આ પણ વાંચો ટ્રેન્ડિંગ સમાચાર
અમદાવાદ,મંગળવાર,12
મે,2026
સુપ્રીમ કોર્ટના નિર્દેશ પછી અમદાવાદ મ્યુનિસિપલ કોર્પોરેશને
નવી ગાઈડલાઈન અમલમાં મુકી છે.જે મુજબ રહેણાંક અને કોમર્શિયલ તમામ મિલકતોમાંથી નીકળતા
કચરાને ચાર અલગ કેટેગરીમા સેગ્રીગેટ કરીને
ફરજિયાત આપવો પડશે.ભીના અને સુકા કચરા ઉપરાંત સેનેટરી તથા જોખમી ઘરગથ્થુ કચરો
અલગ કરીને જ ડોર ટુ ડોરના વાહનમાં આપવાનો રહેશે. અલગ કચરો નહીં આપનારા સામે કડક કાર્યવાહી
કરવામા આવશે. પહેલી એપ્રિલથી દેશવ્યાપી આ કાયદાનો અમલ શરૃ કરવામા આવ્યો છે. અઢાર મહિનાની
અંદર દેશભરમાં તમામ સ્થાનિક સ્વરાજયની સંસ્થાઓને તેનો કડક અમલ કરવા આદેશ આપવામા આવ્યો
છે.કચરો શેરીઓમા, ખુલ્લી જગ્યામાં
,ગટરમાં કે જળાશયોમાં
ફેંકવો કે બાળવો તે કાનૂની ગુનો ગણાશે.
આ અંગે પ્રાપ્ત થતી વિગત મુજબ, સુપ્રીમ કોર્ટ
દ્વારા આપવામા આવેલા આદેશ પછી હવે નવી જોગવાઈ મુજબ શહેરના તમામ ઝોન અને વોર્ડમાં
આવેલા રહેણાંક તથા કોમર્શિયલ એકમોએ કચરાના સેગ્રીગેશનને મહત્વ આપવુ પડશે.ભીના
કચરામાં રસોડાનો કચરો, ફળો તથા
શાકભાજીનો કચરો વગેરેનો સમાવેશ થાય છે.સુકા કચરામા કાગળ, પ્લાસ્ટિક,કાચ અને ધાતુ
જેવી ચીજોનો સમાવેશ થાય છે.સેનેટરી કચરામા વપરાયેલા ડાયપર,સેનેટરી પેડ
સહિતનો કચરો આવશે.જેને ઉત્પાદક દ્વારા આપવામા આવેલી બેગ અથવા યોગ્ય રીતે કાગળમાં
લપેટીને આપવાનો રહેશે.ઘરગથ્થુ જોખમી કચરામા ઈલેકટ્રોનિક વેસ્ટ અલગથી આપવો
પડશે.તમામ રહેણાંક તથા કોમર્શિયલ એકમો માટે આ નિયમો ફરજિયાત પણે અમલમાં રહેશે.
હોટલો,રેસ્ટોરન્ટ, શોપિંગ મોલ વગેરે
ઓનસાઈટ વેસ્ટ પ્રોસેસિંગ ફરજિયાત
શહેરમાં મોટાપાયે કચરો ઉત્પન્ન કરનારાને બલ્ક વેસ્ટ
જનરેટરની કેટેગરીમા મુકવામા આવ્યા છે.આ પ્રકારના એકમો માટે હવે ઓનસાઈટ વેસ્ટ
પ્રોસેસિંગ ફરજિયાત બનશે.નવી જોગવાઈ મુજબ,
જે એકમોનુ બાંધકામ વીસ હજાર ચોરસમીટર અથવા તેથી વધુ હોય.જેમનો પાણીનો વપરાશ
દૈવિક ૪૦ હજાર લીટરથી વધુ હોય.અથવા જે એકમો દ્વારા દૈનિક ૧૦૦ કિલોગ્રામ ઘનકચરાનુ
ઉત્પાદન થતુ હોય તેવા તમામ એકમને બલ્ક વેસ્ટ જનરેટર તરીકે ઓળખવામા આવશે.આ નિયમો
હેઠળ તમામ હોટલો,રેસ્ટોરન્ટો
ઉપરાંત ધાર્મિક સંસ્થાઓ, સરકારી
અને અર્ધ સરકારી કચેરીઓ, શૈક્ષણિક
સંસ્થાઓ,યુનિવર્સિટીઓ,મોટા
રહેણાંક એપાર્ટમેન્ટ,ફલેટ,સોસાયટીઓ, કોમર્શિયલ એકમો
તથા શોપિંગ મોલ્સ સહિતના મોટા એકમનો સમાવેશ થાય છે.
લેન્ડફિલ સાઈટ ઉપરનુ ભારણ ઘટાડવા ઓનસાઈટ પ્રોસેસિંગ કરવુ
પડશે
અમદાવાદ મ્યુનિ.ની વેસ્ટ લેન્ડફિલ સાઈટ ઉપરનુ ભારણ
ઘટાડવા બલ્ક વેસ્ટ જનરેટરની કેટેગરીમા
આવતા તમામે ભીના કચરાનુ ઓનસાઈટ પ્રોસેસિંગ કરવુ પડશે.આમ નહીં કરનારા સામે કડક
કાર્યવાહી કરવામા આવશે.
