આ પણ વાંચો ટ્રેન્ડિંગ સમાચાર
Jamnagar News: જામનગરમાં લૂંટ અને બાદમાં પોલીસ સામે રકઝક કરનારા બે શખ્સોની શાન પોલીસે ઠેકાણે લાવી દીધી છે, હાલ કિસ્સો ટોક ઓફ ધ ટાઉન બન્યો છે. ઘટનાની વિગતો મુજબ, શહેરના દિગ્જામ સર્કલ વિસ્તારમાં થોડા દિવસો પહેલા જહાંગીર બાપુ અને સબીર સંઘાર નામના બે શખ્સોએ જાહેરમાં ધારિયું ઉલાળીને પોલીસની 112 જનરક્ષક ટીમ સાથે જીભાજોડી કરી હતી. આ હંગામાનો વીડિયો સોશિયલ મીડિયામાં વાઈરલ થતા જ લોકોમાં ફફડાટ ફેલાયો હતો, જેને પગલે પોલીસે તાત્કાલિક એક્શન મોડમાં આવી આ બંને કહેવાતા ‘ડોન’ની ધરપકડ કરી લીધી હતી.
ગુનામાં વપરાયેલો મુદ્દામાલ જપ્ત
પોલીસ તપાસમાં સામે આવ્યું હતું કે આ બંને શખ્સોએ માત્ર પોલીસ સાથે માથાકૂટ જ ન હતી કરી, પરંતુ એક યુવાનને માર મારી તેના ખિસ્સામાંથી 700 રૂપિયાની લૂંટ પણ ચલાવી હતી. આ અંગે 112 નંબરની પોલીસ જીપના ચાલક હીરાભાઈ મુછાળાએ ફરિયાદ નોંધાવ્યા બાદ પોલીસે બંને આરોપીઓને કોર્ટમાં રજૂ કરી 2 દિવસના રિમાન્ડ મેળવ્યા હતા. રિમાન્ડ દરમિયાન પોલીસે ગુનામાં વપરાયેલું બાઇક, ધારિયું, છરી અને લૂંટાયેલી 700 રૂપિયાની રોકડ રકમ રિકવર કરી છે.
આ પણ વાંચો: ભરૂચની GIDCમાં કામદારોના મોતનો મામલો: ચૈતર વસાવા અને મૃતકના સગા વચ્ચે ઝપાઝપી, જાણો શું છે સમગ્ર મામલો
‘ક્યારેય આવું કૃત્ય નહીં કરે’
રિમાન્ડના ભાગરૂપે પોલીસે જ્યારે આ બંને આરોપીઓને દિગ્જામ સર્કલ પાસે સીન રી-કન્સ્ટ્રક્શન માટે લઈ ગઈ, ત્યારે બંને ગુંડાતત્વોની શાન ઠેકાણે આવી ગઈ હતી. જે શખ્સો થોડા દિવસ પહેલા હથિયારો લઈને પોલીસ સામે પડ્યા હતા, તેઓને જ પોલીસે ‘મરઘા’ બનાવ્યા હતા. જાહેરમાં માફી માંગતા અને કાકલૂદી કરતા આ શખ્સોએ કબૂલ્યું હતું કે તેઓ હવે પછી ક્યારેય આવું કૃત્ય નહીં કરે. રિમાન્ડની મુદત પૂરી થતા જ કોર્ટે બંને માથાભારે શખ્સોને જેલના સળિયા પાછળ ધકેલી દીધા છે.
