આ પણ વાંચો ટ્રેન્ડિંગ સમાચાર
વડોદરા, તા.26 વડોદરા મ્યુનિસિપલ કોર્પોરેશનની સખત ગરમીની વચ્ચે આજે યોજાયેલી ચૂંટણીમાં ખૂબ નિરસ સરેરાશ ૫૨.૫૬ ટકા મતદાન થયું હતું. ઇવીએમ ખોટકાયા, આચાર સંહિતાનો ભંગ, મતદાર યાદીમાં નામ નથી જેવી કેટલીક ચીલાચાલુ ફરિયાદોને બાદ કરતા સુરક્ષા દળોના લોખંડી બંદોબસ્ત વચ્ચે આજે મતદાન શાંતિપૂર્ણ રહ્યું હતું.
કોર્પોરેશનના કુલ ૧૯ વોર્ડમાં ૭૪ બેઠકો પર ઉભા રહેલા ૨૫૮ ઉમેદવારોના ભાવિ ઇવીએમમાં કેદ થઇ ગયા છે. મતદાન બાદ પોલીટેકનિક કોલેજ ખાતેના સ્ટ્રોંગરૃમમાં ઇવીએમ ખસેડાયા હતા હવે તા.૨૮ના રોજ મતગણતરી દરમિયાન ઉમેદવારોના ભાવિનો ફેંસલો જાહેર થશે. ઉલ્લેખનીય છે કે બે બેઠકો અગાઉ બિનહરીફ જાહેર થઇ છે.
વડોદરા મ્યુનિસિપલ કોર્પોરેશનની ચૂંટણી આજે સવારે સાત વાગ્યાથી કુલ ૧૧૩૧ મતદાન મથકો પર યોજાઇ હતી. રવિવારનો દિવસ હોવા છતાં સખત ગરમીના કારણે મતદારો સવારે નિરુત્સાહ રહ્યા હતાં. શરૃઆતના પ્રથમ બે કલાકમાં માત્ર ૭ ટકા મતદાન નોંધાયું હતું. જો કે બાદમાં મતદારો ધીમે ધીમે મતદાન માટે બહાર નીકળ્યા હતાં. બપોરે ૧ વાગે મતદાનની ટકાવારી વધીને ૩૦.૬૦ ટકા થઇ ગઇ હતી.
બપોરે પણ મતદારો મતદાન માટે ઉત્સાહી જણાતા ન હતા અને ત્રણ વાગ્યા સુધી માંડ માંડ ૩૯.૪૧ ટકા મતદાન નોંધાયું હતું. બપોર બાદ મતદાનની ટકાવારી વધારવા માટે રાજકીય પક્ષોના કાર્યકરો તેમજ ઉમેદવારો દ્વારા પ્રયત્નો હાથ ધરાતા મતદાનની ટકાવારીમાં આંશિક વધારો થયો હતો અને સાંજે પાંચ વાગ્યા સુધી ૪૨.૮૨ ટકા મતદાન નોંધાયું હતું. જિલ્લા ચૂંટણી અધિકારી ડો.અનિલ ધામેલિયાએ જણાવ્યું હતું કે ચૂંટણી શાંતિપૂર્ણ રહી હતી અને સામાન્ય ફરિયાદોને બાદ કરતા કોઇ મોટી ફરિયાદો સામે આવી નથી.
