આ પણ વાંચો ટ્રેન્ડિંગ સમાચાર
– ખેડા એલસીબીની બાતમી આધારે કાર્યવાહી
– પોલીસે ગૌમાંસના જથ્થા સહિત રૂ. 3.22 લાખની મત્તા જપ્ત કરી અમદાવાદના શખ્સ સામે ગુનો નોંધ્યો
નડિયાદ : ખેડા એલસીબી મહેમદાવાદ તાલુકાના નેનપુર ફાટક પાસે વોચ ગોઠવી કારમાં ગૌમાંસની હેરાફેરી કરતા અમદાવાદના એક શખ્સને ઝડપી પાડયો છે. પોલીસે કારમાંથી ૧૦૦ કિલો ગૌમાંસનો જથ્થો જપ્ત કરી કુલ ૩,૨૨,૮૮૦ રૂપિયાનો મુદ્દામાલ કબજે લીધો છે. આ મામલે મહેમદાવાદ પોલીસ મથકે ગુજરાત પ્રાણી સંરક્ષણ સુધારા અધિનિયમ હેઠળ ગુનો નોંધી વધુ કાર્યવાહી હાથ ધરવામાં આવી છે.
ખેડા એલસીબીની ટીમ મહેમદાવાદ વિસ્તારમાં પેટ્રોલિંગમાં હતી. તે દરમિયાન ખાત્રજ ચોકડી પાસે બાતમી મળી હતી કે, એક કારમાં ગૌમાંસ ભરીને કઠલાલના ખોખરવાડા તરફથી નેનપુર અને મલાતજ થઈને અમદાવાદ તરફ જનાર છે. આ ચોક્કસ બાતમીના આધારે પોલીસે નેનપુર રેલવે ફાટક પાસે વ્યૂહાત્મક વોચ ગોઠવી હતી. બાતમી મુજબની કાર ત્યાંથી પસાર થતા પોલીસે તેને આંતરીને રોડની સાઈડમાં ઉભી રખાવી હતી. કાર ચાલકની પૂછપરછ કરતા તેણે પોતાનું નામ મોહમ્મદવસીમ મોહમદયાકુબ શેખ અને તે અમદાવાદના વિશાલા વિસ્તારનો રહેવાસી હોવાનું જણાવ્યું હતું. પોલીસે કારની તલાશી લેતા પાછળની ડેકીમાંથી પ્લાસ્ટિકના ૪ કોથળા મળી આવ્યા હતા. આ કોથળાઓની તપાસ કરતા તેમાં માંસનો જથ્થો ભરેલો હોવાનું જણાયું હતું. પોલીસે વેટરનરી ડોક્ટરને સ્થળ પર બોલાવી પ્રાથમિક તપાસ કરાવતા આ જથ્થો ગૌમાંસ હોવાનું ફલિત થયું હતું. કુલ ૧૦૦ કિલો ગૌમાંસ મળી આવતા પોલીસે આરોપીની અટકાયત કરી હતી. ઝડપાયેલા આરોપી પાસેથી ૧૭,૦૦૦ રૂપિયાની કિંમતનું ગૌમાંસ, ૩,૦૦,૦૦૦ની કાર, મોબાઈલ ફોન અને રોકડ રકમ મળી કુલ ૩,૨૨,૮૮૦ રૂપિયાનો મુદ્દામાલ જપ્ત કરવામાં આવ્યો હતો.
આ બનાવ સંદર્ભે એલસીબી પોલીસે મહેમદાવાદ પોલીસ સ્ટેશનમાં ફરિયાદ નોંધાવી છે. પોલીસે આરોપી મોહમ્મદ વસીમ શેખ વિરુદ્ધ ગુજરાત પ્રાણી સંરક્ષણ સુધારા એમેન્ડમેન્ટ બિલ ૨૦૧૭ અને પ્રાણી ક્રૂરતા નિવારણ અધિનિયમની વિવિધ કલમો હેઠળ ગુનો દાખલ કર્યો છે. ગૌમાંસનો આ જથ્થો ક્યાંથી લાવવામાં આવ્યો હતો અને અમદાવાદમાં કોને પહોંચાડવાનો હતો તે દિશામાં પોલીસે તપાસના ચક્રો ગતિમાન કર્યા છે. પકડાયેલા શખ્સની વધુ પૂછપરછમાં આ નેટવર્ક સાથે જોડાયેલા અન્ય શખ્સોના નામ બહાર આવવાની શક્યતા છે.
