આ પણ વાંચો ટ્રેન્ડિંગ સમાચાર
Ahmedabad NEET Aspirants Slam NTA Over Paper Leak: નેશનલ ટેસ્ટિંગ એજન્સી(NTA) દ્વારા ગત 3 મેના રોજ લેવાયેલી મેડિકલ પ્રવેશ પરીક્ષા ‘NEET UG 2026’ પેપર લીક બાદ સત્તાવાર રીતે રદ કરવામાં આવી છે. ‘ગેસ પેપર’ના નામે અસલી પ્રશ્નપત્ર વાઇરલ થતાં સરકારે તપાસ CBIને સોંપી છે, પરંતુ આ નિર્ણયે રાત-દિવસ એક કરીને મહેનત કરનારા 22 લાખથી વધુ વિદ્યાર્થીઓને તણાવમાં ધકેલી દીધા છે. ત્યારે ગુજરાત સમાચારની ટીમે એક્સપર્ટ અને નીટની પરીક્ષા આપનારા વિદ્યાર્થીઓ સાથે વાતચીત કરી હતી, જેમાં તેઓએ દર વર્ષે થતી આ ગેરનીતિ અંગે આક્રોશ ઠાલવ્યો હતો.
NTAની આ બેદરકારી અમારા કરિયરને ખરાબ રીતે અસર કરી રહી છે: નીટ એસ્પિરન્ટ
નીટ એસ્પિરન્ટે જણાવ્યું કે, ‘મારું નામ રિયા ત્રિવેદી છે અને હું છેલ્લા બે વર્ષથી નીટ માટે રોજ 10થી 11 કલાકનું વાંચન કરી રહી છું. મેં મારા અભ્યાસ માટે 11મા ધોરણથી જ પરિવારના તમામ પ્રસંગો અને એન્જોયમેન્ટનો ત્યાગ કર્યો હતો. આ વખતે મારા 624 માર્ક્સ આવ્યા હતા અને મને અમદાવાદમાં સીટ મળી જાય તેવી પૂરી આશા હતી. અમુક લોકોની ચોરીના કારણે જો 25 લાખ વિદ્યાર્થીઓ માટે ફરીથી પરીક્ષા લેવાય તો, મારા માટે બે વર્ષ પહેલાં જેવો જુસ્સો અને માઈન્ડસેટ પાછો લાવવો ખૂબ જ મુશ્કેલ છે. મેં ગુજકેટમાં પણ બાયોલોજીમાં 40માંથી 40 માર્ક્સ મેળવ્યા છે, તેથી મને લાગે છે કે સંપૂર્ણપણે નીટ પર નિર્ભર રહેવાને બદલે બીજી પરીક્ષાઓનો પણ સપોર્ટ મળવો જોઈએ, પરંતુ NTAની આ બેદરકારી અમારા કરિયરને ખરાબ રીતે અસર કરી રહી છે.’
આ પણ વાંચો: દેશના કરોડો વિદ્યાર્થીઓનું ભવિષ્ય દાવ પર, જાણો ભૂતકાળમાં NEET પેપર લીક કરનારા આરોપીઓ હાલ ક્યાં છે!
જો નવું પેપર ટફ નીકળશે તો મારું શું થશે: નીટ એસ્પિરન્ટમાં ડર!
અન્ય એક નીટ એસ્પિરન્ટ આશમી જૈને જણાવ્યું કે, ‘મેં પણ આ વખતે નીટની પરીક્ષા આપી હતી. મેં છેલ્લા બે વર્ષથી રોજ 10 કલાકનું વાંચન કરીને અને સગા-સંબંધીઓના ફંક્શનમાં ન જઈને ઘણું સેક્રિફાઈસ કર્યું છે. આ વખતે મારું પેપર ખૂબ જ સરસ ગયું હતું અને મારો સ્કોર 500ની આસપાસ હતો, જેથી અમને ખાતરી હતી કે મને મેડિકલમાં સીટ મળી જ જશે. અમે એટલા નિશ્ચિત થઈ ગયા હતા કે અમારા પરિવારનું બહાર ફરવા જવાનું વેકેશન પણ નક્કી થઈ ગયું હતું, પણ આ પરીક્ષા રદ્દ થવાના સમાચાર પછી બધું કેન્સલ કરવું પડ્યું. હવે બે વર્ષની સખત મહેનતને માત્ર એક જ મહિનામાં ફરીથી રિવાઈઝ કરવી એ મારા માટે બિલકુલ અનફેર છે અને મને ડર પણ છે કે જો નવું પેપર ટફ નીકળશે તો મારું શું થશે.’
