આ પણ વાંચો ટ્રેન્ડિંગ સમાચાર
તા.18 સુધી ગરમ હવામાનનું એલર્ટ,પાણી-પાવરની માંગ વધી
ગરમીની સાથે દરિયો તોફાની,પવનની ઝડપ કચ્છમાં ૬૦ કિ.મી.નોંધાઈ,અન્યત્ર ૨૦-૩૦ કિમી ઝડપે પવન
રાજકોટ: આ વર્ષે ઉનાળો અતિશય આકરો રહેવાનું પૂર્વાનુમાન છે ત્યારે એપ્રિલમાં ધોમધખતા તાપનો આરંભ થયો છે જેમાં સમગ્ર ગુજરાતમાં રાજકોટમાં સતત સર્વાધિક તાપમાન નોંધાતું રહે છે અને આજે પારો ૪૨ સે.એ પહોંચ્યો હતો. આ સાથે શહેરોમાં જળમાંગ અને વિજમાંગ પણ વધી છે જેમાં રાજકોટમાં જળમાંગ ૧ કરોડ લિટર વધીને ૪૪ કરોડ લિટરે પહોંચી ગઈ છે.
મોસમ વિભાગ અનુસાર સૌરાષ્ટ્ર કચ્છ સહિત રાજ્યના કાંઠાળ વિસ્તારોમાં હજુ તા.૧૮ સુધી અકળામણ અનુભવાય તેવા ગરમ હવામાનનું એલર્ટ જારી છે. જ્યારે અન્યત્ર પણ તીવ્ર તાપ વરસી રહ્યો છે અને પારો ૪૦ સે.ની ઉપર રહેવાની આગાહી છે. જેના પગલે લોકોમાં પીવાના પાણીની અને પંખા-એ.સી.વગેરે માટે પાવરની પણ માંગ વધી છે. રાજકોટમાં દૈનિક ૪૦.૫ કરોડ લિટર સામે હાલ ૪૧.૫૦ કરોડ લિટર પાણીનું વિતરણ થાય છે જે માટે પાણીનો ઉપાડ વધીને ૪૪ કરોડ લિટરે પહોંચ્યો છે.
આજે પણ અમદાવાદ,સુરેન્દ્રનગર, અમરેલી સહિતના સ્થળે તાપમાન ૪૧ સે.થી વધુ અને વડોદરા, ગાંધીનગર સહિત સ્થળે ૪૦ સે.થી વધુ રહ્યું હતું. આ સાથે ભેજનું પ્રમાણ વધારે રહેતું હોય બફારાનો અનુભવ થઈ રહ્યો છે. ગરમીની સાથે જ તીવ્ર પવન ફૂંકાવાનું જારી છે, જેમાં કચ્છમાં મહત્તમ ૬૦ કિ.મી.ની ઝડપ નોંધાઈ હતી. આજે પણ રાજકોટ સહિત સ્થળોએ ૨૦થી ૩૦ કિ.મી. ઝડપે પવન ફૂંકાયો હતો. આ સાથે રાજસ્થાન ઉપર સાયક્લોનિક સર્ક્યુલેશનના પગલે ગુજરાતનો દરિયો પણ તોફાની બન્યો છે.
