજાઓ થઇ હતી. ઇસનપુર પોલીસે શિક્ષકની ધરપકડ કરીને વધુ તપાસ હાથ ધરી છે.
વિદ્યાર્થીને હાથ,બરડામાં નિશાન પડયા
મેમનગરમાં રહેતી અને બ્યૂટી પાર્લરનું કામ કરતી મહિલા (ઉ.વ.૩૮)એ ઇનસપુર પોલીસ સ્ટેશનમાં ઇસનપુરમાં રહેતા શિક્ષક સામે ફરિયાદ નોંધાવી છે કે તેમનો ૧૨ વર્ષનો પુત્ર ઇસનપુરમાં આવેલી કેરિયર એક્સપ્રેસ ડિફેન્સ એકેડમીમાં ત્રણ વર્ષથી ઘોરણ-૮માં અભ્યાસ કરે છે અને એકેડમીની હોસ્ટેલમાં જ રહે છે. તા. ૨૭ના રોજ મહિલા બ્યૂટી પાર્લરના કામથી ગાંધીધામ જતા હતા. ત્યારે અજાણ્યા નંબર પરથી તેમને ફોન આવ્યો હતો કે તમારો પુત્ર કાંકરિયા ફૂટબોલ ગ્રાઉન્ડ પાસેથી મળી આવ્યો છે તેને હોસ્ટેલના શિક્ષકે માર્યો છે.
સ્પેલિંગ બોલવામાં ભૂલ પડતા શિક્ષકે માર્યો
જેથી મહિલાએ તેમના સગાને ત્યાં મોકલ્યા હતા પૂછપરછ કરતાં સગીરે કહ્યું કે તા. ૨૬ના રોજ શિક્ષકે તેને ડિસીઝનો સ્પેલિંગ પૂછયો હતો. સ્પેલિંગ બોલવામાં ભૂલ પડતા શિક્ષકે વિદ્યાર્થીને પ્લાસ્ટીકની સ્ટીકથી હાથ અને બરડામાં છ સોટીઓ મારતા નિશાન પડી ગયા હતા. જેથી વિદ્યાર્થી ડરીને હોસ્ટેલમાંથી ભાગી આવ્યો હતો. વિદ્યાર્થીને સારવાર કરાવી હતી. આ બનાવ અંગે ઇસનપુર પોલીસે આરોપી શિક્ષક સામે ગુનો નોંધીને ધરપકડ કરીને વધુ તપાસ હાથ ધરી છે.