પરીક્ષા રદ્દ થતાં મારું મોરલ હવે સાવ ડાઉન થયું છે: નીટ એસ્પિરન્ટ
નીપસા પંચાલ નામની નીટ એસ્પિરન્ટે જણાવ્યું કે, ‘મેં પણ હમણાં જ નીટની પરીક્ષા આપી છે. અમે રોજ આઠ કલાક વાંચન કરીને સારી એવી તૈયારી કરી હતી અને મારા પરિવારનો પણ મને પૂરો સપોર્ટ હતો. પરંતુ નીટનું પેપર લીક થવાના અને રદ્દ થવાના સમાચાર સાંભળીને મારું મોરલ હવે સાવ ડાઉન થઈ ગયું છે. મારું ફેમિલી મને હજુ પણ તૈયારી કરવા માટે મોટિવેટ કરી રહ્યું છે, પણ મને ખૂબ ડર લાગે છે કે હવે ફરી લેવાનારું પેપર કેવું આવશે, તે હાર્ડ હશે કે ઇઝી?. અત્યારે મને લાગે છે કે હું હવે ફરીથી 300થી 400ની આસપાસ સ્કોર મેળવી શકીશ.’
આ પણ વાંચો: NEET 2026: 60 લાખ આપો અને ડમી ઉમેદવાર બેસાડો, બિહારમાં સક્રિય સોલ્વર ગેંગનો પર્દાફાશ
નીટ એસ્પરન્ટ પ્રજાપતિ શ્રેયે જણાવ્યું કે, ‘મેં આ વર્ષે ધોરણ 12 સાયન્સમાં રહીને નીટની(NEET) એક્ઝામ આપી હતી. મેં આખું વર્ષ મારી બધી જ હોબી જતી કરીને રાત-દિવસ એક કરીને સખત મહેનત કરી હતી, જેના લીધે મને આ પરીક્ષામાં 400થી 500ની આસપાસ માર્ક્સ આવવાની આશા હતી. પરંતુ અચાનક પેપર લીક અને પરીક્ષા રદ્દ થવાના સમાચાર સામે આવતા મારું અને જે વિદ્યાર્થીઓનું મેડિકલમાં સિલેક્શન નક્કી હતું તે સૌનું મોરલ સાવ ડાઉન થઈ ગયું છે. ઘણા વિદ્યાર્થીઓએ તો પોતાના ચોપડા પણ આપી દીધા હતા, અને તંત્રની સિક્યુરિટીના અભાવે પેપર લીક થવાથી અમારે બધું પહેલેથી જ ફરી ચાલુ કરવું પડશે, એવું લાગે છે કે જાણે કોઈને અમારા ભવિષ્યની પડી જ નથી. અમે બધા હવે વેકેશન મૂડમાં આવી ગયા હતા અને નીટની તૈયારી નિયમિત રૂપે કરવી પડતી હોવાથી, હવે અચાનક ફરીથી ભણવાનું ચાલુ કરવું ખૂબ અઘરું પડશે; જેથી જો ફરીથી એક્ઝામ લેવાય તો અભ્યાસ ભૂલાવા લાગવાના કારણે કદાચ મારો સ્કોર પહેલા કરતા ઓછો જ આવશે.’
આ પ્રકારની ગેરરીતિ વિદ્યાર્થીઓના ભવિષ્ય સાથેનો મોટો ખિલવાડ: ફાર્મસી કોલેજના પ્રિન્સિપાલ
એક ફાર્મસી કોલેજના પ્રિન્સિપાલે જણાવ્યું કે, ‘મારું નામ ડૉ.આશીષ પંચાલ છે અને હું ફાર્મસી કોલેજનો પ્રિન્સિપલ છું, તેમજ બાયોલોજી શિક્ષક તરીકે પણ કામ કરું છું. આ નીટની પરીક્ષા માત્ર એક પરીક્ષા નથી, પરંતુ લાખો વિદ્યાર્થીઓ અને તેમના માતા-પિતાની બે વર્ષની સખત મહેનત અને વિશ્વાસનું પરિણામ છે. જ્યારે આ રીતે પેપર લીક થાય અને ફરી પરીક્ષા લેવાની વાત આવે, ત્યારે એવું લાગે જાણે 400 મીટરની દોડ પૂરી કર્યા પછી કોઈ ખેલાડીને તરત જ ફરી દોડવાનું કહેવામાં આવ્યું હોય, જેનાથી વિદ્યાર્થીઓ પર ભારે માનસિક તણાવ ઊભો થાય છે. ઘણા વિદ્યાર્થીઓ તો બે-ત્રણ વર્ષથી ડ્રોપ લઈને મહેનત કરી રહ્યા છે, તેથી આ તેમના ભવિષ્ય સાથેનો મોટો ખિલવાડ છે. મારો સુઝાવ છે કે આ પરીક્ષાને કોમ્પ્યુટર બેઝ્ડ કરવી જોઈએ અને વિદ્યાર્થીઓ માત્ર એક જ પરીક્ષા પર નિર્ભર ન રહે તે માટે બોર્ડની પરીક્ષા અને નીટ બંનેના માર્ક્સને 50-50 કે 70-30ના રેશિયામાં ગણવા જોઈએ. જ્યારે વિદ્યાર્થીઓને પરીક્ષા કેન્દ્રમાં મેટલ કે અન્ય વસ્તુઓ લઈ જવા પર આટલા કડક નિયમો છે, તો પછી NTA દ્વારા એક પેપર કેમ સુરક્ષિત રીતે સાચવી શકાતું નથી?.’
