આ પણ વાંચો ટ્રેન્ડિંગ સમાચાર
વડોદરા, તા.3 વડોદરા-અમદાવાદ એક્સપ્રેસ હાઇવે પર આજે કાચ ભરેલી ટ્રક પલટી મારતા ભારે ટ્રાફિકજામ સર્જાયો હતો. ૧૦ કિ.મી.સુધી ટ્રાફિકજામમાં હજારો વાહનચાલકો ચાર કલાક સુધી ફસાયા હતાં.
પ્રાપ્ત માહિતી મુજબ વડોદરાથી જાડા કાચની મોટી સીટો ભરીને ૧૨ વ્હીલવાળી એક ભારે ટ્રક અમદાવાદ તરફ એક્સપ્રેસ હાઇવે પરથી પસાર થતી હતી ત્યારે ઢળતી બપોરે ચાર વાગે પોઇચા બ્રિજ ક્રોસ કર્યા બાદ આ ટ્રકના આગળના બે ટાયર ફેઇલ થતા ટ્રક અચાનક પલટી મારતા આખા રોડ પર કાચ..કાચ.. થઇ ગયા હતા જેના પગલે પાછળથી આવતા વાહનો અટવાઇ ગયા હતાં. આ સાથે જ વડોદરા તરફ દુમાડ ચોકડી સુધી ૧૦ કિ.મી.સુધીનો ટ્રાફિકજામ થઇ ગયો હતો.
સૂત્રોએ જણાવ્યું હતું કે અડધો કિલોમીટર સુધી તૂટેલા કાચ ફેલાયેલા પડયા હતાં. જો આ કાચ પરથી અન્ય વાહનો પસાર થાય તો તે વાહનોને પંક્ચર પડવાનું જોખમ હોવાથી પોલીસે તાત્કાલિક વાહનવ્યવહાર અટકાવી દીધો હતો. માત્ર વડોદરા-અમદાવાદ એક્સપ્રેસ હાઇવે જ નહી પરંતુ ભારતમાલા એક્સપ્રેસ હાઇવે પર રાયકા ટોલનાકા સુધી પણ ટ્રાફિકજામ થઇ ગયો હતો.
મોડે મોડે તંત્ર દ્વારા નિર્ણય લેવામાં આવ્યો હતો અને વડોદરાથી અમદાવાદ તરફ જતા વાહનોને ડાયવર્ટ કરીને વાસદ તરફ રવાના કરવામાં આવ્યા હતાં. હાઇવે પર કાચ ભરેલી મોટી ટ્રક દૂર કરવા માટે બે જેસીબી, બે ક્રેઇનની મદદ લેવામાં આવી હતી. આશરે ચાર કલાકની ભારે જહેમત બાદ પલટી મારેલી ટ્રકને સાઇડ પર કરવામાં આવી હતી અને બાદમાં હાઇવે પરથી કાચ જેસીબી દ્વારા હટાવીને રાત્રે આઠ વાગ્યા બાદ ધીમે ધીમે ટ્રાફિક શરૃ કરવામાં આવ્યો હતો.
