આ પણ વાંચો ટ્રેન્ડિંગ સમાચાર
વડોદરાઃ વડોદરા જિલ્લાના સહકારી ક્ષેત્રમાં સરકાર દ્વારા વહાલા-દવલાંની નીતિ અપનાવવામાં આવી રહી હોય તે રીતે નિર્ણયો લેવાઇ રહ્યા છે.જેમાં આજે ડભોઇ બજાર સમિતિની ચૂંટણી યોજાતાં ૩૫ વર્ષ બાદ ભાજપે સત્તા મેળવી છે.જ્યારે બાકીની ચાર એપીએમસીમાં હજી પ્રમુખ-ઉપપ્રમુખની ચૂંટણી જાહેર થઇ નથી.
વડોદરા જિલ્લામાં કુલ પાંચ એપીએમસીમાં પ્રમુખ-ઉપપ્રમુખની ચૂંટણી યોજાનાર હતી.જેમાં પાદરા એપીએમસીમાં નવી ચૂંટણી યોજાતાં બળવાખોરોએ સત્તા મેળવી હતી.જ્યારે ડભોઇ એપીએમસીમાં પણ પાંચ વર્ષની ટર્મ માટે ચૂંટણી યોજાતાં ૩૫ વર્ષ બાદ ભાજપે બહુમતી મેળવી હતી.
આ બંને એપીએમસી ઉપરાંત શિનોર, કરજણ અને સાવલી એપીએમસીમાં ભાજપ પાસે સત્તા હતી.જેમાં પ્રમુખ- ઉપપ્રમુખની અઢીવર્ષની પહેલી ટર્મ પુરી થઇ હતી.પરંતુ બીજી ટર્મ માટેની ચૂંટણીની લાંબા સમયથી રાહ જોવાઇ રહી છે.
ઉપરોક્ત પાંચ એપીએમસી પૈકી માત્ર ડભોઇ એપીએમસીમાં આજે પ્રમુખ-ઉપપ્રમુખની ચૂંટણી યોજાઇ હતી.જેમાં ભાજપે મેન્ડેટ આપીને પ્રમુખ તરીકે મુકુંદ પટેલ અને ઉપપ્રમુખ તરીકે ઉમેશ પટેલને નિયુક્ત કર્યા છે.નોંધપાત્ર બાબત એ છે કે,પાદરા એપીએમસીમાં ડભોઇ કરતાં પહેલાં ચૂંટણી થઇ હતી અને ભાજપના બળવાખોરોએ સત્તા મેળવી હતી.પરંતુ હજી ત્યાં પ્રમુખની ચૂંટણી જાહેર થઇ નથી.
આવી જ રીતે શિનોર,કરજણ અને સાવલી એપીએમસીમાં ભાજપ પાસે સત્તા હોવા છતાં અઢી વર્ષની બીજી ટર્મ માટે લાંબા સમયથી પ્રમુખ- ઉપપ્રમુખની ચૂંટણી જાહેર થતી નથી.
બરોડા ડેરી અને વડોદરા જિલ્લા સંઘના પ્રમુખની ચૂંટણી પાંચ મહિનાથી ઘોંચમાં
વડોદરા જિલ્લાની અગ્રણી સહકારી સંસ્થાઓમાં સરકાર દ્વારા ચૂંટણી યોજવાના મુદ્દે ઉદાસીન વલણ અપનાવાતાં કાર્યકરોમાં ચર્ચાનો વિષય બન્યો છે.
બરોડા ડેરીમાં માર્ચ-૨૦૨૬માં ચૂંટણી યોજાતાં તમામ ૧૩ ડિરેક્ટરો ભાજપના ચૂંટાયા હતા.પરંતુ ત્યારપછી પણ હજી પ્રમુખ- ઉપપ્રમુખની ચૂંટણી હજી સુધી જાહેર કરાઇ નથી.
આવી જ રીતે વડોદરા જિલ્લા ખરીદ વેચાણ સંઘની નવેમ્બર-૨૦૨૫માં યોજાયેલી ચૂંટણીમાં ભાજપે ૧૫માંથી ૧૪ બેઠક મેળવી હોવા છતાં હજી પ્રમુખ-ઉપપ્રમુખની ચૂંટણી યોજાઇ નથી.ભાજપ પાસે બહુમતી હોવા છતાં ચૂંટણીઓ નહિ યોજવા પાછળ બળવાનો ડર કારણભૂત હોવાનું ચર્ચાઇ રહ્યું છે.
સૌથી મોટી સહકારી બેન્ક બરોડા સેન્ટ્રલ કોઓ માં ટર્મ પૂરી થવા છતાં મુદત લંબાવી
વડોદરા જિલ્લાની અગ્રગણ્ય સહકારી સંસ્થા બરોડા સેન્ટ્રલ કોઓ બેન્કમાં વર્તમાન બોર્ડ ઓફ ડિરેક્ટર્સની ટર્મ પુરી થઇ હોવા છતાં હજી ચૂંટણી યોજાઇ નથી.
બરોડા સેન્ટ્રલ કો ઓ બેન્કમાં વર્તમાન બોર્ડ ઓફ ડિરેક્ટર્સની પાંચ વર્ષની ટર્મ ગઇ તા.૧૦-૧૨-૨૦૨૫ના રોજ પુરી થઇ હતી અને નવી ચૂંટણી માટે ઠરાવો પણ મંગાવવામાં આવ્યા હતા.
જો કે ત્યારબાદ સરકારે ફેબુ્રઆરી-૨૦૨૬માં સહકારી સંસ્થાઓની મુદત છ મહિના લંબાવી હતી.જેને કારણે બરોડા સેન્ટ્રલ બેન્કની વર્તમાન બોર્ડની ટર્મ ઓગષ્ટ-૨૦૨૬માં પુરી થશે.નવી ચૂંટણી ક્યારે યોજાશે તે હજી નક્કી નથી.
